لس مردم ءِ گمان ہمیش انت کہ فلسفہ ءِ بابت ءَ بائدہما مردم گپ بہ جنت کہ آئی ءَ را فلسفہ ءِ دپتر ءِ بابت ءَ سرپدی بہ بیت،بلئے راستی چش نہ انت ،فلسفہ ءِ بابت ءَ ہرکس گپ جت کنت شرط ایش انت کہ آ فلسفہ ءَ چے سرپد بیت۔۔۔! فلسفہ ہما لیکہانی نام انت کہ زند ءِ یک بہرے ءُُ آسر ے ءَ چہ پد گیشوار کنگ بوتگ اَنت ۔

فلسفہ ءِ وہدے نام گرگ بیت داں گمان یکیں ملک ءَ روت بزاں یونان ءَ بلئے زانہ دگہ راج ءُُ قوم ءِ گور ءَ فلسفہ نہ بوتگ ؟یاآیاں نہ زانتگ کہ زند ءِ گوازینگ یا نیکی ءُُ بدی چے اَنت؟چاگرد ے ءَ کجام چیز شر انت ءُُ کجام چیز حراب گشگ بیت ۔۔۔

اے درائیں تک ءُُ پہنات درائیں راجانی گورا است بوتگ اَنت گڑا چوچون بوت کنت کہ آہود ءَ فلسفہ مہ بیت؟آں اے حبر بوت کنت کہ آہود ءَ فلسفہ ءُُ شاہ زانتی ءِ مانہی گیش پلگارگ بوتگ ءُُ بلئے مئے ڈولیں پدمنتگیں راجانی گوراہما شاہ زانتی پلگارگ نہ بوتگ اَنت پمشکہ ما وت ءَ فلسفہ ءِ پڑ ءَ مدام ءَ پدمنتگ ءُُ کمتر سرپد باں بلئے راستی ءَ فلسفہ وَ حیالانی یک انچیں ریچے کہ مردم ءَ را وتی زند گوستانی پشدر ءَ سما بیت کہ زند ءِ اے تک ءَ اگاں چش بہ بیت داں ایشی ءِ آسر اے وڑ بیت ۔

آ ہما زانت ءُُ سرپدی ءَ پہ وتی آوکیں پدریچ ءَ ایر کنت ہمے زانت ءُُ سرپدی باز براں گشتنی دروشم ءَ ایر بنت ءُُ جاہے بتل ءُُ کسہانی دروشم ءَ ایر بنت ءُُ باز براں آ شاعری ءِ دروشم ءَ سلامت بنت۔شرط پدا ہما اِنت کہ کسے ایشاں سرپد بیت ءُُ کسے ایشاں ہنچو ارزشت نہ دنت۔

فلسفہ وَ زند گوست ءُُ وتی جاورانی سرحال ءُُ سرگوست ءِ نام انت کہ ایشی ءَ راگوں تچکی ءَ نیکراہ ءَ کار نیست بلکیں اے سرجم ءَ یک چاگردی زانتے کہ گوں چاگرد ءَ بندوک انت ۔چاگرد ے ءِ درائیں چست ءُُ ایر فلسفہ ءَ بیان کنگ بنت۔شرط ہما بیان کارئیگ انت کہ کئی گور ءَ ہما ہورت چار ی ءُُ سمائی است انت کہ آ درائیں جاورانی سرپدی ءَ رند ءَ آوانی گیشواری ءَ وتی حیالاں درشان کت بہ کنت ہما فلاسفر گشگ بیت انچو کہ سقراط ،بقراط ءُُ رند ءَ افلاطون ءُُ ارسطو ءَ وتی حیالانی درشان کتگ ۔

وہدے سقراط ءَ زہر دئیگ ءَ برگ بیت داں آئی ءِ درائیں شاگرد آئی ءَ را گشنت کہ بیا ترا زندان ءَ چہ ڈن ءَ درکنیں بلئے سقراط پسو دنت کہ من پہ تچگ ءَ زند ان ءَ نیا اتکگ انت من وتی لیکہءُُ حیال درشانتگ اگاں من وتی حیال ءُُ لیکہاں بدل بکناں بزاں من بدزبان باں پمشکا من زہر ءَ وارت کناں بلئے پشت پردات نہ کناں ۔

مروچیگیں جاوراں بچار کہ ہچ کس وتی اندری مارشت ءُُ حیالاں تچکی ءَ کسی دیم ءَ گشت نہ کنت پرچکہ آئی ءَ را ترس انت کہ اگاں آئیءَ وتی حیالانی درشانی کت یا وَ جنگ ءُُ کُشگ بیت یاکہ بازیں مردمے ءَ چہ ناراض بیت پمشکا ما ترسوک ءُُ لگور جوڑ بوتگ انت چیزے مردم وتی حیالانی درشانگ ءَ نشہ ءِ کمک ءَ گپت ہما وہد ءَ کہ نشہ انت داں حق ءَ حق گشیت بلئے وہدے نشہ یے آسراِت داں وتی گشتگیں درائیں گپاں چہ انکاری بیت ۔ایشاں بل کہ اے وَ فلاسفر نیاں بلئے ہما مردم کہ وت فلاسفر ی ءِ مکتبی اَنت آ اوں وتی حیالانی درشانی ءَ سد برا پگر کن اَنت ۔۔۔۔ چشیں وانگ ءَ سوچ کہ حیالانی درشانی ءَ مئیل ایت ۔