اکرام صاحب خان بلوچی نبشتہ کارانی اولی دور ءِ مردمانی سرپ ءَ ہواریں مردمے ءُُ ہما مردماں ہوار انت کہ آہاں یکشل ءَ نبشتہ کتگ ۔اکرم صاحب خان گیشتر تژن ءُُ کند ءِ پڑ ءَ نامدار بوتگ بلئے آئی ءِ لبزانک ءِ ایندگہ پڑاں ہم کار کتگ آء ءِ مستریں کار پسنی ءِ ورناہانی دلبڈی ءُُ ماں پسنی ءَ لبزانکی چست ءُُ ایرانی کماشی کنگ بوتگ ۔

اکرم صاحب خان ءِ پت ءِ نام میر صاحب خان ات ۔میر صاحب خان وت پسنی ءَ یک ازم ءُُ لبزانک دوستیں مردمے بوتگ کہ آئی ءِ چیر دستی ءَ پسنی ءِ بازیں کسمانکی مراگش ہم برجاہ دارگ بوتگ انت ہمے ردوم ءِ آسر ءَ اکر م صاحب خان ءَ ہم لبزانک ءِ پڑ ءَ ہُب دلگوش ودی بوت کہ 1970 دہگ بگرداں وتی گڈی ساہتاں گوں لبزانک ءُُ بندوک ات ۔

2017 ءَ وہدے بلوچی اکیڈمی ءَ بلوچی تژن ءُُ بچکند ی مراگشے برجاہ داشت گڑا اکرم صاحب خان ءَ وتی پیراں سری ءُُ نادراہی ءَ ابید ہم اے مراگش ءَ بہر زرت کہ اے آئی ءِ گڈی مراگشاں یکے ات بقول ، مردمے کینسر ءُُ سل ءِ نادراہی چہ ازل ءَ بلوچ شاعر ءُُ کلمکارانی دشمن انت ہمے وڑا واجہ اکرم صاحب کان ہم کینسر ءِ نادراہی ءَ وتی ہرجان کت ۔

اگاں کہ کینسر اے وہد ءَ دنیا ءَ چشیں ناعلاجیں نادراہی یے نہ انت بلئے بلوچ ءِ ناکسی ءُُ نادزرسی ءَ بلوچ بیست ءُُ یکمی کرن ءَ ہم کینسر ءِ دست ءَ ناعلاج کتگ ۔اکرم صاحب خان ءِ مرگ پہ بلوچی وانوک ءُُ نبشتہ کنوکاں مزنیں تاوانے کہ آئی ءِ کنڈ ءِ گرگ گران انت ۔

اکرم صاحب خان بندر ءَ یک ڈرائینگ ءِ سوجکارے ات کہ اے پڑ ءَ بلوچی زبان ءِ نامداریں شاعرءُُ ازمکار واجہ زبیر مختار ءُُ ظہور راج آئی ءِ نام کشیں سوجگر انت ایش ءَ ہوار اکرم صاحب خان ءَ اد اکاری ءُُ صدا کاری ہم کتگ اے درگت ءَ آئی ءِ جندءِ اداکاری ءَ یک تامرے شگام ءُُ رگام ءِ نام ءَ 90دہک ءَ ہم جوڑ کتگ کہ تنگا شنگ ءُُ تالان نہ بوتگ ۔

تامر ءُُ فلماں ہوار اکرم ءَ لیب ءُُ گوازی ءِ ہم مزنیں پلہ مرزی کنوکے ات ۔پہ گچینی کرکٹ ءَ سک باز ہدوناک ات پسنی ءَ آئی ءِ جہدانی برکت ءَ کرکٹ ءِ گوازی بنا کنگ بوت کہ روچے مرچی برجاہ انت ۔

کرکٹ ءَ ابید اکرم صاحب خان ءِ جہد ات کہ پسنی ءِ ورنا لبزانک ءِ نیمگ ءَ بیا انت یا لیب ءُُ گوازی ءِ 70 ءِ دہک ءِ گڈ سرا اکرم صاحب خان ءَ واجہ غفارپرویر ءِ ہمراہی ءَ یک تاکبندے(شبینگ) چہ پسنی ءَ شنگ کت کہ آئی ءِ چاپ ءُُ شنگ ءِ آسراتی نہ بوہگ ءِ سوب ءَ آہاں اے تاکبند دست ءِ سرا نبشتہ کت ءُُ شنگ کت ۔ہمے تاک ءِ چاپ ءُُ شنگ کنگ ءَ پسنی ءُُ لبزانکی جنزے بنا کت کہ آسر ءَ مبارک قاضی ءُُ دگہ ورنائیں شائر ءُُ لبزانکار دیم ءَ اتک انت ۔

مرچی پسنی بلوچی لبزانک ءِ پڑ ءَ امیر تریں جاہ ءُُ دوار زانگ بیت ۔اکرم صاحب خانءِ اے وہد ءَ سے کتاب چاپ ءُُ شنگ بوتگ انت ،یات ءُُ سوگات کہ بلوچی اکیڈمی ءِ نیمگ ءَ چاپ بوتگ ،کہ بلوچی عشقی داسپانانی سرا انت ایشیءَ ہوار ،تژن ءُُ بچکندی شعری دیوان ،’’گواتی ءِ مات‘‘،کہ ناکو تیاب دپی ءِ کلمی نام ءِ سرا شنگ بوتگ ات ءُ بلوچی زبان ءِ اولی تژن ءُُ بچکندی شعری دیوان انت ۔

آئی ءِ سیمی دیوان ’’پد گوانک ‘‘ انت ایشیءَ ہوار آئیءِ چارمی کتاب ،’’چانگال ‘‘انت کہ سرجم انت بلئے تنگا چاپ ءُُ شنگ نہ بوتگ ۔اے کتاب سرتاک بلوچی زبان ءِ مزن نامیں شاعر ءُُ ازمکار واجہ زبیر مختار جوڑ کتگ ءُُ امیت انت کہ آئیءِ مرگ ءَ پد نوں اے کتاب زوت چاپ ءُُ شنگ کنگ بیت ءُُ تنکہ بلوچی تژن ءُُ بچکندی شعری مڈی ءَ گیش نہ بیت ءُُ اکرم صاحب خان وانوک ءُُ لوٹوک چرے کتاب ءَ وت ءَ آئی ءِ گماں پراموش کت بکن انت ۔15 دسمبرجمعہ روچ پہ بلوچی زبان ءَ مزنیں تاوانے۔۔۔۔