مدتے بیت کہ بولان میڈیکل کالج ءِ چکاس ءَ این ٹی ایس گرگان انت بلئے اے سال ءَ ہمے چکاس ءِ ڈبہ ایچ ای سی ءِ کوپگاں کنگ بوتگ ۔بلئے زانگ انت کہ ایچ ای سی ہم سرکاری یک ادارگے ءُُ سرکاری اے دگہ درائیں اداگانی حساب ءَ اے ہم ناشری ءُُ نا رہبندیانی آماچ انت ۔پمشکا اے چکاس ءَ ہم انچیں کار ءُُ کرد دیم ءَ اتکگ کہ نودربراں وتی زار شانی درشانتگ ءُُ ایچ ای سی ءِ رزلٹ نہ منینتگ ۔

نودربرانی گشگ ہمے بوتگ کہ چکاس ءِ نیام ءَ دُزی ءُُ موبائل فون ءِ کارمرزی کنگ بوتگ ہما نودربراں کہ ے دُزی ءُُ ناشری ءِ حال ہما چکاس گراناں داتگ داں آہاں ہما ناشری ءِ حال دئیوکیں نودربر بیہار داتگ اَنت کہ اگاں آہاں وتی پیپر دئیگی انت کہ داں انچو حاموشی ءَ بہ نند انت ۔وہدے رزلٹ ءِ آسر دیم ءَ اتکاں داں ھفتاف درسد ءَ گیش مردم فیل کنگ بوتگ انت ءُُ میرٹ ءِ سرجم ءَ پادمالی کنگ بوتگ اَت ۔

نودربرانی زارشانی کنوکاں وتی فریات سی ایم ءَ را سرکتگ اَت بلئے آئیءِ نیمگ ءَ چشیں حالے نہ شت کہ ایشانی زار شانی سارت تر بہ بیت مروچی آ چکاس ءَ پُریں سے ہفتاد بوہگ ءَ انت بلئے انگت ءَ ہچ وڑیں آسری بیانے سرکار ءِ نیمگ ءَ چہ دئیگ نہ بوتگ ۔اے گپ انچو بے دلگوش کنگ بوہگ انت انچوکہ تربت یونیورسٹی ءِ نودربرانی فیلی ءِ حبر بے دلگوش کنگ بوتگ اَت ۔

وہدے ہمے نودربر وتی ایمنیں زارشانی ءِ بدل ءَ روڑ ءُُ دگاں درکپاں داں سرکار ایشاں جنت ءُُ زنداناں بندیگ کنت کہ اے وتی ناشریں مردم بوتگ اَنت ۔حق جنی ہما جاہ ءَ کہ بیت آہود ءَ الم وتی توار چست کنگ بیت بلئے اوئے بلوچانی بحت ءُُ تالہ کہ مئے درائیں حاکم ءُُ رہشون ازلی کَر ءُُ گنگ اَنت آ نا یکے ءِ فریات ءَ اِش کت کناں ءُُ نیکہ دیم ءَ گپے کت کناں ۔۔۔۔’’

بلئے است حدائے کہ نامے رحمن انت ‘‘ گشنت حدا ءِ جنگ بے توار انت ،الم ءَ اے زہگانی باری کیت ۔ہما زہگ کہ سرجمیں سال ءَ پہ لوگ ءَ گستاں دراں ڈیہی ءَ وانگ ءُُ چکاس ءِ تیاری کنگ ءَ انت گوں آہاں اے وڑیں بے راہ روہی ءِ بائد درائیں مردم ایر جنی ءَ بہ کن اَنت ۔

ءُُ اے جیڑہ ءَ ایوک ءَ لہتیں زہگانی مہ زور انت بلکیں اے یک قومے جیڑگے ءُُ بائد درائیں راج اے بابت ءَ وتی زارشانی ءَ دیم ءَ بیار ایت اگان ناں یکبرے پداں نودربرانی لٹ ءُُ کٹ بنا بوت کنت ،یکبرے پدا نودربرانی زنداناں شوہازی بوت کنت ،یکبرے پدا دلپروشی یے بوت کنت ۔
این ٹی ایس بلوچستان ءَ پرے حاترا بند کنگ بوتگ اَت کہ آئی ءِ یکے وَ نودربراں چہ زر ءُ باز گپت ءُُ دومی آئیءِ یک وتی گینگے است ات کہ ہمائی ءِ پد ءُُ پیراں نودربرانی پاس ءُُ فیلی ءِ ہماہانی دست ات ۔بلئے چشیں ناجائز وَ این ٹی ایس ءَ نہ کتگ ات کہ چو ایس ای سی ءَ گوں بلوچستان ءِ نودربراں گوں کتگ ۔

یکے وَ سرجمیں بلوچستان ءَ یک جنرل میڈیکل کالجے است انت کہ ایشیءِ کچ ءُُ کیل پہ نودربرانی کچ ءُُ کیل ءَ سک باز کم انت ،دومی بلوچستان ءِ نودربرانی سیٹ اوں کم اَنت ،بزاں فارم چار ءُُ پنچ ہزار نودربرا جم کنت ءُُ سیٹانی کچ ءُُ کساس سدانی تہا انت ،اے ہم یک بلائیں ظلمے گوں بلوچستان ءِ نودربراں بوہگان انت ۔

انوگیں سرکار راستے گوں نیک دلی ءَ کار کنگ لوٹیت بائد آ اے جیڑگ ءِ زوتاں چہ زوت گیشوار واری ءَ بکنت زارشانی کنوکیں نودبرانی حشکیں لنٹاں بچکندے تالان بکنت ءُُ ایشانی ارساں پہک بہ کنت ،اے دگہ جہان ءِ مردم ہمے گشنت کہ ہرچند کہ ڈاکٹرانی گیشی بہ بیت گہتر انت یکے مئے ملک انت کہ ڈاکٹر ءِ جند ودی کنگ نہ لوٹ ایت ۔
گوں بنجاہی سروکاں ہمے دست بندی انت کہ اے پگر ءُُ حیال ءَ بدل بہ کنت ءُُ نودربرانی چکاس ءَ دوبر بہ گپت ءُُ ایشانی زندگی ءَ گیشتر براہ دار بہ کنت۔