بلوچستان ،پاکستان ءِ کسانیں دمگے بل کہ چہ زمینی حساب ءَ مزن ءُُ پراہ اِنت بلئے آباتی ءِ حساب ءَ پاکستان ءِ کسان تریں صوبہ انت بلئے ایشیءِ بے روزگاری چہ اے دگہ دمگاں گیشتر انت ءُُ ایشیءِ مستریں وجہ سرکار ءِ نہ دلگوشی انت ۔
سرکار سالانی سراں نوں پوسٹے کریٹ کنت پمشکا بے روزگاری روچ پہ روچ گیش بوہان اِنت ۔یک وہدے بوتگ کہ ایوک ءَ چپراسی ءُُ پولیس ءِ پوسٹاں ہزارانی حساب ءَ مردماں کاگد جمع کتگ اَنت بلئے مرچی دنیا ءِ مستریں چکاساں چہ دو بزاں سی ایس ایس ءُُ پی سی ایس ءِ وڑیں چکاساں ہم ہزاراں حساب ءَ مردم کاگد اں جمع کن اَنت ۔
انوگیں سی ایس ایس ءِ چکاس ءَ یازدہ ہزارا کاگد جمع بوتگءُُ پی سی ایس ءَ دہ ہزار ءَ گیش مردماں کاگد جمع کتگ ایشاں چہ زیات سد ءُُ پنجاہ مردم سوبمند بہ بیت ءُُ اصل مردم ہم ہمیش اِنت ۔اے دگہ بے روزگاری ءِ سوب ءَ ہررنگیں پوسٹے کیت انت جمع کنوکائینت ۔دوست ءُُ نادوستی ءِ گپ شتگ نوں ہروڑیں پوسٹے کیت درائیں مردم جمع کن اَنت کہ کجا ڈک ءَ بہ کپ ایت ۔
درائیں ورنا ہاں بی اے ءَ سر گوز ایم اے ءُُ ایم فل کتگ ءُُ انگت ءَ بے روزگار اَنت یک ءُُ دو سال ءَ پددرائیں پوسٹانی حاترا پی ایچ ڈی کتگیں مردم افلائی کن اَنت ۔ءُُ آ قوم ءُُ راج کجا دیمروئی کت کنت کہ آئی ءِ پی ایچ ڈی پہ نائب قاصدے پوسٹے ءَ اوں کاگداں جمع بہ کن اَنت ۔انوں لہتیں روچ پیسر پنجگور ءَ یک ورنائے ءَ بے روزگاری ءِ سوب ءَ وت کشی ءِ جہد کتگ ءُُ وتارا سوتکگ ہمے رنگیں یک وئیلے ڈیر ہ بگٹی ءِ دمگاں بوتگ۔
یک ورنائے ءَ بازیں چکاساں سوبمند بوہگ ءَ پد ہم نوکری نہ رستگ آئی ءَ سادے گٹ کتگ ءُُ وتکشی کتگ۔یک قومے ءِ وانندگیں ورنا بے روزگا ر بہ بنت آ راج کجا دیمروئی کت کنت ۔سرکار اگاں بلوٹ ایت داں اے درائیں مردم روزگار دئیگ بوت کن اَنت بلئے دل ءَ پہ واجہ ءَ بدی یے نیست انت ،یک بے روزگاری ءِ سوبے ہمیش اِنت ءُُ دومی ایش کہ کس فلیڈ پروفشنل نہ اِنت بلکیں چکاس ءِ سوبمندی ءِ دمب ءَ اِنت۔
آ چکاس تُری ہروڑ ءُُ ہررنگینے بہ بیت ،آ دوستی ءُُ نادوستی ءِ سرا نہ اِنت بلئے روز ءُُ بے روزگاری ءِ سرا انت من پیسرا ہم ہمے بابت ءَ نبشتہ کتگ اَت کہ مئے ہلک ءَ کئیر کونسلنگ نیست انت اگاں بوتیں داں مرچی ما پرے حال ءَ نہ بوتاں ۔پدا چش بیت کہ لہتیں انچیں مردم است کہ آ یک پوسٹے ءَ ہم نہ اوشت اَنت۔
زاہر انت ہرکس وتی آسودگی ءَ چارایت بلئے آ ایز نہ چاریت کہ اگاں آ یکبرے ہمے پوسٹءَ سد مردماں چہ باج بارت ءُُ دوہ ماہ ءَ رند ہمے پوسٹ ءَ یلہ دنت ءُُ پوسٹ پدا حالی بیت آ بے روزگارانی دل ءَ چے گوزیت کہ وتئے ہم نہ کت ءُُ مارا ہم نیشت ات۔چنائی ءَ پاکستان ءِ درائیں دمگاں بے روزگاری اِنت بئید چہ یک دمگے ءَ بزاں پنجاب ءَ آبادتی وَ باز انت بلئے بے روزگاری ءِ درسد کم انت۔
ءُُ اے دگہ دمگانی آباتی وَ کم انت بلئے بے روزگاری ءِ درسد باز انت۔نوکیں سروزیر ءُُ مزن وزیر گپ وَ بلا بلائیں کناں بلئے ایشاں چہ اگاں یک ءُُ دو پرسنٹ ہم عمل بہ بیت داں بلوچستان ءِ بے روزگار ءِ جیڑہ کم چہ کم اگاں سرجمی ءَ ہلاس نہ بیت داں کمتر بوت کنت ۔
بلوچستان ءِ مزن شہر ءُُ بلوچستان ءِ کیپٹل کوئٹہ ءِ درائیں ہاسٹل ءُُ پلازہانی اگاں پولکاری یے کنگ بہ بیت داں بے روزگاریں ورناہانی یک مزنیں لڑے درکیت ءُُ ہما کہ وانگ ءَ شر بوتگ انت ءُُ آواں چہ امیتے دارگ بوت کت کتگ آ بے روزگاری ءِ سوب ءَ پولیس ءُُ چپراسی ءِ وڑیں چکاسانی سرا ہم وتی کاگداں جمع کن اَنت کہ چہ ہچی ءَ ہچ۔۔۔۔۔آں یک روزگارے بلوچ بے روزگاراں است انت کہ روزگار ءِ شوہازی ءَ بے روزگار نہ اِنت۔