بلوچی لبزانک ءِ پڑا اگاں چمشانکے دئیگ بہ بیت لبزانک ءِ تہ ابزیں چیز است انتءُُ گندگ ءَ کیت انت من ادا بس بلوچی لبزانک ءِ پڑا یک باز جوانیں ءُُ نوکیں گدارکے ءِ بارو ءَ وتی حیالءُُ مارشتان درشان کناں من مزنیں زانتکارے نیاں من بس ہر چیز ءَ واناں گڑا دوست بیت پدا دل ءِ لہڑانی درشان کنگ ءِ واستہ ءَ دو دانک نبشتہ کناں دانکہ دل ءَ لہڑ کم بہ بنت منی وڑیں نودربرے انگت گدارک ءِ بارو ءَ بازیں حیال نہ زانت ۔

ہرچی مارا نت ءُُ آئی ءِ توسیپ ءَ دودانک نبشتہ کناں ۔بلوچی لبزانک ءِ مزنیں زانتکار اے آرداد نوکیں گدارک کہ آئی ءِ نام انت ’’ ساہگ واتر کنت‘‘ کہ بلوچی لبزانک ءِ تہ ایک نوکیں ءُُ نوکیں اسلوب ءَ گوں دیم ءَ آوکیں اولی گدارک انت بگندے اے وڑیں گدارک نبشہت کنگ بوتگ بلئے منی وڑیں ناوانوکیں نودربر ے دیم ءَ نہ گوستگ آ دگہ گپے کہ منیر احمد بادینی ءِ ۱۰۰ ءَ چہ گیش گدار نبشتہ کرتگ ءُُ ءُُ آئی ءِ گدار بلوچستان ءُُ بلوچ ءُُ پدا نفسیات ،سائیکو ،نفسیاتی واہ گ ( سکس sex) ءِ سر ءَ بازیں نبشتہ کرتگ آئی ءِ گدار چہ مہر ءُُ محبت ،عشق ءَ چہ بدنات بنت ءُُ آسر چہ ہمے چیز ءَ بنت منیر احمد بادینی ءِ گداران کس شموشکار نہ بیت آئی ہمک پڑا بلوچی گدار نوکیں نامے داتگ آئی ءِ ہمک ناول وانگ کرزیت آئی ءِ پشت ترا یک مزنیں کلوئے ریست ۔ من ادا بس دو دانک پہ ’’ ساہگ واتر کنت‘‘ بارو ءَ کن انت ۔

اے گدارک چہ استین شنگ کار کیچ ءَ چاپ کرتگ ۔جون ۲۰۱۷ ءَ چاپ بوتگ اے گدارک ءِ ۴۸ تاکدیم انت ءُُ ایشیءِ ۸۰ کلدار انت اے گدار یک نفسیاتی چاگرد ءُُ انسان ءِ اندری واہستانی سر ءَ انت اے بزاں سرجمی ءَ گوں اندری مارشتاں بندوک انت۔ 

ساہگ واتر کنت اے چہ نام ءَ انچوش زانگ بیت کہ چہر ءِ رنگ ءَ نام ایش داتگ ادا ساہگ زانگ نہ بیت کجام ساہگ انت ءُُ چی یے ساہگ انت بلئے انچو وانگ ءَ چہ پد زانگ بیت اے ہما ساہگ انت کہ گوستیگن وتی وہد ءِ کسہ یے کہ نبشتہ کار ءَ ہما وڑا وتی مارشتاں درشان کرتگ ۔اے کتاب ءِ نامدات اے وڑ انت ’’ جنین نبشتہ کارانی نام ءَ ‘‘ اے دمک ءَ بازارانی تہ ءَ چنچو کسہ انت کہ نویسگ لوٹنت بلئے ماکہ ہوش کنیں نویسگ ءِ رپک ءَ دربریں داں اینچک ءَ زند ءِ نیمون نادراہی ہنچو باز بنت کہ مردم نزانت کجام نیمگ ءَ دلگوش بہ بیت ۔‘‘( اے آر داد)

