مکران ءَ 12 سال ءَ قحط ءُُ ڈکال ءَ پد یک جوانیں ہور ءُُ بارانے اتک کہ آئی ءَ مکران ءِ سوتکگیں ڈن ءُُ پٹ ، ڈگار ءُُ بست ،بل ءُُ کمبیل آپدار کت انت۔ بلئے ابرمی ہچ شے بنی آدم ءِ دست رس ءَ نہ انت پمشکہ دورسریں کوران آپ کت ءُُ بازیں بازار ءُُ بندے بُرت۔

نوکیں زمانگ ءَ استان ءُُ ریاست ماتے ءِ بدل انت کہ آہانی کار وتی زہگ ( جاہ منندانی ) پہازگ ءُُ سنبالگ انت بلئے بدبحتی ءَ مکران ءَ استان ءُُ ریاست ءِ جہگیراں ایوک ءَ ووٹ ءِ وہد ءَ بزگیں مہلوک گیر کیت ، نہ اشاں ڈکال ءُُ قحط ءِ زمانگ ءَ مہلوک ءِ گورسی کرتگ ءُُ ننکہ انوں ہار ءُُ ہیئروپانی وہد ءَ ءُُ ننکہ اے دلمانگ انت کہ مہلوک ءَ را کمکے دئیگ بہ بیت دومی بدبحتی ایش انت کہ بلوچ ہار آماچ بہ بنت ، زمین چنڈ ءُُ ڈکال آماچیں مردم ، آہانی پہ زور رسانک در ءَ دور دارگ بیت۔

ایوک ءَ اے حاتر ءَ کہ دنیا ءَر ا گشگ بوت بہ کنت کہ بلوچ وشحال ءُُ بے جیڑہ انت اگاں اے گپ استان ءِ نیمگ ءَ سیاسی پشدر ءَ چارگ بہ بیت گڑا دردے پہ دو بلئے چاگردی جیڑہاں اے وڑیں لیکہ ءِ دارگ ایوک ءَ بلوچ ءَ بزگ کنگ ءَ ابید دگہ ہچ نہ انت ۔ پرچکہ ہمے وڑیں ویل وہدے ملک ءِ ایندگہ دمگاں کاینت گڈا حکومت ءِ کارندہ دمان ءَ جاڑ کگ بنت بلئے وہدے بلوچ میتگ ءُُ ہلکاں کاینت گڑا کسی گوش ءَ مورے نہ وارت ۔

گوستگین 12سال ءِ ڈکال ءَ بلوچستان ءَ مزنیں کشارے ، درچکے ءُُ دلوتے بیران بوتگ ءُُ بازیں گل ءُُ مردمانی نیمگ ءَ اے حال ہم شنگ کنگ بوتگ ات کہ بلوچستان ءَ ’ ’ آفت زدہ‘‘ کرار دئیگ بہ بیت بلئے نہ بوت ءُُ ابرمی رنگ ءُُ بلوچستان ءِ ڈکال پرشت ۔ ڈکال ءِ پروشگ وتی جاگہ بلئے انوگیں ہار ءُُ ہیروپاں کیچ ،تمپ،دشت،ہیرونک،ہوشاب ،میری ، ناصر آباد ءُُ ایندگہ بازیں دمگاں بدی بیرانی بوتگ ۔

حالانی رد ءَ بلوچستان ءِ بازیں دمگاں کم چہ کم 10 مردم بیران بوتگ ءُُ 20 مردماں گیش ٹپی بوتگ انت بلئے حکومت ءِ نیمگ نہ اے مرتگیں مردعمانی کمک ءُُ مدد کنگ بوتگ ءُُ ننکہ ٹپی ئیں مردمانی ۔ دومی دست ءَ سدانی حساب ءَ مردمانی لوگ ءُُ جاگہ ءُُ دلوت ءُُ کشار ہار ءَ برتگ انت ءُُ بازیں دمگاں مہلوک بے سر ءُُ سامانی ڈن ءُُ پٹانی سرا کپتگ انت ۔ اے بزگ ءُُ بے کسیں مہلوک ءِ حال ناں حکومت ءَ گپتگ ءُُ ننکہ راج دوست ءُپ چاگردی کارکنوکاں ۔

البت حکومت بہ بیت یا چاگردی کارکنوک یا چاگردی رسانک در ءَ گشادیں نبشتہ کار گیشتر جنین آدمانی حقانی بڑ ءَ کپتگ انت کہ مردین پرچہ آہاں گشان سرادئینت بلئے ہمے نبشتہ کار ہمے وہد ءَ ہم بے حال بوتگ انت کہ انوگیں ہار ءُُ ہیروپاں بلوچستان ءِ بازیں دمگاں زالبول ءُُ جنین آدم بے سروسامانی ، بے سپاہی ، بے مال ءُُ وردنی در پہ در کپتگ انت بلئے اشانی واستہ کس ءَ دو دانک نبشتہ نہ کتگ ۔

دومی نیمگ ءَ بلوچستان ءِ سیاسی گلانی ہم حال ہمیش انت کہ اے گلانی رہشون اے جار ءَ پرین انت کہ ما میرانی ڈیم ءِ آپ کس ءَ ندیاں ، ڈیم ءِ آپ گوادر ءَ برگ ءَ نیلگ ءِ سرا پارٹیءِ سنیٹر گوں کمشنر ءُُ ڈی سی آں گندونند کن انت بلئے ہمے رہشونانی ہمساہگءُُ ہم ملکی مردم ہار ءُُ ہیئروپانی سوب ءَ کہ بے لوگ ءُُ بے جاہ بوتگ انت آ ایشانی گپ ءَ نہ گوں ڈی سی آں کن انت ءُُ ننکہ گوں کمشنراں ءُُ ننکہ پریشاں کمیٹی یے جوڑ کن اَنت۔