بلوچی ءَ گش اَنت کہ گپ ءَ بِجا ءُُ درکن اے گپ ءِ مانا ءُُ بزانت ءَ ہمک مردم زانت ءُُ سرپد اِنت بلئے کس اے گپ ءَ کِمار نہ کنت ءُُ ہرچی کہ دپ ءَ کیت آ درے کنت۔بلئے لبز ہما چیز انت کہ شر ءَ شِر ءُُ شِر ءَ شَر کت کنت۔

پمشکا مردم گپ ءَ پیش یک ءُُ دوبر ءَ بے جیڑ ایت ۔پرچکہ گپ چو تُک ءِ وڑا انت کہ یکبرے کپت پدا زورگ نہ بیت ۔گپ مردماں توریت ،گپ مردماں وش ہم بیت ،گپ مردماں وش نام کنت ءُُ گپ بدنامی ءُُ دیم سیاہی اوں دنت۔

ہمے گپ اَنت کہ دوستی کاراَنت ،ہمے گپ اَنت کہ دشمنی ءِ بُنز ہ اَنت ۔گپ شیرکن اَنت ،گپ تہل ءُُ سوچاک اَنت ۔گپ شرمندگ کن اَنت ،گپ وازمندگ کن اَنت گپ پشومان اوں کن اَنت گپ پہر بندی ءَ بیت ۔پمشکا ایشاں پہ ارزانی مہ زور گپ سکیں زالمیں چیز اَنت کہ آ روچی کہ بنی آدم ءَ گپ نزانتگ داں ایمنی بوتگ ،نوں کہ گپ زانان اَنت ایمنی نیست انت جنگ ءُُ داواہ اِنت ۔مردم گپ جنت ءُُ گپاں بے حال کنت بلئے سائنس گشت کہ ہچی زوال نہ بیت ءُُ خلا ءَ درائیں عہدانی گپ است انت ۔

یک گپے کہ پہ ناشاتی یک دیوانے ءَ یک شپے ءَ یک روچے ءَ یک مجلسے ءَ یک ناگہی ءَ گشگ بیت ۔آ گپ گار نہ بیت کیت یک روچ کہ ہما گپ پدا پدر بیت ءُُ مردم شرمندگ ءُُ چم جہل بیت کہ دریگتے آئی آ گپ مہ کتیں ۔پمشکا گپانی گچین ءُُ گپانی روز ءُُ طاقت ءَ بہ زان ءُُ انچو پہ دیم گپ اوں مہ جن پرچکہ بلوچاں گشتگ کہ کشار پہ دوتاکی ءَ زانگ بیت ءُُ مردم پہ گپ ءَ پجارگ بیت ۔دائم ءَ گپ مہ جن اگاں گپ کنئے داں زانگ بئے۔۔

باز جاگہ ءَ مردم مجبور بیت کہ گپ بہ کنت ہمے گپ رند ءَ آئیءِ گُٹ ءَ لوپ بنت آ نہ ایر بارتے کنت ءُُ چہ کوپگ ءَ ایشیءَ ایر کرت ہم نہ کنت۔پمشکا گپ کنگی نہ اِنت ۔گپ مردم ءَ منافق کنت ،گپ مردم ءَ منکر کنت ،گپ مردم ءَ بیزار کنت ءُُ گپ مردم ءَ شیوار کنت ۔پمشکا زانتکاراں گشتگ کہ زہم ءِ ٹپ روت انت بلئے گپ ءِ ٹپ بہہ شت نہ کنت۔

دائم ءَ وتی نزیکیں مردمے ءَ گوں دیوان کنئے داں جہد ہمے بکن کہ گوں آئی ءَ گیش گپ مہ جن اگاں نہ گپاں چہ دلگرانی ءُُ دلرنجی بیت آں کندگ اوں بیت ،مسکراہ اوں بیت راز اوں درکائینت زاہ ءُُ بد اوں بیت پرچہ ۔۔۔۔پرچکہ گپ کنے داں زانگ بئے۔