ساچینک ءِ گوستگیں دوشونگالاں بلوچستان ءَ گچینی کوئٹہ ءَ کتاب جاہانی نگیگیں جاورانی بابت ءَ نبشتہ کنگ بوتگ ءُُ چدو پیسر بلوچستان ءِ وانندگیں مردمانی یک ڈلے ءَ گوں دود ءُُ ربیدگ ءِ سیکریٹری ءَ گندونند ءُُ کرتگ ات ءُُ آئی ءَ را بلوچستان ءَ ہوار کوئٹہ شہر ءَ کتاب جاہانی جاور حالانی بابت ءَ سہی ءُُ سرپد کتگ ات ۔

ہمے درچ ءَ بی ایس او پجار ءُُ بلوچ اسٹوڈنٹس ایکن کمیٹی ءِ نیمگ ءَ روتاکاں اے حال شنگ بوتگ اِت انت کہ کوئٹہ شہر ءَ کتاب جاہانی نندگ ءِ شریں وڑ ءُُ پیم ءُُ جاہ ءُُ ہند نیست ۔ہمے وڑا 22دسمبر ءَ پی ٹی وی بولان ءِ کرنٹ افئیر ٹائم ءَ ہم ہمے جیڑہ ءِ سرا یک مراگشے برجاہ دارگ بوتگ ات کہ آئی ءِ تہا حالکار ،زانتکار ءُُ نودربرا ں ہوار بلوچستان ءِ مزن نامیں راجکار واجہ نواب زادہ حاجی لشکری رئیسانی ءَ ہم بہر زرتگ ات ۔

اے مراگش ءَ حاجی لشکری رئیسانیءِ گشگ ایش ات کہ آ کتاب دوست جنز ءِ رِدا درائیں بلوچستان ءَ وتی جندی جہدءُُ کوشتانی پشت ءَ کتاب بہر ءُُ بانگ کنگان انت بلئے بلوچستان ءَ ہر جاہ ءُُ ہند ءَ کتاب جاہ نہ بوہگ ءِ سوب ءَ کتاب مہلوک ءَ آوڑا سربوہگ ءَ نہ انت چوکہ بوہگی انت ۔

آئی ءِ گشگ ات کہ بلوچستان ءَ بیوروکریٹس ءُُ راجکار ہچ وڑا نہ لوٹ انت کہ بلوچستان ءَ کتاب ءِ ربیدگ دیمروئی بکنت پمشکہ بازین مردم ،زانتکار ءُُ ادارگانی جہداں ابید ہم کتاب ءِ ربیدگ دیمروئی کنگ ءَ نہ انت ۔دومی دست ءَ بازیں ڈلانی گوں ربیدگ ءِ سیکریٹری ءَ گند ءُُ نند ءَ پد ہم اسپینی روڑ ءِ کتاب جاہ پچ کنگ نہ بوتگ کہ ربیدگ ءِ سیکریٹری ءَ کول کتگ ات ۔

چوکہ قائد اعظم کتاب جاہ ،صادق کتاب جاہ ءَ پہ نودربراں جاہ ءُُ ہند نیست اے کمی ءَ اسپنی روڑ ءِ مزنیں ھالیگیں ماڑی پُر کت کنت کہ اے وہد ءَ پہ ہچ کار ءَ کارمرز بوہگ ءَ نہ انت ۔ اگاں ربیدگی وزیر ءُُ سیکریٹری بلوٹ ات پہ حکومت ءَ اسپنی روڑ ءِ اے ماڑی ءَ پہ کتاب جاہ ءَ کارمرز کنگ گرانیں کارے نہ انت ۔

اگاں ہمے ماڑی پیش ءَ وہدے قائد اعظم کتاب جاہ نوک بندگ بوہگ ءَ ات گڈا ہمے ماڑی پہ کتاب جاہ ءَ کامرز بوہگ ءَ ات بلئے وہدے قائداعظم کتاب جاہ جوڑ بوت گڈا اے ماڑی بند کنگ بوت اگاں دمگی حکومت ءِ لہتیں کارندا بدار ایت گڈا ے ماڑی پہ کتاب جاہ ءَ جوانیں جاگہہ یے کہ چریشی ءَ صادق کتاب جاہ ءُُ قائد اعظم کتاب جاہ ءِ بار کم کنگ بوت کنت ۔

