بلوچستان ٹیکسٹ بورڈ ءِ کار ءَ بلوچستان ءَ پرائمری ءَ بگر داں انٹر میڈیئیٹ ءِ ہیلانکی کتابانی جوڑ کنگ ءُُ چاپ کنگ انت ۔اے درگت ءَ بورڈ ءَ سالے یک ارب ءَ گیش کلدار ءِ بجٹ دئیگ بیت کہ آ پہ وہد ءُُ موسم اولی تبک ءَ بگرداں انٹر میڈیئیٹ ءَ کتاباں سرجم بکنت ءُُ شنگ بکنت بلئے حال ایش انت کہ اے وہد ءَ بلوچستان ءِ سردیں دمگانی اسکولاں ماہے ءُُ نیم بیت کہ پچ بوتگ انت بلئے انگلش میڈیم اسکولانی گیشتریں تبکانی کتاب نیادی ءَ دست نہ کپ انت ۔
اے وہد ءَ مارکیٹ ماہے ءُُ نیم ءَ پد ہم نہمی تبک ءِ فزکس ،بیالوجی ءُُ پاکستان اسٹیڈیز ءِ بک دھمی تبک ءِ بیالوجی ءُُ کیمسٹری ،ہپتمی تبک ءِ تاریخ ءُُ سائنس وہدیکہ ششمی ءِ سائنس دست نہ کپ ایت وہدیکہ بازیں اسکولاں وتی سے ماہی چکاسانی جار ہم جتگ نوں وہدے یک تبکے ءَ چار چار کتاب دست مہ کپ ایت گڑا زہگ چکاساں چوں نشت کن انت ءُُ دومی اگاں سے ماہ ءَ پد اے کتاب نیادی ءَ آرگ بنت گڈا زہگ چوں وتی ہیل کاری ءَ سرجم کت کن انت ۔
بندری گپ ایش انت کہ اے اولی سال نہ انت کہ اسکولانی بندات بوہگ ءَ گوں ہیلانکی کتاب دست نہ کپ انت ،ہمک سال اسکول ءِ زہگانی مات ءُُ پتانی حال ہمیش انت بلئے بلوچستان ٹیکسٹ بورڈ ءِ واکدارانی گوش ءَ مورے نہ وارت ۔
بل ایشی ءَ ءُُ بزور آئی ءَ کہ اے بابت ءَ بلوچستان حکومت ءَ ہم سُدے پر نیست کہ یک نیمگے وانگ ءُُ زانگی ایمرجنسی جنگ بوتگ بلئے دومی نیمگ ءَ زہگاں پہ وانگ ءَ کتاب دست نہ کپیت ءُُ سیمی نیمگ ءَ وزیر اعلٰی ءُُ وزیر تعلیم ہمروچ سڑک ءُُ سگاں واک ءُُ روانک انت کہ ’’ ہربچہ اسکول میں ‘‘ نوں اے واکداراں جست کنت بہ بیت کہ ’’ ہر بچہ‘‘ اسکول ءَ بکنت چے؟؟
وہدے آئی ءَ پہ وانگ ءَ کتاب نیست ،چریشی ءَ پدر ابیت کہ بلوچستان ءَ وزیر اعلیٰ بہ بیت یا وزیر تعلیم اشی ءَ گوں بلوچستان ءِ وانگ ءُُ زانگ ءَ سنگینیں رنگے ءَ کار نیست بلکیں اے وزیر اعلیٰ گوں وتی کابینہ ءَ ایوک ءَ رسانک در ءَ زندگ بوہگ ءِ حاترا اے وڑیں شگلاں کنت کہ گوں سیاسی اوگاماں لس مہلوک ءَ را رپینگ بہ بیت ۔
