کسے منت شریاناں کہ افغان لڑ ءُُ بارکنوک ریاست ءِ دری کارانی پیش بندی ءِ بہرے انت کہ آئی ءَ را ملک ءَ ءُُ درملک ءَ ریاست ءِ زرباری ءُُ سینٹرل ایشیا ءُُ عالمی کارانی دیم بری ءَ کارمرز کنگ بیت اگاں کہ اے وہد ءَ وزیر اعظم ءِ گشگ ایش انت کہ اے ایوک ءَ راجی جیڑہ ءِ سرا آئی لیکہ بوتگ ءُُ اے سرکاری دیم بری کارے نہ بوتگ پمشکہ ایشیءِ سرا گیش زور ءِ جنگ نا سرپدی یے مردم زان انت۔

کہ ملکءِ وزیراعظم مپتِ حدا چشیں حال تران شنگ نہ کنت پدرانت کہ آئی ءِ پشت ءَ عالمی ،دمگی ، ءُُ ملکی لہتیں نپ ءُُ سیتی گپ ءُُ لیکہ است کہ آہاناں پدرا کنگ نہ بوہگ ءَ انت بلئے اے درچ ءَ وشتریں گپ ایش انت کہ وزیر اعظم ءِ جار ءَ پد سندھی _بلوچ رہشونانی نیمگ ءَ یک مزنیں زہر شانی یے دیم ءَ اتکگ ۔ اے گپ سہرا انت کہ ریاست بازیں کارے کنگ لوٹ ایت بلئے چوکہ ملک ءِ تہا بازیں راج ءُُ دمگانی مردم چہ ریاست ءِ اے دلمانگیاں وش نہ انت چوکہ ریاست چہ بندر ءَ اے کارانی گشواری ءَ دست ءُُ پاد جنگ ءَ انت۔

بلئے تنیگا آ اے کارانی گشاد کنگ ءَ سوبین نہ بوتگ ۔ وہد وہد ءِ سرا چہ حکومتی واکداراں اے وڑیں حال تران ءِ شنگ کنگ ءِ مستریں مولءُُ مراد ہمیش انت کہ زانگ بہ بیت کہ ریاست وتی کارانی گشادی ءَ چے حد ءَ سوب مند بوتگ ءُُ آئی ءَ داں چے حد ءَ دگہ کار کنگی انت ۔ ریاست ءِ افغان لڑ ءُُ بار کنوکیں مردماناں پاکستانی جاہ منندی شناس نامہ دیئگ ءِ سرا بی این پی ءِ کماش اختر مینگل ءِ اے جوانیں لیکہ یے ات کہ مئے ریاست دنیا ءِ ایوکیں ملک انت۔

کہ اے کچ ءَ مردماناں جاہ منندی شناس نامہ دئیگ لوٹ ایت وہدیکہ دنیا ءَ ایندگہ درائیں ملک وتی جاہ منندی بہر ءُُ حساب ءَ کم کنگ لوٹ انت پدا تنیگا دنیا ءِ ہچ ملک ءَ 80لکھ مردم یکجاہ شناس نامہ نہ داتگ اے ملک کہ پہ ڈیم ءِ بندگءَ پنڈایت ءُُ پدا لانکے بستگ کہ 80لکھ مردماں ملک ءِ جاہ منندی اجازت ءَ دنت ،اختر مینگل ءِ اے گپاناں چاگردی رسانک در ءَ جوانیں وڑے ءَ ساڑاہگ بوتگ پرچکہ افغان لڑ ءُُ بار کنوکیں مردمانی سرا ایوک ءَ بلوچ ءُُ سندھی ناوش نہ انت۔

بلکیں ہماپٹھان ہم وش نہ انت کہ چہ بندر ءَ برٹش بلوچستان ءِ بہر بوتگ انت ءُُ اے دمگانی بنکی ءُُ بندری مردم انت آہاں گلہ ایش انت کہ دنیاءَ ہما مردماں ادارکی یا دائمی جاہ منندی اجازت نامگ دئیگ بیت کہ پہ سیاسی جیڑہ یے یا انسانی حقانی جیڑہ ءِ سرا دراں ڈیھ کنگ بنت ءُُ آہانی مادری ملک آہاناں دزگیر کنگ ،کشک یا ناروائیں وڑے ءَ سزا دئیگ لوٹ ایت اے نوکیں راہبندے نہ انت۔

دنیا درائیں مہذب ءُُ میار جلیں راجانی تہا اے ربیدگ چہ بن ءُُ ازل ءَ بوتگ چوکہ بلوچ ءُُ پٹھان ربیدگ ءَ باہوٹ ءُُ پناہ ءِ ربیدگ ،اصل ءَ عالمی تک ءَ اے ہمے ربیدگ ءِ یک رنگ ءُُ دروشمے بلئے اے پناہ ءُُ باہوٹی ہچ ملک ءَ ناشر ،دز،ڈنگ ، ءُُ ایندگہ چاگردی سل کاریاں ہواریں مردماں دئیگ نہ بیت چوکہ افغان لڈ ءُُ بار کنوک ۔افغان لڑ ءُُ بار کنوک اے حاترا اے درچ ءَ اتک نہ کن انت پرچکہ افغانستان ءِ حکومت چہ 2004 ءَ پریات ءُُ زاری کنگان انت کہ آئی ءِ ملک ءِ لڑ ءُُ بار کنوکیں مردم پدا ملک ءَ بیا انت ۔

پرے حاترا آہاناں کار ءُُ روزگار دئیگ بیت بلکیں 4سال ساری افغانستان ءِ حکومت ءَ گوں عالمی گل ءِ کمک ءَ افغان لڈ ءُُ بار کنوکیں مردماں پہ افغانستان ءِ آہگ ءَ زر ءُُ مال دات ۔ اے درچ ءَ افغانستان ءِ حکومت ءَ اے بہتام جتگ کہ پاکستان ءِ حکومت 80لکھ افغان لڑ ءُُ بار کنوکیں مردماں افغانستان ءِ آہگ ءَ دارگ ءَ انت ۔ ادا گپ ایش انت کہ وہد ے یک ملکے پریات کنت کہ آہانی مردماں آہانی ملک ءَ دیم دئیگ بہ بیت بلئے ملک ءِ حاکم زرواکی ءَ گش انت کہ ناں ما تئی ملک ءِ مردماں پہ زور ءُُ زبردستی شناس نامہ دئیں ۔

اے درگت ءَ افغانستان ءِ بہتام ایش انت کہ پاکستان ءِ حکومت افغان لڑ ءُُ بارکنوکیں اے مردماں افغان سرزمین ءِ حلاپ کارمرز کنگ لوٹ ایت بلئے اگاں پاکستان ءِ حکومت ارداہ ایش نہ انت کہ آ افغان لڑ ءُُ بار کنوکاں افغانستان ءِ حلاپ کارمرز کنگ نہ لوٹ ایت گڑا بائدیں افغاناں ذوت افغانستان ءَ دیم دئیگ ءِ بندوبست کنگ بہ بیت ۔ اے کار چہ 40لکھ ٹن گندیم ءِ دئیگ ءَ شرتریں کارے پرچکہ اگاں 80لکھ مردم چہ پاکستان ءَ افغانستان ءَ بروت گڑا پاکستان ءِ قحط ءُُ ڈکال وت ہلاس بیت ءُُ ہچ پاکستانی،حکومت ءَ پرے کار ءَ شگانے ہم نہ جنت!!