اے جاہ ءُُ ہوٹلانی نام عجیب رنگیں انت ایشانی ھدا بند اوگان انت اے قوم ترا دنیا ءِ ہمک کنڈا گندگ ءَ کیت ایشانی راجی نفسیات زاناں انچو جوڑ بوتگ کہ اے ہمک جاہ ءَ کار کرت کن انت ۔دنیا ءِ ہمک کنڈ جاہ منند بوت کن انت ۔ ایشانی ہوٹلانی نام ،کوئٹہ چمن ہوٹل ،بولان کوئٹہ ہوٹل ،کوئٹہ ژوب ہوٹل ،بزاں ہمک نام ءِ تہا کوئٹہ ھوار انت بازیں بلوچانی ہوٹل ہم گندگ ءَ اتک انت ۔راہاں مئے دیم ءَ باز جاھاں مچ گوست کہ مکران ءِ یات پرینت بلئے یک تہر مچھ ایوک گندگ ءَ اتک چو مکران ءِ وڑا اے دگہ تہر ءِ ناہ ءُُ مچ نیست روڑانی سرا بازیں جاھاں سوگات بہا بوھگ ءَ ات ۔

سندھ ءَ پد پنجاب ءِ سمیری شہر راجن پور ءِ بندات بوت راجن پور گواستگیں وھداں بلوچستان ءِ بہر بوتگ انگریزاں وتی سیاسی مول ءُُ مرادانی ہاترا بلوچستان بہر ءُُ بانگ کرت اے شہر ءِ گیشتر مردم انگت بلوچ انت بلوچی زبان ءَ گپ جن انت اے شہر ءَ بلوچی دوچ دگہ دود ءُُ ربیدگی چیز گندگ ءَ اتک انت ۔ بلئے اے ہند ءِ مزنین شہرانی تہا بلوچانی ھوار ی ءَ پنجابی ءُُ سرائیکی ہم جاہ منند انت پنجاب ءَ زندگی دگہ رنگے ءَ انت بازار مزن ءُُ زیباات انت مزن مزنیں دوکان ءُُ شاپنگ سنٹر گندگ بوت انت ۔

چہ بلوچستان ءَ سندھ ءِ بازاراں اے جاہ ءِ بازار زیبا ات انت ہوٹل پیڑول پمپ ہم باز زیباات انت ہمدا چہ زالمی ءِ رنگ ءِ گندگ ءَ اتک آہانی دیمروئی ءُُ مئے بزگی زانگ بوت۔کساس شپ ءِ نو ءَ مئے بس DG khan ءَ سر بوت اے بلوچانی تاریخی جاھے انگریزانی بہر ءُُ بانگ ءِ ھرجان بوت اے ہم مزنیں شہرے ات بلوچ ءُُ دگہ دری قوم ہم جاہ مند انت اے شہر مزنیں ءُُ زیبائیں بازار ات مزن مزنین ہوٹل است ات بازارانی روڑ ہم پراہ ءُُ شاھگان ات انت بازیں دوکانی سرا بلوچانی نام نبشتہ انت یک جاہے مئے دیم ءَ بلوچ ٹرانسپورٹ ءِ بورڑ ہم گوست چہ DG khan شہر ءَ کمو دور زیبائیں ہوٹلے ءَ مئے بس ءَ پہ شام ءِ ورگ ءَ داشت۔

اے ہوٹل ءِ تہا پیٹرول پمپ ،دوکان ریسٹورنٹ ءُُ دگہ آسراتی جوانیں وڑ ءَ است ات۔ اے ہوٹل شپ ءَ سک جلوہ ءَ دئیگ ءَ ات۔ اے ہوٹل ءِ کارندہ بلوچ ات انت ماآہانی گپاں کم کم سرپد بوتاں وہدے ما گوں آہاں بلوچی زبان ءَ گپ جت آہاں مارا ہمے پسو دات کہ شمئے زبان ءَ سرپد نہ بیں مئے زبان؟؟؟

اے ہند ءُُ دمگانی گوں بازیں مردماں من دوچار کپتگ انت گشتریں مردمانی گشگ ہمیش انت ما شمئے زبان ءَ شری ءَ سرپد نہ بنت ۔ من آہاں مدام ہمے گشتگ کہ ما کلانی زبان یکے گالورانی پرک است یک ساعتے ءَ رند مئے بس ءِ دیم پہ وتی منزل ءَ راھادگ بوت پدا شپ ءِ تہاری ءُُ PK فلم بلئے ہمک شہرءَ روڑانی سرا منی چم کپت انت دیمروئی کار بوھگ ءَ ات روڑ ہم سک پراہ ءُُ شاھگان ات انت مردم ءَ چو بلوچستان ءِ وڑ ا سفر ءَ پہ جنجال نہ بیت ۔ کساس سہب ءِ ۰۰:۵ وہد مئے بس وتی گڈی منزل روالپنڈی ءَ سر بوت۔

