واجہ صدیق بلوچ سیاسی جہد ءِ ہما دومی اوبادگ ءِ مردم اَت کہ آئی ءِ سیادی برٹش آزادی کہ آئی ءِ کماشی محمد حسین عنقا ،یوسف عزیز مگسی ،میر عبدالعزیز کرد ءَ گوں ایندگہ سنگتاں کرتگ ات۔

دومی اوبادگ ہما ات کہ آ بلوچستان ءِ برٹش آزادی ءِ جہد ءَ پد پاکستان ءِ جوڑ بوہگ ءَ گوں ،گون کپتگ اَنت ۔پاکستان ءِ جوڑ بوہگ ءَ پد صدیق بلوچ گوں ایندگہ بلوچ ورناہاں بلوچ ءِ رای آجوئی ،سیاسی ءُُ معاشی وشحالی ءِ جہداں دزگٹ بوت۔

یک گپے گیر آرگی انت چہ صدیق بلوچ ءَ پیسر ہم واجہ صدیق بلوچ ءِ آرپیں پت میر جنگیان کراچی ءَ بلوچ جہدکارانی مزنیں دلبڈی کنوکیں مردمے ات ۔

گچینی نودربرانی حاترا آئی ءَ پتی کنڈ گپت ۔آئی ءِ ہوٹل جنگیان ہوٹل پہ نودربرانی ہذمت ءَ مدام ساڑی ات ۔دومی لیاری وڑیں جاگہہ یے ءَ میر جنگیان ءِ مستریں تورو پہ وتی زہگاں ایش ات کہ آئی ءَ ہما زمانگ ءَ وانگ ءُُ زانگ ءِ ارزشت زانت ءُُ وتی درائیں زہگ وانگ ءَ دات انت ۔

واجہ صدیق بلو چءَ مدام وتی پت ءَ را نودربرانی مہر ءُُ دوستی درشان کنگ ءَ دیست گڈ اے گپ الم ءَ جت کہ آئی آرپیں پت ءِ عادت ات کہ سہب ءَ وہدے ہما زہگ کہ اسکول ءَ شت انت آہانی سہب ءِ ارزبند جنگیان ہوٹل ءَ مپت ات آئی ءِ گشگ ات کہ من اوں گوں براتاں سہب ءَ اسکول ءَ روگ ءَ ساری ہم جنگیان ہوٹل ءَ ارز بست ءُُ اسکول ءَ شتاں ۔

اے ہمے پت ءِ عادت ءُُ ہیل ات کہ مادیستگ ات کہ کوئٹہ ہچ روتاک ءِ واہند ءَ پہ کارداراں چاہ ءُُ چلم نہ کتگ کوئٹہ ءِ ہر چ روتاک ءِ کارگس ءَ کینٹین ہست ات کہ ہرچ کاردار چہ وتی کیسگ ءَ چاہ ءُُ چلم کت بلئے صدیق بلوچ داں حیات ءُُ زندگ ات آئی ءَ وتی روتاک آزادی ءُُ بلوچستان ایکسپریس ءِ درائیں کارند ءَ شپ ءِ شام ءُُ چلم دات ءُُ دگہ عادتے ایش ہم ہست ات ہمک رمضان ءِ گڈ سرا وتی روتاک درائیں کارندہاں دبوج ءُُ شام ءِ داوت دات واجہ صد یق سالے یکبرے آئی ءَ زلور وتی کارندہانی شام ءُُ داوتے کتگ اَت ۔کوئٹہ ءَ ہوار پاکستان ءَ ہچ جاہ ءَ یک روتاکی واہندے ءَ پہ وتی کارداں نہ کتگ۔

