مکران پاکستان ءِ ہما دمگ انت کہ آئی ءَ چہ پاکستان نیشنل گرڈ ءِ بدل ءَ چہ ایران ءَ گروک رسگان انت بلئے پدا ہم مکران ءَ گروک ءِ نیستی ،کمی ءُُ دلسیاہی چہ پاکستان ءِ ایندگہ دمگاں ہچ وڑا کم نہ انت بائد ایش ات کہ بلوچستان ءَ گروک ءِ کمی ،بار ءِ کم کنگ ءِ گپ جنگ مہ بوت انت پرچکہ اے وہد ءَ چوایندگہ درورسیلہاں بلوچستان گروک ءِ درچ ءَ ہم ہما دمگ ( صوبہ) انت کہ چہ وتی کارمرزی ءِ کساس ءَ گیش ودی کنگ ءَ انت ۔

اے وہد ءَ بلوچستان ءَ چہ حبکو ، اوچ پاورپلانٹ ءُُ سوئی گیس پلانٹ ءَ کم چہ کم 22 سد میگاواٹ گروک ودی کنگان انت وہدیکہ بلوچستان ءِ گروک ءِ کلیں کارمرزی ایوک ءَ چاردہ سد انت ءُُ اگاں اے چاردہ سد ءِ تہا مکران ءِ ضلع تربت ،پنجگور ءُُ گوادر کشگ بہ بنت گڑا اے یک ہزار ءَ کیت ءُُ اوشیت چوکہ پاکستان ءِ ایندگہ دمگاں چوناہی ءَ پاکستانءِ گروک پورا کنگ ءَ نہ انت ۔

بلئے اگاں پاکستان ءِ واکدار کست ءُُ کینگ ءِ زہراں بورانت ءُُ انسانی تب ءِ رد ءَ اے وڑیں کارے بکن انت کہ اگاں بلوچستان ءَ ودی بوؤکیں22سد میگاواٹ گروک ءِ تہا بلوچستان ءَ چاردہ سد گروک بدینت گڈا اے گپ عالم ءَ پہ پاکستان ءِ وشنامی ءَ دیم ءَ کیت کہ چو نہ انت کہ سرجمیں پاکستان ءَ گروک ءِ کمی انت بلکیں اے گشگ پاکستان ءِ وشنامی ءَ نامے بیت کہ پاکستان ءِ یک دمگے ءَ سرجمی ءَ گروک است ءُُ ایندگہ دمگاں گروک ءِ سرجم ءُُ برجمی ءَ کار بنا انت ۔

بلئے اگاں پاکستان ءِ واکداراں اے کست ءُُ کینگ نیل ات گڈا بلوچستان ءَ چشیں لیڈر ءُُ رہشونے بوت انت کہ آئی ءَ بلوچ مہلوک ءِ اے توار داں واکدارانی گوشاں سرکتیں کہ مئے بزگی ءِ گناہ ءُُ میار؟ اگاں پاکستان ءِ واکدار چہ نیشنل گرڈ ءَ بلوچستان ءَ آئی ءِ حق ءُُ نصیب ءِ گروک ءَ نہ دئینت وَ مدئینت بلئے ہرچ گروکے کہ چہ ایران ءَ مکران ءِ سے ئیں ہنداں ( ضلعہاں) سربوہگان انت آبائدیں دارگ مہ بیت ( بلئے کئی گوش ءَ مورے بوارت؟) 

اگاں کہ ایران ءِ حکومت ءِ گشگ ایش انت کہ اگاں پاکستان ءِ حکومت اجازت بد انت آ دالبندن ،تپتان،ءَ ہوار درائیں بلوچستان ءَ گروک دئیگ ءَ ساڑی انت بلئے بلوچستان ءِ لاپ چاریں لیڈر ءُُ رہشون ہمے کار ءَ ہم کر ت نہ کن انت ۔

