نبشتہ کنگ ہرکس کار نہ انت بلئے نبشتہ نیلگ ءُُ دارگ کسی حق نہ انت ۔بلوچی لبزانک ءَ ندکار وَ باز اَنت بلئے نبشتہ کار نیست انت ،نبشتہ کار ءُُ ندکار ءِ گستائی ءَ من اے پیم ءَ کت کناں کہ نبشتہ کار ہما اِنت کہ سرپد ءُُ زانندگ بہ بیت ءُُ نوں نبشتہ کنت ،آ نبشتہ کنگ ءَ پیسر سد رند ءَ پگر کنت ،لبزاں گچین ءُُ مٹ کنت ،پدا سالانی سراں اگاں یک کتابے چاپ کنت یا سرجمیں زند ءَ اوں چاپ اوں نہ کنت کہ کنت ،بلئے ندکار ہمااَنت کہ ہمک وہد نویسگ ءَ اَنت ۔
شر حراب ہرچی کہ آوانی دل بلوٹ ایت آ نبشتہ کن اَنت۔حئیر نویسگ وَ شر انت بلئے پدا دوبر وتی نویستگیں چیزانی دوار چاری نہ کنگ سکیں حرابیں کارے بائد چش مہ بیت بلکیں وتی نویستگیں موادانی دوبر چارگ ءُُ مٹ ءُُ بدل بہ بیت دانکہ آ چہ ندکاری ءَ دربئیت ءُُ نبشتہ کارے بہ بیت بلئے نبشتہ کار نیست ءُُ ندکاری ءِ حب داروکانی کچ ءُُ کساس روچ پہ روچ گیش بوہان اِنت ۔ پدا کتابانی چاپ کنگ ءُُ وتی کتابانی کچ ءُُ کساس ءَ گیش کنگ اوں یک نوکیں جنجالے مئے چاگرد ءَ ودی بوتگ کہ ہمک نویس کار ہمے چک ءُُ پدان انت کہ آئیءِ کتابانی کچ چہ اے دگراں گیش بہ بیت ۔
پمشکا ہمک پڑ ءَ نبشتہ کنگ ءُُ کتابی دروشم دئیگ ءُُ چاپ کنگ اِنت ،گشنت کہ چاگرد ءَ مستریں شرگدار نیست انت بلئے بلوچ چاگرد چہ اے شرگداری ءَ اوں زبہر انت پرچکہ مردمانی جاہے دوستی ءُُ سنگتی دیم ءَ کیت ءُُ جاہے لگوری ءُُ ترس گڈاں جاہے جاہلی ءُُ نزانتکاری ءِ سوب ءَ ہما مواد ءُُ کتاب شرگداری چکاس ءَ نہ گوزانت ۔پمشکا ہرکس سروت نبشتہ کنان انت ءُُ وتی کتابانی کچ ءُُ کساس ءِ گیش کنگ انت ۔ بلئے نبشتہ وَ کنگی اِنت ۔۔۔۔!
انچیں نبشتہ کہ بہ ماننت اَت ءُُ دائم شونکاری ءَ بہ کن اَنت چو کہ سید بوتگ آئی ءَ اوں کم وہد ءَ بازیں چیزے نبشتگ بلئے آئیءِ نبشتہ ءَ پیسر وانتگ ءُُ وتی نبشتہ کتگیں مواد سے ءُُ چار رند ءَ وت ہورت چاری ءُُ لبزانی گچین کنگ ءَ رند نوں کتابی دروشم ءَ چاپ اِش کتگ اَنت ۔
حئیر آ وہدی وَ چشیں گامگیجانی حاجت بوتگ بلئے نوں وَ اسکالرزانی دور انت ہمک دومی مردم ایم فل ءُُ پی ایچ ڈی انت بلئے وت حاک ءُُ پُر ،آس ءُُ جس اَنت ۔ہما پڑاں کہ آ ہاں وتی ایم فل یاپی ایچ ڈی کتگ وت ہما پڑاں ہچی سرپدی نہ دارنت ،چشکہ نہ انت سرجمیں مردم انچوش انت بلئے بے زانتانی کساس گیش انت ۔ بلوچی ءَ گشنت کہ من جناں ٹی ءَ من میاریگاں ،ٹی من ءَ جنت کہ من میاریگی اَنت‘‘ بزاں اے چاگرد ءَ گپ کنگ مستریں گناہ اِنت حاموش بوہگ ثوابِ کبیرا انت پرچکہ
اے شہر ءَ کور سروک اَنت ءُُ کور رہدربر
گلگ کنئے نہ کنئے شر چراگ تہنا اِنت
قاضی ؔ ءَ اے چاگرد ءِ عکس کاری جوانیں رنگے ءَ اے شعر ءَ کتگ ۔مئے چاگرد انچو ش کہ بلئے نبشتہ وَ کنگی اِنت۔۔۔۔!کسے شعر زانت نہ زانت کہ شعر نبشتہ بہ کنت ،کسے چہ ردانک ءَ سرپد انت کہ سرپد نہ انت آ ردانک نویسی بہ کنت ،کسے پولکاری ءِ الف ءُُ ب ءَ نزانت بلئے پٹ ءُُ پولی بہ کنت ،انچو کہ اے ملک شہر نہ فرسان انت بزاں ہما شہر کہ کس آئیءِ حال ءَ مہ گپت ہمے رنگ ءَ بلوچی زبان ءُُ لبزانک ءُُ مئے چاگرد ءِ جاور اوں ہمے رنگ ءَ انت کہ ہرکس ہرچی کنت بلِّے اِدا جست ءُُ پرس کنوک نیست انت ۔
من کہ سید ہاشمی ءِ سیدنمدی ءَ واناں داں سد افسوس بیت کہ ما چے پیمیں عہدے ءَ زندگ اَنت یک سیدے بوتگ کہ ہمک نوک باہندیں ندکارے ءَ را وتی نمدی نوشتگ ءُُ آئیءِ سرپد کنگ ءِ جہدے کتگ ،یاکہ تاک ءُُ ماہتاکانی شونکارانی سرپد کنگ وت بلائیں دلے لوٹیت بلئے سید اے کار گوں نمدیانی کمک ءَ کتگ مرچی وَ فیس بک ءُُ وٹس ءِ دور انت اگاں ما کسے ءَ را نمدی یے نبشتہ کت نہ کناں داں ہمے شوشل میڈیا ءَ کم چہ کم آئیءِ نبشتگیں کتابانی بابت ءَ کلوہ یے دیم دات کناں بلئے اِناں مئے دست پہ چشیں بدیں کارے ءَ چتور گون بہ بیت ما وَ یکے دومی ءِ ایرجنی ءُُ زاہ ءُُ بدءِ نیکیں کاراں گلائش انت مارا چے کار ۔۔۔۔!!
اگاں نبشتہ نہ بوت داں دپتراں مئے نام اوں نبشتہ نہ بیت ءُُ ہما دپتر کہ ما پہ پہر آئیءِ نام ءَ گریں آئیءِ پد ءُُ نشان گار بنت ۔
پمشکا نبشتہ بہرحال کنگی اِنت۔۔۔۔۔