بلوچستان پاکستان ءِ گچینی دمگ انت کہ اودے حکومت ءُُ حاکماں پہ آکبت ءِ دیمروئی ءَ وتی کٹ ءَ را گیش کنگ ءِ ہچ وڑیں سد ءُُ سما نیست ۔

اے مردم پہ دیمروئی کارانی ھاترا گیش کٹ ءُُ مال ودی کنگ ءِ ہچ وڑیں جہد ءُُ کوشست نہ کنگان انت اے مردمانی گورا پہ آ کبت ءِ دیمروئی ءُُ کاررہبند ءِ ھاترا ہچ وڑیں دید ءُُ گند نیست ءُُ ننکہ پرے کار ءَ آ نوکیں پیش بندی کنگان انت۔

بلوچستان ءِ حکومت ءُُ حاکم مدام اے دلمانگ انت کہ بنجاہی حکومت آھاں زر ءُُ مال بدنت تنکہ آ اے زر ءُُ مالاں وتی واہگ ءُُ تماہ ءِ پدا ہرچ کت بکن انت اے وت ماں وت ءَ ہچبرکٹ ءُُ مال ءِ شوہاز ءَ نہ انت ۔

اے درچ ءَ دمگی حاکم بنجاہی حکومت ءِ نیمگ ءَ داتگیں زر ءُُ مالانی ہرچ کنگ ءَ ہچ پرواہ ءَ نہ کن انت ءُُ مہلوک ءِ اے زراں پہ بے دردی ہرچ کن انت ۔اے بابت ءَ اگاں چارگ بہ بیت گوستگیں بازیں دھکاں حکومت ءَ وتی مال ءُُ کٹ ءَ گیش کنگ ءِ ھاترا ہچ وڑیں سنگینیں گامگیج نہ زرتگ ۔

بلوچستان ءِ حکومت ءِ حال ایش انت کہ اے انگت نزانت کہ سیندک پروجیکٹ ءَ آئی ءِ ونڈ ءُُ بہر چی انت؟ ننکہ کدی آئیءَ وتی اے ونڈ ءُُ بہر پد جتگ؟ اے وہد ءَ بلوچستان حکومتءَ مالیات زانتیں مردمے نگواہ ایت بلوچستان پلاننگ اینڈ ڈیولپمنٹ ڈیپارٹمنٹ فینربلٹی ءِ جوڑ کنگ ءُُ ایوک ءَ بِچن ءُُ لچین ءِ سرا گزارہ کنگان انت ۔
ہمے جاوراں حکومت ءَ اے جار پرینتگ کہ آ پہ بے روزگاراں ہزاراں روزگار ودی کنگان انت ۔نوں مہلوک سرپد بوتگ کہ اے ایوکیں جار انت ۔

ایشاں گوں راستی ءَ ہچ وڑیں سیادی یے نیست پرچکہ اولی رند ءَ پیسریگیں چیف سکریٹری یے ءَ گوں وزیراعلیٰ ءَ یک دیوانے ءَ اے روزگارانی بابت ءَ گپ جتگ ات ءُُ اے حال داں رسانک در ءَ سر بوتگ کہ نوں گوستیگں دوسالانی میانجی ءَ رند پہ رند اے روزگارانی پرکنگ ءِ جار پرینگ بیت بلئے گمان نیست کہ حکومت دمگ ءَ بے روزگاری ءَ کم کنگ ءِ ھاترا مہلوک ءَ را روزگار بدنت ۔

اے وہدءَ بلوچستان کم چہ کم ۲۰ لکھ بے روزگار ہست ءُُ حکومت ءَ اے سنچ ءُُ بود نیست کہ اے ورناہاں روزگار بدنت ۲۰۱۳ ءَ پد بے روزگاری ءِ سوب ءَ بلوچستان نیزگاری سک وداتگ، پہ مردماں دو وہد ءِ نان سکیں ھزابے ۔ نیم کرن ءَ پد ہم بلوچستان حکومت ءِ پیش بندی سالے یا شش ماہ ئیگ انت ۔بلوچستان ءَ ایم پی اے وتی ایم پی اے فنڈانی گرگ ءَ بیزار بیت کہ آیاں سالی بجٹ رسگی بنت ۔

پہ ایم پی اے آں پی ایس ڈی پی ءِ فنڈانی گرگ شیر ءِ دپ ءَ شکار ءِ پچ گرگ انت ۔ بلوچستان دیم پی اے آں پہ پی ایس ڈی پی ءِ فنڈانی گر گءِ ھاترا واہگ ءُُ تما یے ہم پشت نہ کپ ایت اے درگت ءَ بلوچستان ءِ جہگیر اے دراج سندیں پیش بندی نہ کن انت ۔

وہدے بنجاہی حکومت ءَ بگٹی ءِ زمین ءَ کچھی کینال کار بند کت گڈا بلوچستان حکومت ءُُ آئی ءِ ہم پتیں پارٹیاں ہچ وڑیں گپے نہ جت کہ اے مزنیں ءُُ ارزشت داریں کار پرچہ بندکنگ بوتگ انت ؟اے درچ ءَ ہچ وڑیں زہرشانی یے جلسہ ءُُ جلوسے ءُُ ننکہ بلوچستان اسمبلی ءَ منگ نامہ یے پاس کنگ بوت کہ بنجاہی حکومت کچھی کینال ءِ ۱۰۰ ملین پرچہ داشتگ انت ۔

اگاں کچھی کینال ءِ اولی بہر جوڑ کنگ بوتیں گڈا تنگہ وت بلوچستان ءَ بازین روزگارے ودی کنگ بوتگ انت ایشیءِ ہوار زمینی سُنگ ءِ درچ ءَ بلوچستان حکومت ءَ مزنیں مال ءُُ زرے دست کپتگ ات ۔

بلئے چوکہ اے کارءَ بلوچستان ءِ حاکمانی جندی ہچ نپ ءُُ سیت پمشکہ کسی گوش ءَ مورے نہ وارت ۔البت لہتیں ایم پی اے آں جاک ءُُ سلوات کتگ بلئے ایشاں ہچ وڑیں پلہ مرزی نہ رستگ دومی بلوچستان ءِ ہم پتیں پارٹی پرے کارا ں بنجاہی حکومت ءُُ برزی حاکماں دلگران ہم کنگ نہ لوٹ انت کہ باندہ آہانی جندی کارے ھراب مہ بیت ۔اگاں کہ بلوچستانَ ءَ کٹ ءُُ مال ءِ ودی کنگ ءِ مزین کچ ءُُ کساسے ہست انت ۔

بلوچستان چہ مادن ءَ سربار انت دمگ ءِ مسترتیاب ہم بلوچستان ءَ انت ادا کشت ءُُ کشار ءَ مال داری مزنیں آسراتی ہست انت بلوچستان حکومت دمگ ءِ کٹ ءُُ مال ءَ گیش کنگ ءَ چہ اے آسراتیاں نپ ءُُ سیت زرت کنت ءُُ دگہ نوکیں پیش بندی کرت کنت ۔