بلوچستان ءَ ہنچیں ڈویژن است کہ آہانی دراجی ءُُ پہنات چہ صوبہ کے پی ءَ چہ مستر انت ءُُ اے ہم یک پدرائیں گپے کہ بلوچستان ءِ پٹھان درائیں ضلعاں یکجاہ بکنئے گڑا ایوک ءَ ضلع ءِ خاران ءِ برابر نہ بنت بلئے اے درچ ءَ یک لسانی گروہے ءِ وش ءُُ رازی کنگ ءِ حاترا بلوچستان ءِ گوریچانی دمگانی یوسی کدیں ہنداں ضلع جوڑ کنگ بوتگ کہ اے بلوچستان ءَ جاہ منندیں مردمانی سرا یک ناروائی یے ءُُ بلوچستان ءِ بجٹ ءِ سرا بارے ۔

دومی دست ءَ بلوچ رہشونانی نزوری ءُُ لاپ چاری ءِ سوب ءَ بلوچ دمگانی بازیں ہند ءُُ دمگ پٹھان دمگانی چار چار ضلع ءِ کد ءُُ کساس ءَ انت بلئے آہاناں دو ضلع ہم کنگ نہ بوتگ ۔اے درگت ءَ کیچ ءِ تحصیل ءُُ تمپ ء تحصیل دشت ءِ دمگ ءِ رقبہ ءُُ آبادی ءِ درگت ءَ سک مزن ، پراہ ءُُ شاہگان انت ۔

بلئے سب تحصیلانی تہا بہر ءُُ بانگ انت ۔1970 ءَ بگرداں روچ ءِ مرچی مکران ءِ رہشونان اللہ ءَ اے توفیق نداتگ کہ تحصیل تمپ ءُُ تحصیل دشت ءَ جتاجتا دو ضلع جوڑ کنگ ءِ گپے بہ جنت ۔ہمے وڑا رخشان ڈویژن یک مزنیں ہند ءُُ دمگے کہ آئی ءِ تہا ضلع چاغے،ضلع نوشکی ،ضلع خاران ءُُ ضلع واشک ءُُ بسیمہ ہوار انت اگاں رقبہ ءُُ آبادی ءِ درچ ءَ چارگ بہ بیت ایوک ءَ ضلع چاغے یک ڈویژنے ءِ8 کد ءُُ کساس ءَ پوراکنت ہمے وڑا ضلع خاران، بلئے گوستگیں 50 سالاں اے دمگ ءِ مہلوکاں گوں اے ناروائی کنگ بوتگ کہ اشاں کوئٹہ ڈویژن ءَ ہوار کنگ بوتگ ۔

اے درچ ءَ دالبندین کہ چہ کوئٹہ ءَ 8 گھنٹہ ءِ دراجی ءِ سرانت اودا مہلوک ءَ پہ کارے ءَ کوئٹہ ءَ آہگ ءَ چنچو تکلیف بیت؟ ہمے وڑا خارا ن ءِ مردم کہ پہ کوئٹہ ءِ آہگ ءَ شش گھنٹہ پکاربیت۔

دنیا ءَ بل پاکستان ءَ اے وڑیں دمگ ءُُ ہندے نیست کہ اودے مہلوک ءَ پہ وتی ڈویژنل ہیڈکواٹر ءَ سر بوہگ ءَ شش ءُُ ہشت گھنٹہ پکار بہ بیت؟ بائدیں حکومت انسانی ہمدردی ءُُ بزگی ءِ پشدر ءَ اے ڈویژن ءَ راجوڑ کنگ ءِ گامگیج بزور ایت اول وَ اے راج دوستیں گلانی کار بوتگ کہ آ حکومت ءَ بوتگ انت بائدیں آہاں اے بکتیں بلئے آہاں اے کار کرت نہ کتگ نوں بائدیں گوں استیں حکومت اے جیڑہ ءِ سرا ہم کوپگ بہ بنت پرچکہ بلوچستان اسمبلی ءَ پٹھان لسانی گروہ سک گشاد بوتگ کہ وڑے نہ وڑے ءَ بلوچ دمگ ءَ اے ڈویژن ءَ جوڑ بوہگءَ مئیل ات ۔

اگاں کہ اے ڈویژن ءِ جوڑ بوہگ ءَ پٹھان لسانی گروہ ءَ ہچ وڑیں تاوانے نیست بلئے اگاں بلوچ راج دوستاں اے بابت ءَ وتی ذمہ واری پیلو نہ کت انت گڑا بوت کنت کہ پٹھان لسانی گروہ اسٹیلمشنٹءَ بلیک میل بہ کنت نوں بائدیں راجہ دوست چو تمپ ،دشت ضلع ءِ وڑااے گپ ءَ مجن انت۔

کہ اے پہ بلوچستان ءِ بجٹ ءَ بارے پرچکہ وہدے پٹھان دمگاں یوسی لیول ءَ دمگ ضلع جوڑ کنگ بنت گڑا آ وہد ءَ اے ضلع بلوچستان ءِ بجٹ ءَ بارے نہ بنت وہدے بلوچ دمگاں ضلع ءُُ ڈویژن جوڑ کنگ بیت گڑا بلوچ راج دوست گش انت کہ اے پہ صوبہ ءِ بجٹ ءَ بارے بیت ۔ اے درچ ءَ مئے دزبندی گوں بی این پی ،بی این پی (عوامی) نیشل پارٹی ، بی این ایم( حئی )جہموری وطن پارٹی ءُُ بلوچ عوامی موومنٹ ءَ گوں ہمیش انت کہ بائدیں اے وہد ءَ گوں میرعبدالقدس بزنجو ،غلام ودستگیر ءُُ ایندگہ اسمبلی باسکانی ہم کوپگی ءَ بکن انت تنکہ باندا بژنیگ ءُُ افسوسی مہ بنت ۔