من سہب ءِ سرءَ مہلہ وت ءَ را پہ بازار ءِ روگ ءِ تیار کت ۔اسپیتیں گد گور ءَ کرت سبزیں پاگے سر ءَ بست ۔دراجیں دزبی لنککانی شم ءَ کرت انت ۔سرمگ من شپ ءَ کرتگ ات۔
عطر ءُُ سینٹ دل ءِ تب ءَ جت دگہ بلائیں چادرے چپیں کوپگ ءِ سر ءَ دور دات شلوار ءِ پادگ لانچت انت بزاں چہ پاد ءِ کڑاں برز تر کرت انت ۔دیم پہ بازار ءَ رہادگ بوتاں ۔اولی سر ءَ وتی دروازگ والا ئیں سنگت ءِ دکان ءَ شتاں سلام ءُُ دراہ باتی ءَ پد کرشی ءِ سر ءَ نشتاں آئی شیر چاہ ئے لوٹاہینت ۔
گپ ماں گپ ءَ مسکراہی کنان ءَ گشت ئے ’’ واجہ شما ملا پرچا چو جگاڑی ءُُ بے ایمانی کن اِت؟ من دپ ءِ پُر ءَ کندگے جت ءُُ جست کرت زانا حیر انت ؟۔۔گشتے ،یکروچے یک مدرسہ والا ملا یے منی گور ءَ ہتگ ءُُ دروازگ ءِ نہادے جست کرتگ من دراہیں دروازگانی نہاد گشتگ گڈ سر ءَ واجہ ءَ ہمے گشتگ کہ منی مدرسہ ءَ را سے کوٹٰ وال دروازگ ءِ زلورت انت ۔من مزنیں سیٹھ ءِ کر ءَ شتاں گڑا آ سیٹھ ءَ گشتگ واجہ تو برو سے دروازگ جوڑ کنائیں وتی دل ءِ تب ءَ زراں اش من دیاں من گشت واجہ باند ءَ تئی دروازگ تیار بنت تو کہ بازار ءَ کائے منی دکان ءَ سرے بہ جن ۔۔۔
اے دگہ روچ ءَ ہما ملا پد ءَ اتک ءُُ ہمے دروازگانی نہادے پد ءَ جست کرتاں من گشت واجہ چوناہیگ ءَ اے دروازگانی نہاد وَ شش ہزار کلدار انت بلئے چوکہ مدرسہ ئیگ انت کمیں ارزان اش جناں ۔ ملا گشت تو چوکنے ہمے سئیں دروازگانی رسید ءَ جوڑ کن بلئے وتی رسید ءِ تہ ءَ دروازگے ہشت ہزار کلدار نبشتہ بکن ۔من جیڑگے ءَ کپتاں کہ ہرکس کیت ءُُ پنجاہ ءُُ سد کلدار کم کنگ ءَ گش ایت اے واجہ پہ وش نہ انت کہ دروازگے چہ منی نہاد ءَ ہزار کلدار برز نبشتہ کنائیں ایت ۔
من ءَ پد ءَ گشتگ ۔۔توچیا حیران ئے وتی رسید ءَ جوڑ کن ۔۔۔‘‘ من ہچ نہ گشتگ ءُُ رسید واجہ ءِ گپ ءِ وڑ ءَ جوڑکرت ۔واجہ ءَ دیم پد ا گوں من کرت کہ دروازگانی سرکنگ ءِ باڑیاں ہم نبشتہ بہ کن گو دگہ پنچ سد کلدار چیر ءَ نبشتہ کرت ۔
کہ چینگ چینگ وال پنچ سد ءَ گیشتر نہ گرانت ۔ ملا ءَ پد ءَ دیم گومن کرت کہ باڑ ءِ پنچ سد کلدار ءَ کاٹ کن ءُ ہزار کلدار نبشتہ بکن من دگہ رسیدے نوک جوڑ کرت ۔باڑہ ہزار کلدار نبشتہ کرتاں ۔
ملا نہ وتی زبان چرپ کرت ءُُ گشتگ کہ تو چو بہ کن وتی رسید ءَ بہ زور ءُُ تاں ہما سیٹھ ئیگ ءَ بیا گوں من چہ واجہ ءَ لاچار بوتاں کہ واجہ ءِ حبر نہ کرت نہ کرت ۔ماکہ سیٹھ ئیگ ءَ سر بوتاں سیٹھ ءَ گشت کہ بیا ات ملا بہ نند ات ۔واجہ دیم ءَ من پشت ءَ دکان ءَ پترگ ءُُ نندگ بوت ۔
سیٹھ ءَ دیم گوں واجہ ءَ کرت وجاہ تو دروازگ زرتاں ؟ واجہ ءَ زبان چرپ کرت ءُُ گت جی ہو حاجی صاحب دروازگ من اے واجہ ءِ کر ءَ زرتگ انت اے واجہ ءِ رسید انت سیٹھ تو گوں مدرسہ ءَ باریں چنکس رعایت کنئے ۔من پسو دات واجہ ہزار کلدار ءِ رعایت ءَ من کناں کہ من ءَ او ں ثوابے رس ایت گوں بلکناں ہمے دروازگ مئے بہشت ءِ دروازگ بہ بنت ۔
گڑا سیٹھ ءَ چہ بیت ءُُ دو ہزار ءَ ہزار کلدارکاٹ کرت ءُُ بیست ءُُ یک ہزار کلدار من ءَ دات کہ اے تئی دروازگانی زرانت ما سیٹح موکل کرت ءُُ وتی دکان ءِ پاند ءَ رہادگ بوتاں ۔دکان ءَ کہ سربوتاں من واجہ ءَ را شیر چاہ ءُُ ہلواہ وارینتگ ءُُ گشت واجہ تو بے پکر بو تئی دروازگ بیگا ءَ ترا سر بنت چاراں تہ زمین سرایت ءُُ واجہ سرایت ۔