رسانک در ءِ در ءَ سوشل میڈیا اے وہد ءَ مزنیں زورءُُ واکے ءِ واہند انت ۔علم ءُُ زانت ءِ در بہ بنت یا چاگردی جیڑہ، سوشل میڈیا ءِ مزنیں کرد ءُُ ارزشتے بلئے سوشل میڈیا ءَ بلوچستان ءَ آ کرد پیش داشت نہ کتگ کہ آئی ءَ کنگی بوتگ گوستگیں سے سالاں اگاں سوشل میڈیا گروپس چارگ بہ بنت گڑازانگ بیت کہ گیشتریں گروپساں بلوچستان ءِ جیڑہانی بدل ءَ گیشتر ہما جیڑہ بنگپ ءُُ سرحال کتگ انت کہ آہانی سیادی گوں بلوچ ءُُ بلوچستان ءَ نہ بوتگ انت ۔

بلکیں بازیں بے سمائیں وڑے ءَ بلوچستان ءِ حلاپ ءَ بوتگ انت یا ہما جیڑہ بوتگ انت کہ آہاں وہدءِ حاکم ءُُ ملک ءِ کماشاں پہ مہلوک ءَ جیڑہ یے کنگ ءِ جہد کتگ بزاں اے وت بندر ءَ مہلوک ءِ جیڑہ نہ بوتگ انت پمشکہ اے جیڑہانی گیشتریں بہر ءُُ ونڈ چہ ملکی میڈیا ءَ زورگ بوتگ انت کہ چہ آہاں بلوچ ءُُ بلوچستان ءَ ہچ وڑیں نپ ءُُ سیتے نہ رستگ ۔

البت لہتیں گروپساں علمی ءُُ لبزانکی بن گپانی سرا وتی حیال ءُُ لیکہ درشان کتگ انت بلئے ادا یک گپے است انت کہ مہلوک چہ سوشل میڈیا ءَ وانگ ءُُ نبشتہ کنگ ءَ آوڑا ہیل کار نہ انت چوکہ گوں کتاب ءُُ روتاک یاکلم ءُُ کاگد ءَ انت۔

پمشکہ سوشل میڈیا ءَ آوڑین سیاہگ وانگ ہم نہ بنت کہ کتاب حالتاک ،تاکبند ءُُ روتاکاں مردم وانگ ءَ عادت انت پمیشکہ مردم گشت کنت کہ سوشل میڈیا تنگہ آوڑیں سان ءُُ ناسے دور نہ داتگ کہ حقی ئیں میڈیا ءَ داتگ دومی مردمانی سوشل میڈیا ءِ بابت ءَ اے گمان ات کہ اے چٹ آزات ءُُ آجو انت بلئے سوشل میڈیا ءِ لہتیں سالانی ٹپاس ءَ پد اے گپ دیم ءَ آتکگ کہ ادا ہم پکائیں آزاتی ءُُ آجوئی ءِ راہ ءُُ در نیست انت یکے وَ ایش کہ ایڈمن تاک ءُُ ماہتاکانی سوشکا ر ءُُ واہندانی وڑا ایوکا ہما پوسٹانی اجازت ءَ دئینت کہ آہانی لیکہ ءُُ پگری تب ءَ بہ بنت ۔

ادا اوں ایڈمن ہما مردماں بلاک یاان فرنڈ کن انت کہ آہانی دل ءِ تب ،پگری ءُُ لیکہی حیال ءِ چپ بہ بنت سوشل میڈیا گروپساں اے گندگ بوتگ کہ کجام ہم بن گپے ءِ سرا ان بکس یا پدا ٹیلی فون ءِ سرا وتی ہم حیالیں سنگت ءُُ مردماں مجبور کنگ بیت کہ دومی لیکہ داروکیں مردم ءِ پوسٹ ءِ سراگپ ءُُ حبر یا لیکہ درشان کنگ مہ بیت یا اگاں بیت گڑا ردیں یا ایر جنی حیال ءُُ لیکہ درشان کنگ بہ بنت ۔

چرے کاراں سوشل میڈیا ءِ ہما بستار ءُُ ارزشت ہلاس بیت کہ آئی ءِ بابت ءَ مردمانی گمان بوتگ ۔ اگاں سوشل میڈیا گروپس لوٹ انت کہ سوشل میڈیا گروپس مہلوک ءِ سراسان ءُُ ناسے بیار انت گڑا گروپسا نی ایڈمناں وتی تب ءُُ رو بدل کنگ لوٹ ایت تنکہ مردم اے گمان ءَ مہ بنت کہ گروپسانی درائیں باسکاں یکیں چماں چارگ نہ بوہگ ءَ انت یا گروپسانی ایڈمن ایوک ءَ لہتیں لیکہ ءُُ حیال ءُُ گچین جیڑہاں دیم ءَ آرگ لوٹ انت کہ آہانی نپ ءُُ سیت لس مہلوک ءِ بدل ءَ حاکم ءُُ حکمراناں رس ایت ۔

دومی سرکار ءِ نیمگ ءَ ہم جنزے بنا بوتگ کہ ہمک سال ہزاراں ورنا پہ سوشل میڈیا ءَ لیکہ سازی ءِ حاترا ہیل دئیگ بنت کہ آہانی کار سوشل میڈیا ءَ ریاست ءُُ حاکمانی لیکہانی دیمروئی دئیگ انت ۔