بلوچی لبزانک ءَ بازیں چیزے نبشتہ بوہگ ءَ انت ءُُ بازیں کتابے چاپ بوتگ بلئے اے کتابانی چار ءُُ تپاس ءِ جوانی گامگیج گندگ نہ بیت ۔ ہمے بازیں کتابانی چاپی ءَ مئے ندکارانی کچ ءُُ کساس وَ گیش کتگ بلئے جوانیں ساچست انگت ءَ دیم ءَ پیداک نہ انت کہ ما آئی ءَ گوں میان استمانی لبزانک ءَ دیم پہ دیم کت بہ کناں نوں جست اے دیم ءَ کیت کہ آ کجام سوب اَنت کہ مئے نبشتگیں مواد ءُُ کتاب میان استمانی کچ ءُُ کیل ءَ پرچہ سر نہ بنت۔
ندکار ہرچی کہ آوانی دل لوٹیت آ نبشتہ کت کن اَنت ءُُ آوانی کتاب چاپ اوں بنت ۔اصل ءَ جیڑہ ندکارانی نہ اِنت بلکیں شرگدارانی اِنت بلوچی لبزانک ءَ انچو ندکاراست انت بلئے نگدکارانی اگاں کساس چارگ بہ بیت داں یکے پہ چم ءِ سارتی ءَ نیست انت ۔اے یک بلائیں جیڑگے کہ بلوچی لبزانک ءَ انچو کتابانی چاپی ءَ پداوں شرگدارانی کمی اِنت ۔
بنداتی دور ءَ واجہ کریم دشتی ،عاقل خان مینگل ءُُ اومان اللہ گچکی ءِ ڈولیں شرگداراں چیزے نبشتانک ءُُ شاعرانی شعرانی سرا شرگداری کتگ بلئے نوکیں دور ءَ اے تک ءَ انچو دلگوش دئیگ بوہگ ءَ نہ انت اگاں چہ واجہ غنی پرواز ہم یک شرگدارے بلئے آئی ءِ نوکیں چیزدیم ءَ پیداک نہ انت اگاں کہ واجہ پرواز اے درگت ءَ جوانیں کارے کرت کنت۔ واجہ آرداد ءَ اوں اے پڑ ءَ یک حدے ءَ کار کتگ ۔
بلئے آئی ءَ پد بلوچی نگدکاری پڑ ءَ دگہ چشیں سرے گندگ نہ بیت کہ بلوچی پرائی ءَ پہر ءُُ نازے بکنت اگاں کہ گش انت کہ ساچینک وتی نگدکارءَ وت ودی کنت بلئے زاناں بلوچی ساچنیک سنٹ انت کہ نگدکارے ودی کت نہ کنت ۔ تربت ءَ ہمے کار بازیں مردمے ءَ وتی جند ءِ کوپگاں زرتگ ات بلئے اگاں نوں اے کارا ءَ ادارگ بکن انت گڑا جوان تریں کارے بیت ءُُ اے درچ ءَ مہلوک ءِ روچانی دارگ ءِ بدل ءَ اگاں ایرادی نیادی دارگ بہ بنت ،لبزانک ءَ گیش نپ ءُُ سیت رست کنت ۔آ یک جوانیں ءُُ ستاکرزیں کارے اَت بلئے آ وہد ءَ را سک دیر انت ءُُ نوں لبزانک ءِ پڑ سک باز پراہ ءُُ شاہیگان بوتگ۔
دومی بلکیں اے وڑیں نشتانک ءُُ دیوان مہ بنت کہ بلوچ ندکارانی تہا نوں آ وڑیں سگ ءُُ اوپارے اوں نیست انت کہ پیش ءَ بوتگ نوں کسے نام اوں گرگ نہ بیت ۔ہرکس وتی مستر وت انت کس دومی ءِ سرو سوجاں زورگ ءَ ساڑی نہ انت ۔
بلئے اگاں دیوان ءُُ مراگاہ بوت نہ کنت داں نبشتہ وَ بوت کنت نبشتہ کنگ ءَ وَ کس کس ءَ را داشت نہ کنت ۔بلئے نبشتہ اوں ایوک ءَ زاہ ءُُ بدی یا یکے دومی ءَ را ایرجنی ءِ نیت ءَ کنگ مہ بیت بلکیں اصلاح ءِ دروشم ءَ بہ بیت ۔
ہمے رنگ ءَ ما یکے دومی ءِ نزوریاں درکت کنیں ،ہمے رنگ ءَ ما وتی نبشتگیں موادانی چار ءُُ تپاس ءَ کت کنیں ۔اے نگدکاری ءَ انچائیں مردم وَ کت نہ کنت پرچکہ پرے کار ءَ باز وانگ لوٹیت ءُُ بازیں چیزے ءَ سرپدی لوٹیت ۔
اگاں کسے شاعرے ءِ سرا تران کنگ لوٹیت داں پیسر ءَ وت شاعری ءِ بابت ءَ شاعری ءِ رہبندانی بابت ءَ شعری زیل ءُُ بامانی بابت ءَ چہر ءُُ چیدگانی بابت ءَ جوانی ءَ سہی ءُُ سرپد بہ بیت نوں آ یک شاعرے ءَ گوں انصاف کت کنت ۔اگاں کسے آزمانک ءُُ گدارانی سرا چیزے نبشتہ کنگ بلوٹ ایت داں پیسر ءَ وت آزمانک ءُُ گدار ءِ بابت ءَ بزانت کہ اے چتور ساچگ بنت ءُُ ایشانی ساچگ ءَ چتوریں ہنرکاری یے لوٹیت ۔
بلئے شرگداری الم بہ بیت ۔اگاں لبزانک ءَ شرگداری نہ بوت ءُُ ایوک ءَ کتابانی چاپ کنگ ءُُ وتارا مستریں ندکار ءِ گشگ عیباں شماربیت پرچکہ نوں مردم اے نچارایت کہ چنچو نبشتہ بوتگ بلکیں اے چارایت کہ چے نبشتہ بوتگ۔
بائد انت کہ شرگداری نشتانک دوبر بنگیج کنگ بہ بنت ءُُ ندکارانی چاپ بوتگیں کتابانی سرا شرگداری کنگ بہ بیت ۔ہمے مئے سوبمندی ءُُ میان استمانی کچ ءُُ کیل ءَ سر بوہگ ءِ مانزمان بوت کنت ۔