کہ بنجاہی حکومت ءَ زور پر بدیئنت ءُُ کھڈن بکن انت کہ ایران ءِ اے گپ ءُُ اجازت نامگ ایوک ءَ بلوچ مہلوک ءِ حق ءَ ناں بلکیں پٹھاناں ہوار ایندگہ راج ءُُ دمگانی ہم حق ءَ انت پرچکہ وہدے درائیں بلوچستان ءِ گروک ءِ نوبت ءَ ایران ءِ سرا بیت گڈا چہ پاکستان نیشنل گرڈ ءَ آؤکیں گروک کہ بلوچستان ءَ کارمرز بوہگان انت آ سر کیت ءُُ پاکستان ءِ واکدار اے سراتکگیں گروکءَ پہ وتی نپ ءُُ سیت ءَ کارمرز کت کن انت بلئے جہندم ایشی ءَ ہما گروک ءَ کہ اے وہد ءَ ایران مکران ءِ سے ئیں ہنداں دئیگ ءَ انت ۔

آ ہم نیم شلونگ انت ،گاہے وت انت ءُُ گاہے بے وت انت روچے است ءُُ دو روچ ءَ نیست۔اے گپ ءَ مہلوک سر پر بیت کہ چہ نیشنل گرڈ ءَ آوکیں گروک کم انت پمشکہ لوڈشیڈنگ بیت بلئے ایران ءِ حکومت ءِ کر ءَ وا گروک ءِ کمی نہ انت گڑا ایرانی گروک ءِ لوڈشیڈنگ ءِ جواز ءُُ توجیل چی انت پرچکہ مرچی 20 روچ انت ۔

کہ مکران ءِ سے ئیں دمگاں تربت ،گوادر،پنجگور ءَ گروک نہ گواہ ایت یکے مئی ،جون ءُُ جولائی ءَ مکران ہما دمگ انت کہ اودا گرمی 50 ڈگری برز بیت دومی انچو روچ ءَ گروک نہ بوہگ ءِ سوب ءَ مہلوک آپ ءِ نیستی ءِ آماچ انت یکے گرمی چہ برداشت ءِ حد ءَ ڈن ءُُ در انت ءُُ دومی آپ نہ بوہگ ءِ سوب ءَ مہلوک دوزہ ءِ آماچ انت اے وہد ءَ مہلوک ءِ جست ءُُ جواب گوں واکداراں ہمیش انت کہ مکران ءِ مہلوک ءَ پہ ملک ءِ حاکم ءُُ واکداراں چے گناہ ءُُ میار کتگ ؟

پرچکہ مکرانءِ کہن ءُُ کاریز پیسرا ہشک بوتگ انت نوں اگاں اے گرمی ءَ پہ ورگ ءَ آپ مہ بیت گڑا پدر انت کہ مہلوک ءِ آکبت ، مرگ انت بلئے ملک واکدار ءُُ حاکماں پہ مکران ءِ مہلوک مرگ ءَ چے رسیت؟ 

پمشکہ مئے گوں ملک ءِ حاکم ءُُ واکداراں گوں دزبندی ہمیش انت کہ مکران ءِ مہلوکءِ مپتء ءُُ حدا دوزہی ازاب ءِ آماچ مکن انت ہمنچک زوت بوت کنت چہ ایران ءَ آوکیں مکران ءِ گروک ءَ برجم بکن انت ءُُ اے رد ءَ جوان تریں گپ ایش بیت کہ ملک ءِ واکدار ایران ءَ درائیں بلوچستان ءَ گروک دئیگ اجازت ءَ بدئینت چریشی ءَ چہ نیشنل گرڈ ءَ بلوچستان ءِ نیمگ ءَ کارمرز بووکیں گروک سرکیت کہ پاکستان ءِ ایندگہ دمگ ،سندھ ،پنجاب ءُُ خیبر ءِ کار ءَ کیت ءُُ مکران ءِ مہلوک پہ ملک ءِ واکداراں دعا ءُُ حیرے کن انت ۔