عالمی گل ءِ دیمروئی ادارگ ءِ رپورٹ 2018 ءِ ردا بلوچستان اے وہد ءَ دنیا ءِ نیزگار ءُُ غریب تریں دمگ انت ۔اے رپورٹ ءِ ردا بلوچستان ءَ گوستگیں پنچ سالانی میان ءَ نیزگاری 71درسد گیش بوتگ وہدیکہ بلوچستان ءِ ہند(ضلع) بارکھان ءُُ ہرنائی دوانچیں ہند انت کہ ادا نیزگاری 91درسد گیش بوتگ ۔

اے رپورٹ ءِ ردا بلوچستان ءَ مردمانی روچ ءِ کٹ (آمدنی) چہ 2 ڈالر ءَ کمتر انت ۔ وہدیکہ بے روزگاری ءِ درچ ءَ بلوچستان دنیا ءِ درائیں دمگاں چہ پد منتگ ترا نت۔اگاں کہ پاکستان ءَ بلوچستان ءِ جاہ منندی حساب چہ ایندگہ دمگاں(صوبہ) کم ترانت، اے درگت ءَ بائدیں بلوچستان ءَ بے روزگار چہ پاکستان ءِ ایندگہ دمگاں کمتر بوت انت بلئے ادا حساب چٹ چپ انت ۔گلیں وانوکاں ! بژنی گپ ایش انت۔

کہ بلوچستان ءَ سی پیک ءِ پیش بندیانی بنا بوہگ ءَ پد بلوچستان ءَ 2013 ءِ حکومت ءَ بازیں اوگامے جت ءُُ وتی صاحبی دپ ءَ مزنیں گالے آورت کہ آھاں بلوچستان ءَ بازیں پروجیکٹ ءُُ منصوبہ آورتگ کہ چرآئی ءَ بلوچستان ءَ دیمروئی ءُُ وشحالی گیش بوتگ ۔

ایجوکیشن ایمرجنسی ءِ نام ءَ بازیں نام گپتی یونیورسٹی ءُُ کالجے جوڑ کنگ بوت بلئے ما ہما روچاں ہمے گشتگ ات کہ بنی آدم پہ وانگ ءُُ ایندگہ دیمروئیاں ہما وہد ءَ ساجو ءُُ ساڑی بیت کہ لاپ ءَ گژنگ ءُُ شدیک مہ بیت بلئے زاناں 2013 ءَ پد حکومت ءِ گمان ہمیش ات کہ مہلوک تہہ ءُُ توکی رازاں ہچبر سرپد ءُُ سہی نہ بیت ءُُ آ ہرچی کہ روتاک ءُُ پارٹی اوگانی پش در ءَ گش انت مہلوک ہماہاں باور کنت چہ حکومت ءِ نیمگ ءَ چشیں گپ ءُُ رپورٹے نیست کہ حکومت ءِ راز پاشک بہ بنت۔

حکومت ءَ اے جار ہم پرینتگ کہ آہاں چہ بنجاہی حکومت پہ دمگی مہلوک ءَ مزنیں فنڈ ءُُ مالے آورتگءُُ ہرچ کتگ دومی دست ءَ ماہے دو براں سی پیک ءِ پروجیکٹانی بنگیج ءُُ بنداتی کنگ بوت کہ بلوچستان ءِ دیمروئی چو نریں نریان ءَ انت کہ آئی ءَ کس داشت نہ کنت ہمے وڑا بلوچستان ءِ بازیں ہندی جاہ ءُُ دیان ماڈل سی پروجیکٹ دارگ بوت ءُُ چاگردی رسانک در ءَ آہانی پجار ءُُ دیم درائی بوت انت کہ بلوچستان چے حد ءَ وشحال ءُُ ازگار کنگ بوتگ۔

بلئے اقوام متحدہ ءِ اے رپورٹ ءَ گوستگیں حکومت ءِ اے درائیں اوگام چو روچ ءَ درا کت انت پرچکہ پیسر ءَ بازیں احوالکار ءُُ زانتکارانی گشگ ہمیش ات کہ بلوچستان ءَ بیروزگاری باز انت پمشکہ 2013 ءِ حکومت ءِ بائد ہمیش انت گیشتر روزگار بدنت ایشی ءِ یک توجیلے اے بوت کنت کہ حکومت ءَ نوکیں ہند(ضلع) جوڑ بکنت ءُُ بلوچستان ءِ گوستگیں ءُُ چیف سیکریٹری ءِ گشگ ءِ ردا کہ 37ہزار روزگار کہ است انت بائدیں پُر کنگ بہ بنت۔

اگاں اے نہ بنت گڑا ایشی مستریں گشواری ایش انت کہ بلوچستان ءِ قوم پرستیں پارٹی ءُُ لیڈر بائدیں بنجاہی سرکار ءَ مجبور بکن انت کہ گوں ایران ءَ چوبھارت ءُُ افغانستان بارڈر ءَ بیپار بنا کنگ بہ بیت پرچکہ اگاں تپتان ، پنجگورءُُ اے دگہ بارڈر انی سرااگاں کانودی ردا چوافغانستان ءُُ بھارت ءِ پیم ءَ کاروبار بنا کنگ بہ بیت گڑا بلوچستان ءِ مہلوک ءَ سرکاری نوکریانی حاجت نہ بیت بلئے چریشاں یکے ہم کنگ نہ بوت ۔

دومی نیمگ ءَ بلوچستان ءِ ہما دمگ کہ اودا کشت ءُُ کشاری ءُُ آپ کاری بوتگ انوں قحط ءُُ ڈکال ءِ سوب ءَ آہم چہ کار ءِ کٹ ءَ شتگ انت ۔پمشکہ گوستگیں 2013 پنچ سالی حکومت ءِ بے سریں کارانی سوب ءَ بلوچستان ءِ نیزگاری 71درسد گیش بوتگ نوکیں حکومت بائدیں اے رپورٹ ءِ پش در ءَ گوستگیں 2013 ءِ حکومت ءِ گامگیجاں بدل بہ کنت ۔

اول بلوچستان ءِ 37ہزار نوکری کہ است انت ایشاں پُر بہ کنت، دومی ڈکال ءِ گر ءُُ دار ءَ گامگیج بزور ایت ءُُ سیمی گوں ایران ءَ چو بھارت ءُُ افغانستان ءِ وڑا بارڈر ٹریڈ ءَ را کانودی رنگے بدنت اگاں نوکیں حکومت ءَ اے سے ئیں گامگیج زرت انت گڈا الم انت کہ نوکیں پاکستان ،بلوچستان ءَ ہم سرکش ات کنت۔