اے گدارک ءِ پیش لبز پروفیسر زینت ثناء نبشتہ کرتگ آئی ءَ داد ءِ ناولٹ ءِ نام ءَ نبشتہ کرتگ ءُُ وتی حیال درشان کرتگ انت ۔ایشیء، دومی پیش لبز چندن ساچ ءَ ’’ دروازگ یک یک ءَ بند بوان بوت انت ‘‘ ءِ نام سر ءَ نبشتہ کرتگ ۔

اے گدارک ءِ بندا چہ پانزدمی تاکدیم ءَ بندات بیت ایشی ءِ اولی سر ءَ یک دراجیں لچہ ئے چہ بندات بیت نظم ءِ نام انت ’’ بغدادی ءِ دوستدار ءِ نام‘‘ ءَ پدا قادر وتی کسہ ءَ بندات کنت اے گدارک ءِ کارست قادر نامیں مردے ءُُ اے وپا آباد ءَ جامنندیں اے ناولٹ ءِ وانگ ءَ بندات کنے ترا انچو سما بیت گشے وتی گوست ءُُ انوںءُُ آوکیں وہد ءَ سما کنے اے نبشہت کار ءِ کما ل انت کہ ترا برے گوں گوست ءَ برے ترا نویں سما بیت ۔

اے ناولٹ ءِ بندات چہ نمدی تکینک ءَ بتی ءُُ دیما روان انت کہ سرجمی ءَ عشقءُُ رومانس ءِ کسہ ئے کہ انچو سما بیت گشے تئی جند ءِ کردار انت ءُُ تو وت گوں ات گوں ہمے کسہ ءِ تہا وت ہمے کاراں کنگا ئے بلئے اے گدارک ءِ تہا گواچن نویسی ءَ دیما روان انت اے سرجمی ءَ حقیقت بندی بزاں real سما بیت ءُُ ایشیءِ پلاٹ ءَ بگرداں زبان انچوش پدر انت ہمک مردمے وانت کنت ءُُ وانگ ءَ بندات بہ کنت داں آسرے نہ کنت چہ وتی دماگ ءَ دیگے جاگہاں نہ ٹگل ایت۔

ایشیءِ تہا ڈائیلاگ انچوش زانگ بنت گشئے ہمے وڑ ءَ حقیقت انت ءُُ ہمے وڑا بوتگ انت ایشیءِ تہا قادر ءِ کارست جنین آدماں ءَ وتی ملکیت زانت ءُُ ہمک جنین آدماں گوں وتی ہوس ءِ ہوس ءِ آس ءَ سرد کنگ ءِ واست ءَ کارمرز کنت ءُُ پدا وتی کار ءَ شرکنگ چہ پد شموشکار بیت ءُُ قادر ءِ کردار مردانگی ءَ زانگ کنت اے ناولٹ انچوش انت کہ ابرم ءَ گوں نزیک انت ۔

ءُُ ایشی ءِ تہا بلوچ چاگرد ءِ بووکیں کاراں ءُُ مردین آدمانی گوں جنین آدمانی گوم ءَ زلم ءُُ زواکی ءُُ آہانی واہگ ءِ سرجم نہ کنگ ءِ رواج گندگی ءَ کیت انت ۔گدارے جوانین کارستے زرینہ انت کہ آئی ءَ ادا انچوش پیش داشتگ کہ زرینہ ءِ لوگواجہ یک نفسیاتی نادارہ ئے کہ sex کنگ ءِ وہد ءَ گوں جنین ءَ وتی زلم ءُُ جبر کنت ۔ادا چہ آئی ءِ نامردی زانگ بیت ءُُ آئی ہوس زانگ بیت آ مہر نہ زانگ بس وتی حوس ءِ پورا کنگ ءِ واست ءَ گنوک انت ادا مہر کنوک ءِ کسہ ءَ پیش دارگ ءَ انت کہ مہر کنگ ءَ چہ پد جنین ءَ ہردیں آدم چوں دوست بیتءُُ آ وتی اندری مارشتاں چوں درشان کنت ءُُ وتی گرمی ءَ را سارت کنت ۔

