نوکیں سر وزیر واجہ قدوس بزنجو ءَ وتی اگدگ ءِ آیگ ءَ گوں بلوچستان ءِ ہما جیڑہ کہ گوستگیں بازین سالاں ہما وڑ دنزءُُ گباراں بوتگ اَنت چماہاں چہ کار بندات کتگ ۔من باز ندیستگ بلئے اے منی ہوش ءُُ سما ئے گپ اِنت کہ یک سر وزیرے وتی اگدگ ءِ اولی روچاں گوں کاراں دزگلائش بہ بیت ۔

نوکیں سر وزیر ءِ کاراں ہرکس کہ چار ایت آئی ءَ انڈین تامر ءِ بامرد انیل کپور گیر کیت کہ آئی ءَ را یک روچے ءِ اگدگ رسیت ءُُ آ ہما کاراں کنت کہ یک سروزیری ءَ را کنگی بنت ۔ انوگیں سر وزیر ءَ وتی بنداتی روچاں بنجاہی شہر کوئٹہ ءِ بازیں جاگہاں دورا کتگ ءُُ لس مردمانی حاترا کچیری یے ہم جوڑ کتگ ءُُ وت مردمانی جیڑہانی گیشوارکنگ ءِ جہد کنگ ءَ انت ۔

اے یک نوکیں جہدے کہ ستا کرزیت ءُُ ہمے زوتاں سروزیر ءِ چیزے نوکیں جار جنی پہ بلوچستان ءِ مردماں جوان اَنت ،نوکیں ضلع آنی جوڑ کنگ ہمے جاراں ہوار اِنت ۔اگاں بلوچستان ءِ سر وزیر بلوچستان ءِ بے روزگاریں ورناہاں پہ کارے ءِ جار ءَ بجنت داں آئیءِ کم وہدیں اگدگی ءِ اے مستریں کارے بوت کنت ،پرچکہ پیسریگیں سر وزیر اے کار ءَ بے سوب بوتگ اَنت ۔

گوستگیں رند ءَ حکومتی جار ے ءِ پدءَ بلوچستان ءَ بے روزگاریں ورناہانی کچ ءُُ کساس ششت ہزار ءَ برز انت ،ہما کہ سر زاہر انت آ سی ءُُ ہپت ہزار ءَ برز اَنت ،ہما کہ ہساب ءَ گون نہ بوتگ اَنت آ بئے نہ اِنت ءُُ اے دوئیں سالاں دگہ بازیں نودرے چہ وانگ ءُُ زانگ ءَ پارگ بوتگ ءُُ ہمے بے روزگارانی رم ءَ ہوار کپتگ اگاں آاوں حساب ءَ ہوار کنگ بہ بنت ۔

داں بلوچستان ءَ بے روزگاریں ورناہانی کچ ءُُ کیل ہزاراں نہ بلکیں لکھاں بوت کنت ،پدا بلوچستان ءِ اے دگہ قوم پشتو ن ،ہزارہ ،پنجابی ،سندھی،ہندو آ بئے نہ اَنت۔ مرچاں ہمک پوسٹے آ تُری ہپدہ ءُُ ہژدہ اسکیل ءِ بہ بیت یاکہ پنچ ءُُ شش ، اسکیل ئے پوسٹ ءِ جمع کنوکانی کچ ءُُ کیل مودام ہزارانی تہا اِنت ۔

چریشی ءَ وت پدرا انت کہ بلوچستان ءَ بے روزگاری چنچو گیش بوتگ ۔واجہ قدوس بزنجو یک شیواریں مردمے آئی ءَ را اے اگدگ بہہ دست نہ کپتگ ءُُ نیکہ آ انچو سیاسی سرءُُ پُراں گندگ بوتگ بلئے آئی ءِ اے سمائی است انت کہ ملک ءَ چے بوہگ ءَ انت ءُُ بلوچستان ءَ بلوچ مرچی کجام جاوراں گوں دوچار اِنت ۔

