پاکستان ءِ جوڑ بوہگ ءَ پد ءُُ پیسر پاکستانی بلوچستان ءِ بازیں دمگے بلوچ ءِ مرزی ءُُ رزا ءَ ابید پنجاب ،سندھ ءُُ خیبر پختونخواہ ءَ ہوار کنگ بوتگ انت ۔

بلوچ مہلوک ءَ بازیں وہد ءُُ باریگاں اے ناروائیں کارپد ءِ حلاپ ءَ زہرشانی کتگ بلئے نزوریں بلوچ ءِ گپ ہچبر گوشدارگ نہ بوتگ انوں ذوتاں کہ پنجاب ءَ زرباری پنجاب ءِ صوبہ ءِ درجگ دئیگ ءِ جیڑہ دیم ءَ اتک گڑا پنجاب ءَ بلوچانی نیمگ ءَ اے لوٹ ءُُ طلب دیم ٗ۔

اتک کہ بائدیں پنجاب ءِ بلوچ دمگ کہ بندر ءَ بلوچستان ئیگ انتءُُ دگہ صوبہ یے ءِ جوڑ کنگ ءِ بدل ءَ پدا بلوچستان ءَ ہوار گیجگ بہ بنت بلئے وفاق ءَ پنجاب ءَ بلوچانی اے گپ دلگوش نہ دات ۔ وہدیکہ ہمے دور ءَ صوبہ خیبر ءِ ہما درائیں پشتو ن دمگ کہ پاکستان ءِ جوڑ بوہگ ءَ پد صوبہ خیبر ءِ تہا ہوار گیجگ نہ بوتگ ات انت صوبہ ءِ تہا ہوار کنگ بوت انت ۔

پشتون راج ءِ اے دومی سوب مندی ات۔ پشتون راج ءِ اولی سوب مندی ایش ات کہ آہانی صوبہ ءِ نام چہ ’’ سرحد‘‘ ءَ دور کنگ ءُُ خیبر پختونخواہ ایر کنگ بوتگ دومی جوانیں سوبمندی ایش بوت کہ انوگیں حکومت ءَ فاٹا ءُُ آئی کش ءُُ گورے درائیں دمگ صوبہ خیبر ءَ ہوار کت انت ۔ پاکستان ءِ جوڑ بوہگ ءَ پد پشتون راج ءُُ بلوچ راج دو انچیں راج ات انت کہ اشانی ڈگار بہر ءُُ بانگ کنگ بوتگ ات انت بلئے گوستگیں دہ سالانی میان ءَ پشتون راج ءِ دیریگیں لوٹ ءُُ تماہ منگ بوت انت۔

بلئے بلوچ راج ءِ اے لوٹ ءُُ طلب انگت منگ نہ بوہگان انت ۔ اے درگت ءَ بلوچ راج محرومی ءِ مارشت گیش بوہگ ءَ انت پرچکہ آہانی گمان ہمیش ات کہ بلوچ ءَ را پاکستان ءِ تہا ہما حق ءُُ وسیلہ دئیگ نہ بنت کہ پاکستان ءِ ایندگہ راج ءُُ قوماں دئیگ بنت اگاں چوش نہ انت گڈا وہدے فاٹا ءُُ ایندگہ دمگانی خیبر ءَ ہوار گیجگ ءَ وہدے ہچ سیاسی ءُُ نسلی اڑاند ءُُ جنجالے نیست گڈا بلوچ دمگاں بلوچستان ءَ ہوار گیجگ ءَ چونیں جیڑہ ءُُ جنجالے مان انت۔

بلوچ راج ءِ گوں وفاقی حکومت ءَ بازیں جیڑہ ءُُ جنجالاں یکے ایش انت کہ وفاقی حکومت اے دمگانی بلوچستان ءَ ہوار گیجگ ءَ دل جنت کہ ہنچو سال گوزگ ءَ پد بلوچستان ءَ ہوار گیجگ نہ بوہگ ءَ انت چوکہ جیکب آباد ، ڈیرہ اسماعیل خان ، ڈیر غٖازی خان ، کوہ سلیمان ، ملتان، بکھر ،شکار پور ،سانگھڑ ، ءُُ ایندگہ بازیں دمگ کہ اے وہد ءَ سندھ ،پنجاب ءُُ خیبر ءَ ہوار انت ۔

اے وہد ءَ کہ حکومت دلمانگ انت کہ بلوچ راج ءَ را اے مارشت بدنت کہ وفاقی حکومت بلوچستان ءُُ بلوچ ءِ بدواہ ءُُ دشمن نہ انت بائدیں بلوچ راج ءِ دل وشی ءَ اے گامگیج ءَ بزورایت ءُُ چو فاٹا ءِ وڑا بلوچستان ءَ سستگیں درائیں ہند ءُُ دمگاں بوبلوچستان ءَ ہوار بکنت چریشی ءَ وفاق ءَ یک فائدگے اے ہم بیت۔

کہ پنجاب ءُُ سندھ ءَ گیشیں آبادی ءِ بارے وت سرا وت بلوچستان ءَ شفٹ بیت ءُُ بلوچستان ءَ اے آبادی ءِ گر ءُُ دار پہ وفاقی حکومت ءُُ بلوچستان ءِ حکومت ءَ ارزان ءُُ وش تر بیت۔

اے درگت ءَ بلوچ سیاسی گل ءُُ رہشونانی ہم ذمہ واری انت کہ وفاقی حکومت ءِ سرا زور پر بدی انت کہ اے درائیں دمگ بن دپترءِ ردا بلوچستان ءِ بہر بوتگ انت ءُُ انگریز ءَ لٹ ءُُ پل ءُُ اے دمگ ءَ ناتپاکی ودی کنگ ءِ ہاترا ایشاناں چہ بلوچستان ءَ سستگ ءُُ ایندگہ صوبہاں ہوار کتگ اَنت۔