اے گدارک سرجمی ءَ گوں بلوچ چاگرد ءَ بندوک انت قادر ہمے ہند ءُُ دمگ ءِ کسہ یے کہ ادا اے آرداد ءَ گوں وتی مارشتان درشان کرتگ ۔ اے چاگرد ءَ ہزاران انچیں کسہ است انت کہ دیما آرگ لوٹ انت کہ بازیں آروس کرتگیں مردیں ڈنی ملکاں انت ءُُ آہانی لوگ بانکانی دلی واہگ یا اندری درد سرجم نہ بنت گڈا آ نفسیاتی نادرہ بنت کہ مجبوری ءَ آ وتی لوگ ءِ نزیک ءُُ گورا وتی کاراں بزاں نفسیاتی واہگ ءَ سرجم کنگ ءِ جہد کن انت ساہگ واتر کنت بازیں انچیں چیز پدر کنت کہ چد ءُُ ساری ہچ بلوچ نبشتہ کار ءَ اے وڑیں نفسیاتی واہگ دیما نہ آرتگ دیما نہ کتگ ۔

قادر کارست انچوش زانگ بیت چوکہ البرٹ کامیو ءِ گدار درآمد ءِ کارست کہ وتی مات ءِ مرگ ءَ ہچ تکانسر نہ بیت ءُُ قادر ہمے کارست ءِ وڑٹ انت آئی ءِ مات مرایت چماں ارسی ترمپے در نہ ایت ءُُ قادر ءَ سعادت حسین منٹو ءِ باز وانگ ءِ شوک انت کہ آئی ءَ را پمشکا جنک سک ءَ دوست بنت ۔

اے گدارک سرجمی ءَ گوں رومانس ءَ چہ آسر بیت پرچکہ قادر ءَ را گوں جنین آدماں وتی زند گوازینگی انت دیمترا انچوش زانگ بیت کہ بلوچ چاگرد ءِ تہا بازیں مردم ڈنی ملکان انت ءُُ آہانی لوگ بانک چہ دومی مردین آدم ءَ وتی تن ءَ سرجم کن انت ءُُ آہانی بازیں نزانتکاری چہ آہاں چک بیت ءُُ اے گدارک ءِ تہا قادر ہم یک جنین آدمے ءَ را چکے لاپ ءَ دنت ءُُ پدا آئی مردم سہن(طلاق) دنت ۔

اے گدارک وانگ ءَ من ءَ انچوش سما بوت گشئے اے منی جند ءِ کار انت ءُُ من وت گون انت منی گوم ءَ اے کار بوتگ انت ءُُ بلئے پدا چارے سما بیت کہ اے نبشتہ کار ءِ جند انت سرجمیں کسہ ءَ وت گوں انت ءُُ کارست آئی ءِ جند انت بلئے اے وڑیں realگواچن بائد انت ہمے رنگ ءَ دیما آرگ بہ بنت کہ لبزانک ءِ تہا مزنیں بدلی یے کار انت ءُُ لبزانک سرجمی گوں چاگرد ءُُ انسان ءِ زند ءَ گوں ہم گرنچ انت اے گدار ک ستا کرزیت بائد انت ہمک بلوچ نبشتہ کار ہم گواچن نویسی ءِ تہا ہمے داب ءَ نبشتہ بکنت ۔

گوں ہمے گپاں چہ قادر ءِ کارست ءَ را گشگ لوٹاں وتی آوکیں گدارک ءِ یا گدار ءِ کاراں ہمے رنگ ءَ دیما بیار اے گدارک بلوچی لبزانک ءِ تہا گواچن نویسی ءِ اولی چیدگ انت کہ باز ستا کرزیت۔