بلوچستان ءِ حکومت وتی وتی سیاسی جیڑگاں گوں انچو مشگل اَنت کہ آہاں ہچی سما نیست انت کہ وانگ ءِ کچ ءُُ کیل چنچو دیم ءَ شتگ۔یک وہدے انچیں بوتگ کہ پہ کزا یکے ءَ ماسٹرز کتگ ءُُ وتی سرجمیں ہلک ءَ یکیں ماسٹرز کنوکیں مردم ہما بوتگ بلئے نوں دود بدل بوتگ۔

نوں ہلک وَ دور انت بلکیں یکیں لوگ ءِ درائیں مردماں ماسٹرز کتگ ءُُ انگت ءَ بے روزگار اَنت ۔بے روزگاری ءِ جیڑگ بلوچستان ءِ مستریں جیڑگاں چہ یکے ایشیءِ شاہدی ءَ بازیں وڑے ءَ بوت کنت بلئے کلاں مستریں شاہدی ءَ اے بس انت کہ یک وہدے بوتگ کہ پی سی ایس ءُُ سی ایس ایس ءِ نام گپتگ مردم ابکہ ءُُ حیران بوتگ اَنت کہ اے چکاس ءَ کسے چون ءُُ چتور سوبمندی بوت کنت ۔

بلئے نوں جاور ایش انت کہ ہردو چکاسانی چکاس دیوک حساب نہ بنت اگاں چہ پوسٹانی جند اتکگیں سے ءُُ چار انت ۔گواستگیں سال ءَ ہمے چکاساں نودربرانی کچ ءُُ کیل سے ہزار ءَ برز بوتگ امبری ہم جاور ہمیش انت ۔

چش پرچکہ ؟بلوچستان ءَ وانوک باز انت؟ اِناں۔۔۔۔بلکیں بے روزگار ی ءَ ہمک وڑیں پوسٹے بئیت انت نودربر آئی ءَ وتی وتی فارماں ہم دور دئینت گوں کہ بلکیں بحت پاد بئیت ءُُ نوکری یے برسیت ۔اے حکومت ءِ نزوری انت کہ آئیءَ بے روزگاری داشت نہ کتگ بلئے مدام مجلس ءُُ دیواناں گلو ءَ برز کن اَنت ءُُ گشنت کہ ما بلوچستان ءَ را دیمروئی داتگ ،دیمروئی اے چیز ءِ نام اَنت ۔

روزگار نہ بوہگ ءِ سوب ءَ چیزے مردم ءَ وتی دیم گوں فلسفہ ءِ وانگ ءَ داتگ بزاں ایم فل ءُُ پی ایچ ڈی یک رندے وتی یک دوستے ءَ را من پہ مزاک ءُُ چیوا جست گپت کہ ہمے ایم فل ءِ سرجمیں رنگ چے اِنت ؟ داں آئیءَ پسو دات نہ کت بلئے نوںآئی ءَ وتی ڈگری اوں گپتگ ءُُ آوکیں وہد ءَ پی ایچ ڈی ءَ ہم ایڈمیشن زوریت ۔گوستگیں سے ایں سالاں مزن شاہدربرجاہ کوئٹہ ءَ وتی درائیں ڈیپارٹمنٹاں ہور دو ہزار ءَ برز مردم ایم فل ءُُ پی ایچ ڈی کنائینتگ ۔

آ ملک ءَ کہ دو ،سے سالانی نیام ءَ دو سے ہزار ایم فل ءُُ پی ایچ ڈی دربئیت بائد آ ملک کسی چمدار مہ بیت ۔بلئے ایم فل ءُُ پی ایچ ڈی ءِ ایوک ءَ ڈگری بہر کنگ ءَ ملک دیمروئی نہ کنت ۔اے شاہ دربرجاہ ءَ ایوک ءَ ڈگری بہر بوہگ ءَ انت ،نودربراں روزگار نیست پمشکا پہ وہد پاسی ءَ ایم فل ءُُ پی ایچ ڈی ءَ ایڈمیشن زور انت ءُُ ہما کہ نوکر اَنت آ ایوک ءَ وتی پگار ءِ گیش کنگ ءَ اے ڈگریاں دست گراں ۔

اگاں دیم سیائی یے بوہگ ءَ انت ایو ک ءَ ملک ءِ بوہگ ءَ انت کہ آئی ءَ انچو ڈگری وَ بہر کتگ بلئے اے ڈگری گروکاں یکے اوں ایشانی لاحق نہ انت ۔یکیں کوئٹہ ءَ باریں چنت سد ایم فل ءُُ پی ایچ ڈی اسکالر است انت پمشکا گوں حکومت ءَ باید لوٹ کنگ بہ بیت کہ اے شہر ءِ نام کہ یکے وہدے لیٹل لندن ءُُ پیرس ایرکنگ بوتگ اَنت نوں اے شہر ءِ نام ءَ بدل کنگ ءُُ اسکالر انی شہر کنگ بہ بیت ۔

پرچکہ اسکالر بلکیں اے شہر ءَ است ءُُ پہ پہر وت اسکالر ءُُ ڈاکٹر ءَ نام ءَ توار کن اَنت بلئے ایشانی تہا زانت ءُُ زانگ نیست ،نہ اخلاق است ،نہ کردار است ،نہ کہ راجے ءِ دیمروئی دئیگ ءِ شور ءُُ صلہ یے است ۔ایوک ءَ اسکالرانت ۔پدا کلاں گیش اگاں اسکالرے است گڈا آ لینگویج ءُُ لٹریچر ءِ کدگاں است انت اے دگہ کدگاں انگت ءَ بھرتی جاری اِنت۔