دنیا ءَ مرچی ہمنچو دیمروئی کتگ کہ حساب ءَ در اِنت ،ماہ ءُُ استالاں سر بوہگ نوں کوہن اَنت ۔

ٹیکنالوجی وتی دیمروئی ءِ ہما برزیں کنڈ گ ءَ سر اِنت کہ گمان کنگ نہ بیت زی فیس بک ءَ انچو ھالے دیم ءَ اتکگ کہ ناسا ءَ گشتگ کہ آوکیں لہتیں سالاں پد زمین پہ بنی آدم ءَ زند گوازینگی نہ بیت بزاں گرمی انچو زیات بیت کہ نندگی نہ بیت آہاں وتی لوٹ کلکشان ءُُ دوریں استاراں بندات کتگ کہ بلکیں اے زنڈیں کلکشان ءَ دگہ انچیں جاہے دربئیت کہ آہود ءَ زندگی بہ بیت ۔

اے شوہازی وتی جاہ ءَ بلئے دومی نیمگ ءَ آہاں اے جار پراینتگ کہ زمین کمو تیلانک دئیگ بہ بیت کہ دانکہ گرمی ءَ چہ رکگ بہ بیت ،یکبرے اے گپ ءَ منا بلائیں تکانسری یے ءَ دور داتگ کہ اے بلائیں ناہاریں زمین اپو سائنسی کجام کرینگ تیلانک دات کنت ،رند ءَ جہلی بنداں آئی ءَ نبشتگ اَت کہ اے کار گندگ ءَ نہ بوتگیں گپے بلئے اے بوت کنت

اگاں ما یک سستگیں استالے بزاں (شوٹینگ اسٹارے) ما زمین ءِ نزیکی ءَ آورت بہ کن اَنت آئیءِ نزیک ءَ آئیگ ءَ چہ زمین ءُُ آئیءِ نیام ءَ یکے دومی ءِ کش ءُُ چل بیت ءُُ چریشی ءَ زمین ءِ جاہ بدل بوت کنت بلئے ایشی ءِ لہتیں نکس اوں بوت کن اَنت بزاں زمین چنڈ ءُُ سیلاپ اوں اتک کنت یاکہ چو ہم بوت کنت کہ زمین ءِ چہ ءَ روچ ءِ برانزانی گستائی ءِ جاہ ءَ گیشتر نزیکی ءَ بئیت ءُُ گیشتر گرم بہ بیت۔

بلئے اے سائنسی مردماں زی ہما چیز کہ کس ءَ گمان نہ کتگ اَنت آ مرچی مئے دست اَنت ہمے چیزانی تہا یکے موبائل اِنت ۔۔۔۔۔۔من ءَ یات اِنت کہ نوک پی ٹی سی ایل وہدے مئے ہلک ءَ اتکگ اَت داں درست حیران ءُُ ابکہ بوتاں کہ اے چتور یں چیزے کہ گپاں یک جاہے ءَ چہ دومی ءَ جاہ ءَ بارت

منی ماتی ءَ وَ انگت ءَ ھیالے جتگ اَت کہ بلکیں ہمے وئر کہ ایشیءَ سک اِنت توار چمیشی ءَ روانت ۔۔۔۔۔بلئے نوں وَ موبائل اتکگ کہ ایشیءَ وئر پر نسیت منی ماتی موبائل ءِ دور ءَ وَ زندگ نہ بوتگ بلئے اگاں زندگ بوتیں الم ایشیءِ ہم گمانے جتگ اِتے بلئے زانوگر زانت اَنت کہ توار چون ءُُ چتور یک جاہے چہ دومی جاہ ءَ سر بوہگ ءَ اَنت بزاں چہ ہما برانز ءُُ وئیزانی کمک ءَ توار یک جاہ ءَ چہ دومی جاہ ءَ سر بنت۔

موبائل ءِ جوڑ کنگ ءِ اولی ءُُ مستریں سوب ہم ہمے بوتگ بلئے روچ پہ روچ نوک نوکین افیسانی ایشی ءَ ہوار کنگ ءَ مردمانی مجلس ءُُ سنگتی پہک ءَ ہلاس کتگ ۔بلکیں چوش بگش کہ کمپیوٹر،ٹی وی،اخبار اے درست یکیں موبائل ءِ کمک ءَ دسترس ءَ آرگ بوتگ اَنت کہ نوں وٹس اف ءُُ فیس بکے سرا برپا اِنت کہ ایشاں وَ مردم پہک ءَ بدل کتگ ءُُ من بازیں دیواناں نشتگ اَنت گپ ایوک ءَ ہمیش اِنت کہ ہچ گپ نیست ۔۔۔۔۔۔

