کوئٹہ: بلوچستان کے ضلع شیرانی میں ٹریفک حادثے میں پاک فوج کا اہلکار جاں بحق جبکہ دو ایف سی اہلکار سمیت چار افراد زخمی ہوگئے۔ ڈھاڈر میں ٹریکٹر سے گر کر ایک شخص جاں بحق ، مچھ میں ٹریفک حادثے میں پانچ افراد زخمی ہوگئے۔ 

لیویز ذرائع کے مطابق شیرانی کے علاقے حسو بند کے قریب لکی مروت سے ڑوب جانے والے ٹرک اور گجرات سے کوئٹہ آنے والی بس میں تصادم ہوا۔ حادثے کے نتیجے میں پاک فوج کے اہلکار انتیس سالہ سپاہی نصیر الدین جاں بحق جبکہ ایف سی اہلکار لانس نائیک عامیر نواز اور سپاہی طارق علی ، ڈرائیور غلام عباس اور کنڈیکٹر محمد قیصر زخمی ہوگئے۔ 

زخمیوں کو سی ایم ایچ ڑوب اور سول ہسپتال ڑوب منتقل کردیاگیا۔ متوفی اہلکار کی لاش آبائی علاقے جہلم روانہ کردی گئی۔ ادھر ڈھاڈر میں ٹریکٹر سے گر کر ایک شخص کی موت ہوگئی۔ جبکہ مچھ میں ٹریفک حادثے میں پانچ افراد زخمی ہوگئے۔