منی حیال ءَ اے انسان دوستی واجہ صدیق بلو چءَ چہ وتی انسان دوستیں مہراں سرباریں آرپیں پت ءَ رستگ ات ۔ واجہ صدیق بلوچ ءِ دو عشق ات انت یکے نبشتہ کنگ ءُُ دومی بلوچ ۔ہرکس ءَ کہ صدیق بلوچ نزیکی ءَ دیستگ ات آئی ءِ اے دوئیں عشقاں سہی ءُُ سرپد ات گوں بلوچ ءَ آئی ءِ عشق انچو جہل ءُُ گران ات کہ آئی ءَ ہچبر اے نچارات کہ بلوچ کج ئیگ انت ،کجام نسل ئیگ انت ،کجا پارٹی ئیگ انت کجام لیکہ ءُُ پگر ئیگ انت ۔

ہرچ بلوچ ءِ ہذمت ءُُ آئی ءِ دیم دراہگ پرائی عزت ءُُ میارے ات۔ آئی ءِ دومی عشق نبشتہ کنگ ات کہ صدیق بلوچ چہ نبشتہ ءَ شتگ بلئے آئی ءَ وتی اے عشق ءِ دیم ءَ وتی دستاں دور نہ دات البت کینسر گرانیں بار ءَ آ پیشگیں مردم نہ کتگ ات آئی دروشم ءَ باز کمزور بوتگات بلئے آئی ءِ اے نزوریاں نبشتہ ءِ عادت چرآئی ءَ پل ات نہ کت ۔

البت آئی ءَ ایش کت کہ پیش ءَ ریڈیو پاکستان کوئٹہ ہپتگے دو رند ءَ ملکی ءُُ دمگی جاورانی سرا چمشانک پرمات ءُُ ہپتگے یک ءُُ دو براں آ پاکستان ٹیلی ویژن ءَ کرنٹ افیرز ءِ پروگراماں شت گڈا آئی ءَ وتی نبشتہ ءِ عشق ءَ اے دوئیں کار یلہ دات انت ۔نادراہی ءَ پد ریڈیو ءُُ ٹی وی ءِ کارمسترانی بازیں منت ءُُ سماجت ءَ پد ہم آ اے مراگشاں نہ شت بلئے آئی ءِ عادت انگت است ات کہ بیگہ ءِ پنچ ءَ بگر داں شپ ءِ دوازدہ بج ءَ آ وتی کارگس ءَ نشت ءُُ کارے کت ۔ یک گپے اے گیر آرگی انت واجہ صدیق بلوچ اے دومی عشق ءِ سیادی گوں آئی ءِ اولی عشق ءَ ات ۔بزاں گوں بلوچ ءَ ۔۔۔

آئی ءَ بلوچ ءُُ بلوچستان ءَ نبشتہ کت ۔پریشی ملک ءِ حاکم چہ واجہ صدیق بلوچ ءَ سک نہ وش ءُُ نارزا ات اتن بلئے صدیق بلوچ نبشتہ کنگ ءُُ وتی گپ ءِ جنگ ءِ رہبند زانت انت ۔پمشکہ ملک ءِ حاکم ءُُ اختیار دار لاچار ات انت کہ اے مرد ءَ گوں چوں دوچار بہ کپاں ؟ واجہ ءَ مدام ریاست ءِ حاکمانی چمانی کنٹگ اَت بلئے 2010 ءَ پد آئی ءِ سرا اے حاکمانی زور ءُُ نہر گیش بوتگ ات انت پرچکہ روتاک ’’ آساپ‘‘ ءِ بند بوہگ ءُُ ’’ توار‘‘ ءِ درملک ءَ روگ ءَ پد ایوک روتاک ’’ آزادی‘‘ ءُُ ’’ بلوچستان ایکسپریس‘‘ پہ اے حاکم ءُُ اختیار داراں سردردے ءُُ جکانسری نیمونے ات انت۔