بزاں درستاناں موبائل دست اَنت ءُُ وتی دنیا ءَ گار اَنت آ دیوان تُری سے ءُُ چار مردمانی بہ بیت یاکہ دہ ءُُ بیست ھال یک اِنت ۔پیش وَ دو مردمانی یکجائی ءَ انچیں بلائیں مجلس بوتگ کہ روچ شپ بوتگ اَنت بلئے انوگیں وہد ءَ ہمے موبائل ءِ شمّی ءَ درست پہک گمراہ کتگ اَنت ۔۔۔۔۔

چش نہ اِنت کہ موبائل کارمرز مہ بیت موبائل مرچی نوں ورد ءُُ وراک ءُُ گد ءُُ پچءُُ لوگ ءُُ جاگہ ءِ وڑ ءَ یک بنکی حاجتے جوڑ بوتگ بلئے کسانیں زہگانی موبائل دئیگ ،لوگ ءِ مات ءُُ گہارانی موبائل دئیگ ،منی دل ءَ ناشریں کارے ۔۔۔۔

یکے کندگی حبرے کہ وٹس اف ءَ یک زالے ءَ وائس میسجے کتگ اَت کہ من یک بلوچ زالے آں ءُُ بائد اِنت بلوچ جنین آدم وتی پردگ ءَ چہ موبائل ءَ بہ کن اَنت ءُُ لوگ ءِ مردین آدم آہاں موبائل زورگ ءَ مئیل اَنت پرچکہ باندہ ہمیشانی فوٹو ءُُ ویڈیو بازار ءَ شنگ بنت ءُُ سرجمیں کہول رسوا بیت ۔دومی ہمے موبائل ءِ سرا چنچو جنک رد ءُُ دئیگ ءُُ حراب کنگ بوتگ آ دگہ کسہ یے ۔۔۔۔۔‘‘

آئیءِ اے دراج بُریں کسہ ہردے من اِش کتگ داں آئیءَ را ہمے سہت ءَ من مسیج کتگ کہ منی گہاراگاں تو موبائل ءَ زالبولانی دئیگ ءِ ھلاپ اِت گڑاں ترا پرچکہ اے گون اِنت ءُُ وٹس اف کنگ ءَ اِت۔۔۔۔۔

آئیءَ وتی پشومانی ءُُ ہجالتی ءَ دوبر مسیج نہ کت ۔بلکیں باندہ ءَ منا اوں ہمے گشگ بہ بیت کہ تو وتی موبائل ءَ دور بدئے ۔۔۔۔۔من وتی موبائل ءَ دور دات نہ کناں پرچکہ من پیستر گشتگ کہ موبائل یک حاجتے جوڑ بوتگ بلئے بائد اِنت۔

ما ایشیءَ ہمیشی ءِ جوڑ کنگ ءِ بنکی سوبے ءِ پداں کارمرز بہ کن اَنت اے شر اِنت کہ مرچی انٹرنیٹ ءُُ موبائل ایپساں مئے بازیں جیڑگ گیشوار کتگ اَنت بلئے روچ پہ روچ مئے لوٹ گیش بوہان اَنت ،ءُُ موبائل مارکیٹنگ گیش بوہان اِنت اے کمپنی روچے یک تہرے جوڑ کن اَنت ءُُ منا ترا رِپیّناں ،بندات ءَ ایوک ءَ موبائل اَت ،پدا ایشیءَ کاڑد دپ اَت ،رند ءَ ایشیءِ دیم مزن بوت ،نوں وَ ٹچ اتکگ کہ پُجگ نہ بیت بلئے مارا درستاناں گون اِنت ۔

ایشیءَ مئے وہد ءُُ مردم گری حراب کتگ ،مردم گری اے ھساب ءَ کہ زی اگاں وہد پاسی نہ بوتگ گڑاں مردمے ءِ دیدار ءَ درکپتگ اَنت دیوان ءُُ مجلس کتگ بلئے مرچی موبائل اِنت کہ یک سرجمیں دنیائے ایشی تہا است انت ءُُ اے یک سہتے اوں ترا حشک ءَ نندگ ءَ نیلت مدام یک نوکیں چیزے ءَ

گوں ترا دست گٹ کنت ءُُ من ءُُ تو پہ ارزانی ءَ ایشی ءِ رِد ءَ کائینت ۔عرض ایش اِنت کہ موبائل کارمرزی ھلاس وَ ہچ رنگ ءَ بوت نہ کنت بلئے بائد ما ایشیءِ تہا کمی بیار اَنت ءُُ وتی زندگ ءَ گہتر بہ کن اَنت۔پرچکہ موبائل وَ کئیت روت بلئے مردم اگاں شت اَنت پدا نیا اَنت۔۔۔۔۔۔