بلوچستان ٹیکسٹ بک بورڈ ءِ دگہ بودناکی یے ایش انت کہ گوستگیں وزیر اعلیٰ ءَ بلوچستان ءَ ماتی زباناں وانینگ ءِ جار جتگ ات کہ چرآئی ءَ پد بلوچستان ٹیکسٹ بورڈ ءَ لہتیں نبشتہ کار نامینتگ ءُُ چرآئی ءَ کار گیپت بلئے اشانی بابت ءَ بلوچی زبان ءِ بازیں ادارگانی گلہ ءُُ شکایت ایش انت کہ کار گیشتر ہما مردماں دئیگ بوتگ انت کہ بلوچی ،پشتو، ءُُ ایندگہ زبانانی ہما نبشتہ کاراں دئیگ بوتگ انت کہ اے زبانانی لبزانک ،زبان ءُُ دودمان ءَ جوانیں وڑے ءَ سوہ ءُُ سرپد نہ انت ۔
بائدیں اے درگت ءَ بلوچستان ٹیکسٹ بورڈ ماتی زبانانی کتابانی ٹہینگ ءَ ادارگانی سئینریں مردمانی گوں سیادی بکن انت پرچکہ سلیبس ءِ ٹہینگ سکیں سنگینیں کارے ءُُ اے بابت ءَ اگاں ردی یے بہ بیت چو پنجاب ٹیکسٹ بک بورڈ ءِ وڑا حکومت ءُُ بورڈ ءِ سرا وبالے بیت ۔
ہمے در چ ءَ اگاں بورڈ لہتیں کتابانی لڑچارگ بہ بیت تا بورڈ ءِ واکدارانی سنچ ءُُ بود زانگ بیت کہ لہتیں کتاب چہ سئینریں ٹیچراں نبشتہ کنائینگ بوتگ انت ءُُ چارگ ءُُ ٹپاسگ ءَ جونئیریں ٹیچراں دئیگ بوتگ انت ۔اے بابت ءَ یک استادے ءِ گلہ ایش انت کہ کتاب ءِ مواد چہ آئی ءِ نبشتہ کنائینگ بوتگ انت وہدیکہ چارگ ءُُ ٹپاسگ ءَ آئی ءِ شاگرد ءَ دئیگ بوتگ انت ۔
دنیا ءَ ہرجاہ ءَ اے وڑیں چیزانی گر ءُُ دار کنگ بیت بلئے بلوچستان ٹیکسٹ بورڈ چہ چرے گر ءُُ داراں آجو انت ۔بلوچستان ٹیکسٹ بورڈ ءِ سرا دگہ گلہ یے اے کنگ بیت اے گیشتر ہما مردماں نامین ایت کہ گوں بورڈ ءِ واکداراں نزیک ءُُ رو ءُُ ریائی انت ۔
بائدیں بلوچستان ٹیکسٹ بک بورڈ ہیلانکی کتابانی ٹہینگ ءَ اے وڑیں رو ءُُ رواں سربگوزایت ءُُ اے درچ ءَ سئینریں ٹیچراں گیشتر ارزشت بدنت تنکہ سلیبس ءِ جوڑ کنگ ءَ سنگینی ءُُ کوالٹی ءِ حیال دارگ بہ بیت۔
اے چشیں گرانیں کارے نہ انت اگاں ٹیکسٹ بک بورڈ ءِ واکداراں نبشتہ کاراں چہ وت ءَ نامینگ ءَ پیسر بلوچی ،پشتو ،ءُُ براہوئی ءِ مزنیں ادارگاں دزبندی کاگد نبشتہ بکن انت ءُپ چہ آہاں جوانیں سینئریں نبشتہ کارانی ناماں بلوٹ انت گڈا اے کار جوانیں وڑے ءَ بوت کنت ۔دومی بلوچستان ٹیچر اسوسی ایشنے است انت باید اے اسکول ءُُ کالجانی ہیلانکی کتابانی ٹہینگ ءِ وہد ءَ وتی کرد ءَ پیلو بکن انت تنکہ اے کار جوانیں رنگے ءَ کنگ بہ بیت۔