سعودی وزیرِ خارجہ فیصل بن فرحان کا کہنا ہے کہ ایران کے ساتھ مذاکرات خوش گوار رہے ہیں، ایران کے ساتھ بات چیت کے لیے سنجیدہ ہیں۔

افغانستان کے قائم مقام معاون وزیر برائے اطلاعات و ثقافت ذبیح اللّٰہ مجاہد کا کہنا ہے کہ ہم تہیہ کر چکے ہیں کہ افغانستان سے داعش کا صفایا کر دیں گے۔

روسی صدر پیوٹن کا کہنا ہے کہ افغانستان کی صورت حال آسان نہیں ہے، افغانستان میں امریکی مداخلت کے افسوسناک نتائج نکلے ہیں، امریکی مداخلت نے خطے اور دنیا بھر میں دہشت گردی میں اضافہ کیا ہے، عراق اور شام سے عسکریت پسند افغانستان آ رہے ہیں۔

افغانستان کے صوبے کنڑ میں بم دھماکا سے ضلع شگل کا پولیس چیف ہلاک اور 11 افراد زخمی ہو گئے۔غیر ملکی خبر ایجنسی کے مطابق طالبان عہدیدار کا کہنا ہے کہ دھماکا کنڑ کے دارالحکومت اسدآباد میں ہوا، دھماکے میں شگل ڈسٹرکٹ پولیس چیف کی گاڑی کو نشانہ بنایا گیا۔

دبئی: قطر کے وزیر خارجہ نے کہا ہے کہ افغانستان اور اس کے نئے طالبان حکمرانوں کو تنہا کرنا کوئی جواب یا دلیل نہیں بلکہ سابق باغیوں سے رابطہ کرنے سے اُن میں موجود اعتدال پسند آوازوں کو تقویت ملے گی۔ شیخ محمد بن عبدالرحمٰن الثانی نے قطر میں ہونے والی سفارتی اجلاس کے دوران یہ بات کہی جہاں طالبان نے برسوں سے سیاسی دفتر قائم کر رکھا ہے۔

سعودی عرب  میں میدان عرفات گزشتہ روز  دنیا کا گرم ترین مقام بن گیا ۔ جہاں گزشتہ روز  درجہ حرارت 43 سینٹی گریڈ ریکارڈ کیا گیا۔سعودی عرب کے ماہر موسمیات ڈاکٹر عبداللہ المسند نے ٹوئٹر پر ایک پوسٹ میں بتایا کہ گزشتہ روز مکہ معظمہ میں گرم ترین دن گزرا۔

تائی پے: تائیوان میں 13 منزلہ رہائشی عمارت میں آتشزدگی سے 25 افراد ہلاک اور متعدد زخمی ہوگئے۔غیر ملکی خبررساں ادارے کے مطابق تائیوان میں 13 منزلہ رہائشی عمارت میں رات گئے اچانک آگ بھڑک اٹھی جس نے دیکھتے ہی دیکھتے شدت اختیار کرلی اور پوری عمارت کو لپیٹ میں لے لیا، واقعہ کے بعد آگ بجھانے اور عمارت میں پھنسے افراد کو باہر نکالنے کے لیے ریسکیو آپریشن شروع کیا گیا جس کے نتیجے میں 55 افراد کو زخمی حالت میں اسپتال منتقل کیا جب کہ 14 افراد کی لاشیں عمارت سے نکالی گئیں۔

اوسلو: ناروے میں ایک شخص نے تیر کمان سے حملہ کرکے 5 افراد کو ہلاک اور 2 دیگر کو زخمی کردیا۔غیر ملکی خبر ایجنسی کے مطابق ناروے کے قصبے کانگس برگ میں ایک تیر کمان بردار شخص نے ایک سپر مارکیٹ کے قریب لوگوں پر تیر برسانے شروع کردیئے جس کے نتیجے میں 5 افراد موقع پر ہی ہلاک جب کہ دو زخمی ہو گئے۔ زخمیوں میں ایک پولیس افسر بھی شامل ہے۔

صنعا: اسرائیلی فضائیہ کی شام میں بمباری سے 4 فوجی اہلکار ہلاک ہوگئے۔غیر ملکی خبررساں ادارے کے مطابق اسرائیلی طیاروں نے شام کے شہر پالمیرا میں فوجی تنصیبات کو نشانہ بنایا جس کے نتیجے میں 4 فوجی اہلکار زخمی اور متعدد زخمی ہوگئے، اسرائیلی طیاروں نے علاقے میں مواصلاتی ٹاورز کو بھی نشانہ بنایا اور تباہ کردیا۔ شام میں موجود برطانوی این جی او کے مطابق اسرائیلی طیاروں نے حملے میں ایران کی تنصیبات کو نشانہ بنایا گیا جب کہ حملے میں ایرانی ملیشیا کے اہلکار بھی مارے گئے ہیں۔

جاپان کے وزیراعظم کی جانب سے آج پارلیمنٹ کی تحلیل اور نئے انتخابات کا اعلان متوقع ہے۔وزیراعظم فُومیو کیشیدا نے 4 اکتوبر کو اعلان کر دیا تھا کہ 31 اکتوبر کو الیکشن کرائے جائیں گے۔