بائد آ درائیں انان ءَ گوں ہمے جاوراں بہ کنت ءُُ ہمے ڈول ءَ وتی گامگیجاں بدار ایت ،بلوچ ءَ را چنائی ءَ توسیپ نہ ساچیت ما بائد سروزیرءِ انچو توسیپ ءَ مہ کناں بلئے کسے کہ شریں کارے کنت آ بے ستا ءُُ توسیپ ءَ نہ بیت ۔ بلوچستان ءَ این ٹی ایس ءِ چکاس بندکنگ بوتگ انت بلئے دگہ بازیں پی ٹی ایس ءُُ بی ٹی ایس ءُُ باریں چے چے چکاسگر جوڑ کنگ بوہگ ءَ انت ،بلئے اے چارگ بہہ نہ بیت کہ پوسٹ گیش کنگ بہ بنت ۔

بلکیں اے اوں چارگ نہ بیت کہ پوسٹانی بہر ءُُ بانگی چون ءُُ چے رنگ ءَ بوہگ ءَ انت پرچکہ پوسٹ وَ ہمک روچ جنگ اخبار ءَ مان ،بلئے درائیں پوسٹاں سرپدی ایں(Exprience )مردمانی لوٹ کنگ بیت برے دو سال ،برے سے ءُُ چار ءِ (Exprience ) ءِ لوٹ کنگ بیت کہ بلوچستان ءَ نیست اِنت چریشی ءَ کس پوسٹاں جمع نہ کنت ءُُ چمداں سفارش ءُُ دونمبری بندات بیت یا وَ ہما پوسٹاں ڈنی مردم زورگ بنت یاکہ اے پوسٹ بہا کنگ بنت ،پرچکہ دوبر اے پوسٹانی پدا گواہ نہ بیت ۔بائد واجہ سر وزیر اے بابت ءَ چار ءُُ بچار بکنت ءُُ اے جیڑہ ءِ زوتاں چہ زوت گیشوار ءَ بہ کنت ۔

ہمے زوتاں سر وزیر واجہ قدوس بزنجو تربت ءِ ترو تاب ءَ شتگ ءُُ مز ن شاہ دربر تربت ءَ نودربرانی لیپ ٹاپ بہر ءُُ بانگ ءَ پد واجہ ءَ لا کالج ءِ حاترا پبللک لائبریری ءِ جاگہ بکشتگ کہ اے گامگیج بلکیں لا (law)ءِ نودربراں دوست بہ بیت بلئے سرجمیں راج ءَ را ے گامگیج دوست نہ بوتگ پرچکہ پُریں تربت ءَ یکیں سرکاری لائبریری انت کہ کالج ءُُ یونیورسٹی ءِ نودربراں ابید اے دگہ درائیں اسکول ءُُ وانگجاہانی نودربرہمے لائبریری ءَ پہ وانگ ءَ کائینت ۔

اگاں اے لائبریری اوں لا (law) ءِ نودربراں دئیگ بہ بیت داں اے دگہ نودربر پہ وانگ ءَ کجا برواں ؟ اگاں اے جار ءِ جاہ ءَ واجہ قدوس ءَ نوکیں لا (law) کالجے ءِ جار بجتیں کہ المی اِنت داں را ج گیشتروش تر بوتگ اَت ءُُ پہ لا (law) ءِ نودربراں پبلک لائبریری ءِ الاٹ کنگ ءَ چہ مستریں سوگاتے اَت ۔

واجہ قدوس نیکیں پگرے ءَ گوں اے اگدہ ءَ کار کنگ لوٹ ایت بائدیں آ سیاسی نزوری مکنت ہما وڑ کہ بنداتی روچاں آئی ءَ کار وتی بندات کتگ اَت ہما رنگ ءَ دیم ءَ روان بکنت داں راج آئیءِ دوبر اوں رہچار بوت کنت ۔۔