سندھ حکومت نے بالآخر مستقل بنیادوں پر کراچی واٹر اینڈ سیوریج بورڈ کا مستقل منیجنگ ڈائریکٹر تعینات کردیا، سید صلاح الدین کو 4 سال کیلئے ایم ڈی تعینات کیا گیا ہے۔
چیف سیکریٹری سندھ سہیل راجپوت کی جانب سے جاری نوٹیفکیشن کے مطابق سید صلاح الدین کو 4 سال کیلئے کراچی واٹر اینڈ سیوریج بورڈ کا منیجنگ ڈائریکٹر (ایم ڈی) / چیف ایگزیکٹو آفیسر تعینات کردیا ہے۔
سید صلاح الدین گریڈ 19 کے پی اے ایس افسر ہیں، گزشتہ دنوں صوبائی کابینہ نے ان کی بطور سی ای او کراچی واٹر اینڈ سیوریج بورڈ تعیناتی کی منظوری دی تھی۔
نوٹیفکیشن کے مطابق سید صلاح الدین پروجیکٹ ڈائریکٹر کراچی واٹر اینڈ سیوریج سروسز امپروومنٹ پروجیکٹ کے طور پر بھی کام جاری رکھیں گے، مستقل پروجیکٹ ڈائریکٹر کی تعیناتی تک یہ عہدہ ان کے پاس رہے گا۔