اے وہد ءَ برکت اسماعیل مئے چاگرد ءَ ایوک ءَ یک بنی آدمے ءِ نام نہ انت بلکیں یک پگر ءُُ لیکہ یے نام انت ءُُ اے پگر ءُُ لیکہ چاگرد ءَ وانگ ءُُ زانگ ءِ دیمروئی انت اگاں برکت اسماعیل ءِ ما پیشگیں زند ءَ بچاریں گڈا آ یک یکشلیں جہدے ءِ عکس انت ،کہ آئی ءَ مکران وڑیں پدمنتگیں جاہے ءَ بنا کت ءُُ آسرے ءَ سرکت ۔
مرچی کہ مکران ءِ وانندگ ءُُ زانندگیں مردم ملک ءِ دمگ دمگ ءَ گندگ بنت آئی ءِ تہا مستریں دست برکت اسماعیل ئیگ انت اگاں بازین ناسرپدیں مردم برکت اسماعیل ءَ را ایوک ءَ اے درچ ءَ زان انت ۔

کہ آئی ءَ کیچ ءَ یک لینگویج سینٹرے پچ کت کیچ ءِ نودربراں نہ ایوک ءَ وانگ ءُُ زانگ ءِ سکین دات بلکیں آہاناں اے سدکی ہم ہم دات کہ پہ ملک ءِ ایندگہ ورناہاں گوں میڑ ہم کت کنان ،برکت اسماعیل ہمے کار ءَ چہ ایندگاں سینٹر داروکاں گستا جتا کت اگاں ملک ءَ پہ گچینی شہرستاناں یک سوجکارے ءِ کالج ءِ وانینگ ءَ ابید وتی جند ءِ لینگویج سنٹرے ءِ پچ کنگ جوانیں کارے زانگ نہ بیت ۔

پرچکہ پہ اے وڑیں سوجکاراں ( ٹیچراں ) اے گمان بیت کہ اے کالجاں نہ وانین انت بس وتی سینٹراں دلگوش بنت پرچکہ چرے سینٹران آہاں گیش زر ءُُ مال کپیت بلئے راستی ایش انت کہ برکت اسماعیل ءِ ہچبر گمان ءُُ واہگ ایش نہ بوتگ کہ وانگ ءُ زانگ ءَ بیپارے بکنت اگاں کہ نوں درائیں دنیا ءَ انچش انت کہ وانگ یک بیپارے جوڑ کنگ بوتگ بلئے برکت اسماعیل ءَ اے کار ہچبر پہ بیپار ءِ نیت ءَ نہ کرتگ بلکیں آ چو کہ وت گشیت کہ پہ وانگ ءَ سک در پہ در بوتگ ءُُ ہمے زمانگ ءَ آئی ءِ دل ءَ لوٹ اتگ کہ اگاں آئی ءِ جند ءِ شہر ءَ اے وڑیں وانگ ءُُ زانگی ادارگے بوتیں گڑا آ چو اے وڑا در پہ در نہ بوتگ ات ہمے زمانگ ءَ آئی ءَ ارادگ کرتگ کہ اگاں آئی ءِ وانگ ہلاس بہ بیت گڑا آ وتی ہند ءِ زہگانی حاترا وت یک ادارگے جوڑ کنت ۔

ہمے ارادگ ءُُ واہگ ءِ پشدر ءَ آئی ءَ ڈیلٹا جوڑ کت کہ بندات ءَ لینگویج سنٹرے ات پدا ڈیلٹا اسکو ل جوڑ کت پدا ہمے اسکول ءَ سکینڈری جوڑ کت کہ 2016 ءَ ایشی ءَ را کالج جوڑ کنگ بوتگ ءُُ آئی ءِ واہگ ءُُ تماہ انت کہ 2022 ءَ داں ایشی ءَ را یونیورسٹی ءِ جوڑ کنگ بہ بیت اگاں کہ تربت ءَ پرائیوٹ اسکول ءِ جوڑ کنگ آسانیں کارے نہ ات ننکہ کالج ءُُ یونیورسٹ ءِ جوڑ کنگ چو آسان نہ انت بلئے برکت اسماعیل ءِ واہگ ءُُ ارادگ سک محکم ءُُ مہر انت ۔

برکت اسماعیل اے وہد ءَ بلوچستان لکچرار اینڈ پروفیسر اسوسی ایشن ءِ کماشی ءِ میڑ ءَ ہوار کپتگ اگاں اے میڑ آئی ءِ جند ءِ واہگ ءُُ تماہ نہ بوتگ بلئے وہدے آ سنگتاں مجبور کت کہ بائدیں آ وتی پگر ءُُ لیکہ ءَ ایوک ءَ مکران ءِ بدل درائیں بلوچستان ءَ تالان بکنت گڑا یکبرے آ را زی نہ بوتگ بلئے سنگت ءُُ دوستانی بازیں کھڈن کنگ ءَ آ پہ اے کار ءَ رازی بوت ۔

اے بابت ءَ ہم آئی ءِ واہگ ءُُ ارادگ ہمیش انت کہ ایوک ءَ مکران ءِ ناں بلکیں درائیں بلوچستان ءَ یک وانگ ءُُ زانگی چاگردے جوڑ بہ بیت تنکہ بلوچستان ءِ ہرچ زہگ وتی آکبت ءَ شنا سا بہ بیت ۔

برکت اسماعیل ءِ گشگ ایش انت کہ وانگ ءُُ زانگ ءِ دیمروئی ءِ حاترا زلوری انت کہ ٹیچرانی پگار ءُُ زند ءِ جاور حال گہتر کنگ بہ بنت برکت اسماعیل گیشتر کہ پیسرا آئی ءِ گمان بوتگ کہ بلوچستان ءِ ایندگہ دمگاں مہلوک وتی زہگاں وانینگ نہ لوٹ ایت بلئے بازیں دمگانی ترو گرد ءَ پد آ سرپد بوتگ کہ بازیں دمگاں وانگ ءُُ زانگی آسراتی نیست انت ءُُ دومی سرکار ءِ نیمگ ءَ ہما آسراتی کہ ٹیچراں پکار انت آ آہاناں رسگ ءَ نہ انت ۔

برکت اسماعیل ءِ گشگ انت کہ آئی ءِ جہد ہمیش بیت کہ کالج ءِ ٹیچراں درملکی اسکالر شپ دئیگ بہ بیت تنکہ آ وتی سنچ ءُُ بود ءَ گیشتر کت بکن انت دومی ملکی تک ءَ ہم ٹیچراں گیش ءَ چہ گیش ہیل کار کنگ بہ بیت تنکہ آہانی زانت ءُُ سنچ بہ ودایت ءُُ وانگ ءُُ زانگ ءِ دیمروئی ءَ آہاں جوانیں کردے بہ بیت ۔برکت اسماعیل ءِ واہگ انت کہ لکچرار اینڈ پروفیسر اسوسی ایشن پتر ءِ سرا حکومت مجبور بکنت کہ ٹیچراں گیش آسراتی بدانت ۔