بلوچستان ءِ چاگردی راہبند مروچی ءَ چہ دوصد سال ساری چارگ بہ بیت تو آ وہداں آئیءِ رنگ ءُُ دروشم ءُُ رہبند دگہ رنگ ءَ بوتگ انت ۔ مروچی بلوچستان ءِ اے قبائلی setupکہ اے رنگ ءَ مارا گندگ ءَ کیت ،اے کل سنڈیمن ءِ کار انت۔ سنڈیمن مشترق ات کہ آئیءَ بلوچستان ءِ کل چاگردی رہبند بدل کرت انت ۔

سرداران زر ءُُ طاقت گیش دات ۔جھالاوان ءُُ سروان ءَ پہ نواب جوڑ کرت ۔ہمک جاہ ءَ سردار ءَ جوڑ کرت کلاناں لب ءُُ لالچ دات داں کہ آہانی سرا ارزانی ءَ انگریز ھاکمی کرت بکن انت ۔آئیءَ Divide and rule ءِ پالیسی ءِ سرا علم کرت ہما انت کہ داں روچ ء مرچی بلوچستان ءِ چہ سردارانی پنجگاں درنئیت ءُُ عوام ءِ زند عذاب ءِ تہا انت ۔سنڈیمن ءَ چہ سر بلوچستان ءِ تہا قبائلی جمہوریت بوتگ ۔ادا ہما مردم میر جوڑ کنگ بوتگ کہ آئیءَ پہ قبائل ءَ لہتیں شری کرتگ ءُُُ کلیں اولس ءَ آئیءَ را دوست داشتگ ءُُ گچین کرتگ ۔

پدا وراثاتی سیاست نہ بوتگ ۔ بلکیں ہمک وہدءَ میر چہ اولس ءِ رضا ءَ گچین کنگ بوتگ۔اے ملک ءِ نیمگ ءَ ہمک وہد ءَ اے جار جنگ بیت کہ سردار بلوچستان ءَ دیمروئی ءَ نیلنت ہمے رنگ ءَ پنجاب ءُُ اے دگہ قومانانی حیال ہمے رنگ ءَ کہ آ لوٹ انت کہ بلوچستان دیمروئی بکنت بلئے سردار بلوچستان دیمروئی نیلنت ۔وہد ے ماں بلوچستان ءِ راجدپتر ءَ چاریں ہمک وہدءَ ہمے سردار چہ ہمے واجہانی سردستی ءَ وزیر اعلی ءُُگونر بوتگ انت ۔

بلوچستان ءِ گیشتر وزیر ہمے نواب ءُُ سردار بوتگ انت ۔ءُُ آہانی آروک ہمے مرکزی حکومت بوتگ ۔ ابید مرکزی حکومت ءَ سردار وزیر اعلی ءُُ گورنز نہ بوتگ انت بلئے ۔۔۔۔۔؟

مکران کہ مدام مردم گشنت کہ سرداری نظام ءُُ رہبندنیست انت ۔کل بلوچ یک حساب ءَ انت ۔اگاں راستی ءَ چارگ بہ بیت مکران ءَ سرداری نظام وَ نیست بلئے مردمانی پگر ءُُ حیال ( لاشعوری رنگ ءَ) سرداری اِنت، کار سرداری اَنت آہانی لوٹ ہم سرداری انت ،ادا من سیاسی سروکانی بابت گپ کنگ ءَ اوں ۔۔

پہ درور ہمے واجہ وہدے چہ وتی لوگ ءَ درکائینت گڈا بیست گاٹ گوں تیر ءُُ توپکاں ایشانی ہمراہ اَنت ۔ہمے واجہ وت ءَ سیاسی سروک گشنت ۔اولس پہ ارزانی ءَ ایشانی کرا شت نہ کن انت۔زوت ہمے واجہ وتگڑیں میر جوڑ بنت۔’’سرماں ھاکاں کپتگ ءُُ پگر ءَ چہ سرداری نہ شت‘‘ اولس ءِ ذہن انگت قبائلی رنگ ءَ انت ۔

وہدے مکران ءِ چاگرد ءَ ما چاریں گڈا آئیءِ راہبند ءِ تہا بازیں چیز گندگ ءَ کیت پہ درور اگاں کسے پہ سانگ ءُُ رشتہ ءَ دومی جاہ ءَ روت اول سرا آئیءِ ٹک ءُُ ذات ءِ سوج کنگ بیت ،اے دگہ نزوریں ٹکانی کس ہچ رنگ ءَ وتی جنکاں پہ سانگ ءَ نہ دنت ۔

ایشاں چہ ابید بازجاھاں اے ٹکے مردمانی قبرستان ءُُ مسیت ہم جتا انت انگت مردم ایشاں چہ وت ءَ کستر سرپد بنت ۔ایشانی پرس ءُُ سوراں ہم نہ روانت۔ ہمے رنگ ءَ باز جاہاں ووٹ ہم پہ ذات ءُُ ٹک ءَ دئیگ بنت ۔بلئے انوگیں وہد اں ہمے ’’زئی ءُُ ٹک‘‘ پدا گیش بوہان انت ۔ایشیءَ مئے سیاسی پارٹی گیشتر دیمروئی دئیگ ءَ انت۔