پہلگام واقعے کے بعد پوری دنیا کی نظریں پاک بھارت کشیدگی پر لگی ہوئی ہیںِ دونوں ممالک ایٹمی قوت ہیں اگر جنگی ماحول میں شدت آیا اور بھارت نے پاکستان پر کسی طرح کی مہم جوئی یا حملے کی کوشش کی تو یقینا اس کا جواب بھی اسی طرح دیا جائے گا جو خطے کیلئے غیر معمولی حالات کا سبب بنے گا جس سے پورے ریجن میں ایک غیر یقینی کی صورتحال پیدا ہوگی۔ بھارت کی جانب سے مسلسل حملوں کی دھمکیاں اور اشتعال انگیزی کا مظاہرہ کیا جارہا ہے جس پر حکومت پاکستان نے ردعمل دیا ہے اب پاک فوج نے بھی دوٹوک اور واضح پیغام دیا ہے کہ بھارتی جارحیت کامنہ توڑ جواب دیا جائے گا۔
مقبوضہ کشمیر کے علاقے پہلگام واقعے کے بعد بھارت کی جانب سے بغیر شواہد کے پاکستان پر الزامات لگائے گئے اور پھر انتہائی عجلت میں سندھ طاس معاہدہ معطل کرنے، اٹاری چیک پوسٹ بند کرنے سمیت مختلف اقدامات اٹھائے جو کہ جنگی حالات پیدا کرنے اور خطے میں کشیدگی بڑھانے کاسبب بنیں گے ۔
مقبوضہ جموں و کشمیر کے سیاحتی علاقے پہلگام میںحملے کی پاکستان سمیت تمام عالمی برادری مذمت کررہی ہے یقینا یہ قابل افسوس واقعہ ہے مگر بھارت کی جانب سے بغیر کسی ثبوت اور تصدیق کے پاکستان پر الزام لگانا ہرگز قابل قبول نہیں ہے۔