دگہ گپے ایش انت کہ قائداعظم کتاب جاہ ءَ پد کوئٹہ ءَ دومی کتاب جاہ سنڈیمن کتاب جاہ انت کہ اگاں کہ پچ انت بلئے کتاب جاہ ءِ بند ءُُ بوج کنوک وت چہ اے کتاب جاہ ءَ کار گرگ ءَ نہ اَنت کہ آوڑا لوٹ ایت ،یکے وت اے کتاب جاہ ءِ بندوبوج کنوکاں جار پرینتگ ات کہ ایشاں رجسٹریشن یکم جنوری بگرداں پانزدہ جنوری ءَ برجاہ مان ایت ۔

اے وہد ءَ ہرچ نودربرے کہ پہ رجسٹریشن ءَ روت آہاں گشگ بیت کہ رجسٹریشن ہلاس بوتگ بلئے دومی دست ءَ رجسٹریشن ءِ ہلاس بوہگ ءَ پد کتاب ءِ جاہ تروتاب ءَ رؤکیں مردمانی گشگ ایش انت کہ سنڈیمن کتاب جاہ کوئٹہ ہر روچ سی ءُُ چل کرسی ھالی اَنت ءُُ کتاب جاہ ءِ بندوبوج کنوکانی گلہ ایش انت کہ مردم ءُُ وانوک وت کتاب جاہ ءَ پہ وانگ ءَ نیا اَنت بلئے اے وہد ءَ آہاں وت جار پرپینتگ کہ رجسٹریشن برجاہ انت بلئے دومی نیمگءَ ورناہاں پہ رجسٹریشن ءَ باسکی کار ڈ دئیگ ءَ نہ اَنت ۔

چریشی ءَ قائداعظم کتاب جاہ ءِ بار کم بوہگءَ نہ انت ۔اگاں دمگی حکومت ربیدگ ءِ وزیر ءُُ سیکریٹری پہ سنگینی اے جیڑہ ءَ دلگوش اَنت گڈا بائد انت کہ سنڈیمن کتاب جاہ ءِ رجسٹریشن ءِ ھاترا کوئٹہ ءِ ہندی حکومت ءَ کھڈن بکن انت ۔

دومی اسپنی روڑ ءِ ماڑی کہ بندر ءُُ وت پہ کتاب جاہ ءَ جوڑ کنگ ءُُ بندگ بوتگ کہ آئی ءِ تہا چہ قائداعظم کتاب جاہ ءَ گیشتر جاہ ءُُ گنجائش است وانگی ٹیبل ءُُ کرسی مان کنگ بہ بیت تنکہ کوئٹہ شہر ءِ نودربر پہ وانگ ءَ شپ جاہ ءُُ روچ جاہ مہ بنت دومی وانگ ءُُ زانگ سیکریٹری وزیر بائدیں کوئٹہ شہر ءَ ہوار درائیں بلوچستان ءِ جنک ءُُ بچکانی کالجانی پرنسپلاں کھڈن بکن انت کہ آ کالج ءِ وہد ءَ ہوار بیگاہ ءُُ شپ ءَ کالجانی کتاب جاہاں پچ بکن انت۔

بلکیں پرنسپلاں بگش انت گرماگ ءُُ زمستانی موکلانی وہدءَ ہم اے کتاب جاہ بوجگ بہ بنت دانکہ نودربر وتی گیشتریں وہد ءَ کتاب جاہاں بگوازین اَنت ۔اگاں دمگی حکومت ءَ ہوار ربیدگءُُ وانگ ءُُ زانگ ءِ وزیر ءُُ سیکریٹریاں اے بابت ءَ گامگیج زرت گڈا زانگ بیت کہ دمگی حکومت پہ وتی تعلیمی ایمرجنسی ءَ سنگینی ءَ دلگوش دئیگ ءَ انت۔