دومی نیمگ ءَ لہیتں جاہ است انچو پسماندہ انت کہ کس نہ گیشت اے اسلام آباد انت روڑ پروشتگ انت گلی تنک ءُُ تہار گس بے رہبند ی ءَ جوڑ کنگ بوتگ انت ۔ لہتیں جاہاں مردم کڈوکانی تہاجاہ منند انت ۔ہمدا چہ اے ملک ءِ طبقاتی نظام ءِ بابت ءَ سرپد ی رسیت کہ اے ملک ءِ نظام ءُُ راہبند چے وڑ اَنت؟؟

اسلام آباد ءِ تہا بازیں جاہاں مذہبی انہتا پسندی گندگ ءَ کیت انچو گمان بیت اسلام آباد ایشی بنجاہ ءُُ فیکڑی انت چو اے شہر ءِ نام مزن انت مردمانی شعوری لیول مزن نہ انت ۔ٹیکسی ڈرئیور ہم غیر مہذہبی وڑ گپ جن انت فراڈی کن انت گیشتر ٹیکسی ڈرئیور پنجابی ،کشمیری ءُُ پشتو انت ہرکس وتار چہ دومی ءَ جوانترگیشت بلئے کرد ءِ حساب ءَ کل یک حساب ءَ انت۔

اسلام آباد ءِ وڑیں مزنیں شہر ءِ تہاکڈک ءُُ جگی باز جاہ روڑانی کش ءُُ گورا گندگ بوت انت کہ ایشانی تہا بزگیں پنجابی سندھی پشتو دلوتانی وڑا زندگی کنگ ءَ انت اے کچہرانی تہا وتی ہاتر ورگ شوہاز کن انت گٹر ءِ آپاں کارمرز کن انت ۔

اسلام آباد ءِ بازار یکجاہ نہ انت بلکیں ہمک مرکز ے وتی بازار است کہ آئی ءِ تہا ہمک وڑیں آسراتی رسیت ہمے رنگ گلیانی تہا ہمک وڑیں دوکان است مستریں شاپنگ مال سنٹریم شاپنگ مال انت کہ آئی ء ندارگ درملک ءِ وڑ انت ۔

۱۴ جنوری ۲۰۱۶: چوکہ ما نودربراتیں مئے نزیکی ہم گوں نودرابراں ات ما اسلام آباد ءَ ڈیرہ غازی خان ءِ بلوچانی کرا داشتگ ات کہ آہاں I .10 ءَ پہ وت ءَ یک پلیٹ یے کرایہ زرتگ ات ۔

اسلام آباد ءِ بازیں مزن شاہ دربر جاہانی تہا بلوچ وانگ ءَ انت بلوچستان ءُُ پاکستان دگہ ہندانی بازیں بلوچ اے جاہاں وانگ ءَ انت گیشتر مکران ءِ بلوچ انت ڈیر غازی خان ءِ باز بلوچ ہم وانگ ءَ انت اے دگہ جاہانی بلوچ لنککانی سرا حساب بنت ۔

بلئے ہر جاہ ءِ بلوچ ءَ یکے دومی ءَ گوں نزیکی است کل تپاک ءُُ یکجاہ انت بلوچانی جیڑہانی گیشینگ ءِ ہاترا اسلام آباد ءِ ہمک شاہ دربر جاہانی تہا ’’ بلوچ کونسل‘‘ جوڑ کنگ بوتگ کہ اے کونسل ءِ کارند و گیشتر بلوچانی جیڑہانی ترا وتی و س ءَ جہد کن انت مروچی ماگوں ڈیرہ غازی خان ءِ سنگتانی ہوری ءَ اسلامک انٹر نیشنل یونیورسٹی ءِ تروتاب ءَ شت انت اے مزن شاہ در برجاہ سکیں مزنیں ءُُ پراہ ءُُ شاہگانی جاہ ات چماں کار کت ہمے یونیورسٹی ءِ ہند ءُُ جاہ گندگ بوت انت ۔

ہمے رنگ ءَ اے یونیورسٹی زیبا ات روڑانی سرا پل ءُُ گل کشتگ انت ہوسٹلانی دیم ءَ چمن ات انچو صاف ات کہ نام مگر۔۔۔۔ بلئے یونیورسٹی ءِ یک چیزے من ءَ اجکہ کت اے مزنیں یونی ءِ تہا جنک جتا ءُُ بچک جتا وانگ ءَ ات انت کتابجاہ ءَ یک روچے بچکانی ہاترا ات یک روچے جنکانی جنک بچکانی ہند ءُُ سیمسراں آھت کناں نا کہ بچک جنکانی نیمگ ءَ شت کن انت اے یونیورسٹی ءِ تہا اسلامی رھبند بقول آہانی کارمرز بوہگ ءَ ات پرچکہ اے اسلامی ملکے؟؟؟

یونیورسٹی ءِ ہمک ڈیپارٹمنٹ دور ءُُ جتا ات ایڈمن بلاک ہم دور ات یونیورسٹی ءِ سہ مزنیں گیٹ انت ۔اے یونیورسٹی ندارگ ءَ سک جلوہ دات ہمک نیمگ ءَ چم کپتاں سبزیں ندارگ گندگ بوت انت مئے تروتاب ءِ وہد ءَ سردی ءُُ تاکریچ ءِ موسم ات بلئے پدا سبزگ جوانین رنگ ءَ گندگ آھتاں بازیں درچک چہ یورپ ءَ آرگ بوتگ انت اے یونی ءِ تہا لہتیں مچ اوں است ات بلئے بقول سنگتانی سال ءِ سر دوبرگش کار انت بلئے ہرماگ نہ کن انت ۔

