لہتیں سال انت کہ حدا ءَ وتی ہور ءُُ شرتگانی گنجیں در پہ مکران ءِ ہشکاوگیں زمینءَ گورگ بند کتگ ۔ایشیءَ سوب ءَ مکران ءِ تہی ءُُ کشی درائیں ہنداں ڈکال ءِ نوبت ودی بوہگ ءَ انت ۔درائیں ڈگار ہشک انت ءُُ ملک ءُُ میراتی مردماں واہ ءُُ زاری پر انت ۔مچ ءُُ مچکدگ گیرمران ءُُ ہشک بوہان اَنت ۔درائیں نیمگ ءَ انچیں ہشکی یے ءَ مانشانتگ کہ آئیءِ ندارگ نہ بیت ۔

بلئے استیں جاوراں سرکاری کارندے بے ہوس ءُُ بے حال اَنت انچو سما بیت کہ حکومتی مردماں مکران ءِ اے جاور ءَ وتی چم بندکتگ اَنت ۔بلئے یات دارگ بہ بیت کہ اگاں آوکیں لہتیں سالاں اے جاور چد ءُُ گندگ تر بنت رند ءَ جاور چہ دست ءُُ گیگ بوت نہ کنت ۔انوں مکران ءِ گمان درائیں ڈیم ہشک ءُُ ھالیگ انت مستریں ڈیم کہ وت یک سرکاری ڈیمے بزاں میرانی ڈیم سرجم ءَ ھالیگ اِنت ءُُ چہ ہشکی ءِ سوب ءَ آئیءِ اندر ءِ ساہدار مرتگ انت ءُُ ایشانی جاہ ءَ بمبر ءُُ گذ رستگ انت ۔

نوں ھالیگیں جاہ پہ ڈیم ءِ لچ ءُُ مین ھاک ءُُ پلک جوڑ بوتگ انت بزاں اگاں نوں شریں ہور ءُُ شرتگے بہ بیت داں میرانی ڈیم ءِ نزیکی ءُُ گور ءِ میتگ وَ آپ بار بنت بلئے شہر تربت ہم چی ایشیءِ ھار رک اِت نہ کنت ۔اے بابت ءَ لس مردم حکومتی مردماں گوں ڈھ داتگ کہ بلئے انگت ءَ اے بابت ءَ ہچی کنگ نہ بیت ۔ہور شرتگ اگاں حدا ءِ دست ءَ انت بلئے چراہی ءَ رک ءِ وَ مردمانی دست ءَ بوت کنت ۔

بلئے گندگ ءَ ہچی بوہگ ءَ نہ انت ۔یک وہدے بوتگ کہ مکران بلوچستان ءِ اے دگہ دمگاں گیشتر ہور ءُُ شرتگانی ہند بوتگ بلئے پنچ ءُُ شش سال اِنت کہ ہور نہ بوتگ ۔پیشی مردماں گشتگ اگاں دیراں پد ہور ے بہ بیت آ ہور برکتیں ہورے نہ بیت بلکیں توپانے بیت انچو کہ ۱۹۹۸ ءِ ھار ،۲۰۰۷ ءِ سیلاپی ہور ءُُ ھار کہ چرائی ءَ بوتگیں نکس ءُُ تاوان انگت ءَ حکومت ءَ تاوان باریں مردماں نداتگ اَنت ۔

اے بری اگاں ہور ے بہ بیت داں ہما ہورءُُ ہارانی ڈولیں ہورے بیت ءُُ اے رندی بلکیں آ دوئیں ہاراں چہ گیشتر تاوان بہ بیت ۔انگت ءَ وہد اِنت اگاں حکومت کارندہ ڈیمانی راہ ءُُ دراں پچ بہ کنت اَنت ءُُ ہما ڈیماں کہ بمبر ءُُ گز رستگ آ گڈگ ءُُ درکنگ بہ بیت ءُُ دگہ ڈیم اوں بندگ بہ بنت بلکیں تاوان انچو مہ بیت۔دومی نیمگ ءَ ہشک سال ءِ سوب ءَ دہکان کار ءُُ مالداریں مردماں سک باز تاوان رسگ ءَ اِنت اے درگت ءَ ہم حکومتی ہچ وڑیں گامگیج گندگ نہ بیت ۔

اگاں چہ موسمی ھساب ءَ اے سال گوستگیں بازیں سالاں چہ گرم ءُُ ڈکالیں سالے بوتگ کہ آسر ءَ سر اِنت ۔بلئے اے گرمی ،ڈکالی ءُُ ہشک سال ءَ حکومت ءَ وتی ہچ رنگیں کرد پہ مہلوک ءِ وشنود یءَ دیم ءَ آرگ ءَ بے سوب بوتگ اَنت۔ چرے راستی ءَ وت پدر انت کہ حکومتی درائیں کول ءُُ سوگند کہ ووٹانی نوبتاں کنگ بنت درست دروگ انت ،اگاں چہ گوستگیں حکومت وت تربت ءَ گوں سیادی کنت ءُُ مکران ءِ مستریں پارٹی ہم ہمیش اِنت ءُُ آئیءِ ورکر ءُُ مردم ہم مکران ءِ درائیں میتگاں است انت بلئے اے راجی جیڑگ ءَ کسی سد ءُُ بود گندگ نہ بیت۔

مہلوک ءِ چم استیں حکومتی اگدہ داراں گوں ہم است انت بلئے استیں حکومت ءَ انگت ءَ مکران ءِ اے جیڑگ ءِ بابت ءَ ہچی چار ءُُ بچار نہ کتگ ۔اگاں ہمے جاور بوتاں داں مہلوکانی گیشیں بورینگاں چہ زمین جہل ءءِ آپ ہم ہلاسی ءَ دیر نہ کنت ءُُ پنجگور ءَ بازیں بورینگاں چہ مچکدگانی کہنی آپ ہلاس بوہگان اِنت اگاں انچو بہ بیت داں بورینکاں آپ ہم ہشک بنت۔ انوں وہد دست اِنت کار کنگ بہ بیت رند ئے دست سرا کنگ ءُُ اپسوز کنگ کسی درد ءَ نہ وارت۔کولے عطا شاد ئیگ ءَ 
چمے بہ بیت پہ گندگ ءُُ 
گوشے بہ بیت اِشکنگ