ماٹیکسی ءِ گپت ءُُ دیم پہ اسلام آباد ءَ راھادگ بوتئیں کہ مئے سنگت مئے ودار ءَ ات انت من دل ءَ ہمے مارتگ ات اسلام آباد ءِ پُترگ ءَ مارا بازیں جست ءُُ پرس کنگ بیت بلئے سندھ ءُُ بلوچستان ءِ سیمسراں پد داں اسلام آباد ءَ یکجاہ ئے مارا جست ءُُ پد کنگ نہ بوت کساس دہ منٹ ءَ پد ما اسلام آباد ءِ I-10 ءَ سربوتیں مئے سنگت مئے ودار ات انت۔ اسلام آباد پاکستان ءِ بنکی شہر انت اے شہر ۱۹۶۰ ءَ ایوب خان ءِ وہد ءَ پاکستان ءِ بن شہر جوڑ کنگ بوت ۱۹۶۰ ۔۱۹۴۷ کراچی پاکستان ءِ بن شہر بوتگ اسلام آباد ءِ آبادی گیشتر دری مردم بزاں پنجابی ءُُ سرائیکی سندھی پشتو ءُُ کم بلوچ انت اے شہر ءِ زبان ھور ءُُ توریں اردو کہ گیشتر لوز انگریزی زبان ئیگ انت پنجابی زبان جوانیں وڑ ءَ کارمز بیت اسلام آباد ءِ نزیکیں شہر روالپنڈی انت اے دوئیں شہراں جاڑوکیں شہر گشگ بنت اسلام آباد ءِ شہر کوہانی شم ءَ جوڑ کنگ بوتگ کہ اے شہر سے ئیں نیمگاں کوہ است ۔

اسلام آباد ءَ نہ کہ گیش سردی بیت نہ کہ گرمی سردیاں مج سک بیت پاکستان ءِ گیشتریں بنجاہی ادارگ ہمے شہر ءِ تہا انت چوشکہ نیشنل اسمبلی ،سینٹ ،سپریم کورٹ ،الیکشن کمشن ءُُ دگہ باز مزنین ادارگ،اسلام آباد ءِ ہمک کوچگ ءُُ گلی ءِ تہا ترا یک ادارگے الم ءَ گندگ ءَ کیت انت اے واجہانی شہر انت کہ ادا ہرچی بوت کنت ؟؟ اسلام آباد ءِ تہا مزنیں شاہ دربر باز انت چوشکہ اسلامک انٹرنیشنل یونیورسٹی ،قائداعظم یونیورسٹی، علامہ اقبال اوپن یونیورسٹی ،نمل یونیورسٹی ءُُ دگہ بازیں وانگ ءُُ زانگی ادارگ کہ ایشانی تہا چہ پاکستان ءِ ڈن ءِ بازیں نودربر وانگ ءَ انت اسلام آباد ءِ تہا انٹر نیشل بالی پٹ ءِ است کہ ہمک ساھت ایشی ءِ تہا ملکی ءُُ درملکی بالی گراب بال کن انت ءُُ نند انت ۔

ہمے رنگ ءَ اسلام آباد گوں پاکستان ءِ دگہ بازیں شہراں By Read Tech انت ہمک روچ ہمک مزنیں شہرانی ھاترا بس چہ اسلام آباد ءَ درکپیت اسلام آباد زمین ءُُ فضائی رنگ گوں کل دنیا ءَ ہمگرنچ انت اسلام آباد ءِ تہا بازیں پارک ءُُ میوزیم ءُُ نامداریں جاہ است انت چوشکہ فصل مسجد دامن ءِ کوہ ۔لوک ورثہ ، سینٹرویم ،شاپپنگ مال شکر کنڈی پارک ،ٹیکسلہ ءُُ دگہ بازیں جاہ اسلام آباد ءِ تہا رکشہ ءُُ دگہ تہرے ٹیکیسی نیست ایوک ءَ گاڑی ٹیکسی انت باز کوہنیں ءُُ باز نوکیں ایشانی کرایہ ہم باز انت اسلام آباد ءِ روڑ بازیں نامداریں مردامانی نام ءَ انت چوکہ فیض محمد روڑ ،پروین شاکر ایونیو ،چاکر رند روڑ ،شاہ فیصل رور ءُُ دگہ بازیں نامداریں مردمانی نام ءَ انت۔

اسلام آباد ءِ جاہ ءُُ گلی گیشتر انگریزی آبانی سرا انت چوکہ G-8.G-7.I-10 ءُُ دگہ بازیں اسلام آباد ءِ نام آوڑ ءَ مزن انت جندے آرنگ ءَ نہ انت کسے کہ وتی چماں اسلام آباد نہ دیستگ آئی ءِ ذہین ءُُ ھیال ءِ تہا وڑ وڑیں عکس پہ اے شہر ءَ جوڑ انت بلئے اسل ءَ اسلام آباد آرنگ ءَ نہ انت اسلام آباد ءِ لہتیں خاص ءُُ مزنیں دگہ انت کہ پراہ ءُُ شائیگان انت آہانی نیام کر ءُُ کشاں پل ءُُ گل کشتگ اسٹریٹ لائٹ جنوک انت ۔

بلئے لہتیں روڑ انچو پروشتگ انت ءُُ تہا رانت کہ کس نہ زانت کہ اسلام آباد انت میڈیا ہمک وھد ءَ گیشتر ہمے زیبائیں دگانی عکساں پیشدار ایت ااسلام آباد ءِ تہا طبقاتی نظام باز رنگ ءَ گندگ ءَ کیت لہتیں ایریا ءُُ جاہ V.VIP انت کہ ہمک وڑیں آسراتی است روڑ ءُُ گلی مزن انت صاف ءُُ پلگار انت مزن مزنیں ماڑی پہ رد ءُُ بند جوڑ کنگ بوتگ انت اے وڑیں جاہ ءَ گیشتر زردار جاہ منند انت۔ اے جاھاں ہمک کس جاہ منند بوت نہ کنت ۔