اے یونی ءِ تہا پاکستان ءَ ابید درملکی کساس بیست ہزار ءَ چہ گیش نودربر وانگ ءَ ات اسلام آباد ءِ جند ءِ جاہ منندیں مردم اے یونی ءَ ہم وانگ ءَ انت اے یونی ءِ مزنیں ٹرانسپورٹے اوں است یک سد ءُُ پنجاہ ءَ گیش بس نودربراں اسلام آباد شہر ءِ کنڈ کنڈاں برانت ءُُ کار انت۔

بچکانی ہاتر پنچ شش مزنیں ہوسٹل است ات ہمک بلاک ءَ دو صد ءَ چہ گیش روم انت ءُُ یک روم ءَ کساس پنچ ءُُ دہ مردم جاہ کت کنت ۔اے ہوسٹلانی بلاکانی نام حضرت ابوبکر ،حضرت عمر ،حضرت عثمان ،حضرت علی ءُُ حضرت بلال ءُُ دگہ نامداریں اسلامی صحابیانی نام ءَ اَنت ۔

اے ہوسٹلانی تہا ہمک اسلامی پارٹیانی مردم ءُُ ہمک پرکانی مردم است ہرکس وت ءَ مزنیں مسلمان گشگ ءِ جہد ءَ انت بزاں یورپ ءِ خلاف ءَ پاکستان اسلام ءِ جوڑ کنگ ءِ جہد بوہگ ءَ انت ۔ رومانی دپ ءَ ہرکس ءَ وتی پارٹیانی پوسٹر جتگ ات ہمک بلاک ءِ تہا مس است کہ نودربراں ورگ دیاں پہ مس ءَ نودر ہمک ماہ ءَ زر جمع کن انت ۔

ایشاں ابید دگہ مزنیں مزنیں مس است کہ ہمک وڑیں ورگ است ات اے مس مزنیں ءُُ زیبائیں مس انت اے یونیورسٹی ءِ تہا مزنیں کتابجاہ ءِ است کہ دو تبک انت ہمک وڑیں کتاب است اسکالرانی ہاتر جتا کبین جوڑ کنگ بوتگ بلئے آ رنگ ءَ وانگ بلوچستان یونیورسٹی ءِ کتابجاہ است۔

اے کتابجاہ تہا گندگ ءَ نہ یتک اے یونیورسٹی ءِ انیکس مزنیں آبادی انت بلئے ایشی ءِ کتابجاہ ءِ کرسی ھالی انت بلوچستان یونیورسٹی ءِ کرسیانی سرا جاہ نیست نودربربن ءَ نندانت ءُُ وان انت انگت ءَ آ مہذب ءُُ ماجاہل انت ۔۔۔۔۔

اے یونیورسٹی ءِ کتابجاہ ءَ Digitalibrayہم است انت اے کتابجاہ ءِ تہا Potostat and printerاوں است ات دگہ بازیں آسراتی اوں گند گ بوت انت اے یونیورسٹی ءِ تہا مزنیں نادراہجاہ ءُُ بینک ہم است ات اے یونیورسٹی ءِ تہا ٹیکسی ہم اوشتوک ات انت ۔

من اے گپ ءَ بے ہال بوتاں کہ اے یونیورسٹی ءِ اولی وائس چانسلر ڈاکٹر بنی بخش بلوچ بوتگ اے یونیورسٹی ءِ یک روڑے ہمائی ءِ نام ءَ ات من ءَ یک چیزے ءَ ابکہ کرت کہ کوہ سلیمان ءِ بلوچاں انگت وتی دود ءُُ ربیدگ ہما رنگ ءَ داشتگ انت چے ہبر مایوک ءَ کتابانی تہا وانتگ انت ۔

بزدار بلوچانی کرا اے دود ءُُ ربیدگ انگت ءَ گندگ بیت اسلام آباد ءِ وڑیں مزنیں شہر ءِ تہا آ یکے دومی ءَ گندگ ءَ گوں چے ہبر گپت کوہ سلیمان ءِ بلوچاں گوں بلوچستان ءِ بلوچاں ءَ باز مہر ءُُ واہگ است بلوچستان ءِ ہمک رنگیں سیاسی ءُُ لبزانکی جاوراں سرپد انت آ دگہ ہندانی گالواراں ارزانی ءَ سرپد بنت ما ہم ہماہانی گالوار ءَ ارزانی ءَ سرپد بوتیں بازیں واجہ گالوار ءَ بلوچی زبان ءِ مزنیں اڑ ءُُ جنجال ءِ زان انت بلئے مارا ہچ وڑیں اڑ ءُُ جنجال نہ بوت ۔

نوں بلوچانی ربت چوانیں رنگ ءَ بوہگ ءَ انت ہمک جاہ ءِ بلوچدومی ہند ءِ ہبراں ارزانی ءَ سرپد بیت اے نزیکی گوں وہد ءَ گیشتر بیت مبارک قاضیءَ چہ کوہ ءِ سلیمان ءِ بلوچ جوانیں رنگ ءَ آشنا انت شکو شکست ءِ نامداری اے یونی ءِ تہا اوں گندگ بوت بازیں سنگتانی نام شکو ات اے یونی ءِ سنگت الطاف منیر،مست توکل بزدار،ذولفقار بزدرا (شکو) ءُُ سلیم بزدار ءِ مہمانداری ءَ چہ ما ہچبر بے ہال نہ بنت۔