بلئے صدیق بلوچ گوں احوالکاری رہبنداں ہرچ وڑا بلوچ ءِ جیڑہ ءِ پدر کنگ ءَ اشانی دیم ءَ اوشتات گچینی وڑے ءَ وہدے 22دسمبر بلوچ جہدکاراں روتاکانی بائیکاٹ کت گڑا ملک ءِ حاکمانی نشانگ صدیق بلوچ ات اگاں کہ درائیں روتاکاں وتی تاک تہی بلوچستان ءَ دیم دئیگ بند کتگ ات بلئے حاکم ایوک صدیق بلوچ ءَ را ہر وڑا لاچار کنگ ءَ ات اتکہ بس یوک ءَ آ وتی روتاک ءَ دیم بدنت چوکہ صدیق بلوچ وت دُرچاریں مردمے ات پمشکہ آئی ءَ آہانی نیت پہم ات آمیاناں دیم ءَ جواب دات تانکہ ایندگہ روتاک وتی تاکاں دیم نہ دینت بلوچستان ایکسپر یس ءُُ آزادی ءِ تاک ہم نہ روت انت ۔

بلئے صدیق بلو چ مستریں جہد ءُُ جفا گوں گوں نیپ ءَ ہمکاری ات صدیق بلوچ برزی تبکءِ مردم نہ ات بلئے بلوچستان ءِ تروتاب بہ بنت یا سندھ ءُُ بلوچستان ءِ سیاسی جاور ، صدیق بلوچ مدام گوں ،غوث بخش بزنجو،سردار عطا اللہ ،نواب خیر بخش ءُُ اکبر خان بگٹی ءِ ہمکوپگ ءُُ ہمراہ ات ۔

وہدے غوث بخش بزنجو بلوچستان ءِ گورنر بوت گڑا آئی لالا صدیق بلوچ ءَ را وتی میڈیا ایڈوئیر گچین کت چوکہ صدیق بلوچ ءِ احولکاری ءِ مزنیں کتہ کار ءُُ ٹپاسے است پمشکہ غوث بخش بزنجو ءَ آئی ءَ را وت دزکشی کاگد نبشتہ کت ءُُ روتاک ڈان ءَ دیم دات ءُُ آ وتی ایڈوائزر نامینت ۔پدا وہدے درائیں بلوچ لیڈر بھٹو ءِ دزگیر کت انت گڑا واجہ صدیق بلوچ ہم گوں آہاں گون ات ۔

اے وڑا اگاں چارگ بہ بیت صدیق بلوچ ءِ زندمان بلوچ ءِ جہد ءُُ جفا ءَ گوست آئی ءِ گشگ ات کہ آئی ءِ جند روتاک ءِ درکنگ ءِ سکین آئی ءَ را غوث بخش بزنجو ءُُ سردار عطا اللہ مینگل ءَ داتگ ات ۔

اگاں آئی ءِ احوالکاری آئی ءِ لاپ ءِ جیڑہ بوت انت گڑاآئی ءِ ءُُ آئی ءِ چکانی لاپ ایوک ءَ آئی ءِ رپورٹنگ ءَ درکپتگ ات پہ لاپ ءِ حاترا گوں ملک ءِ حاکماں ہم پنجگ بوہگ ءِ ہچ زلورت نہ ات ۔

مرچی بلکیں ہمے حاکم ءُُ واکدار گل ءُُ شاد بہ بنت کہ بلوچستان ءُُ بلوچ ءِ توار دائمی سرپتگ ءُُ کپتگ بلئے آ بزان انت کہ واجہ صدیق بلوچ وتی پنجاہ سال ءِ احوالکاری جہد ءُُ جفا ءَ دگہ پنجاہ نودربر ودی کتگ کہ ماما صدیق بلوچ ءِ توار نوں بلوچستان ءِ دمگ ءَ درکپتگ ءُُ عالمی دمگاں سربوتگ ءُُ نوں اے توار یک گرندے ءِ دروشم ءَ انت کہ ابدمان انت’’ بس گوشے بہ بیت پہ اشکنگ۔۔۔۔‘‘