چوناہا احوالکارانی کار حال ءُُ احوال سر کنگ انت۔ سیاست ءَ بہ گر تاں زند ءُُ راجمان ءِ ہمک پڑ ءَ ہمروچی چست ءُُ ایرانی باروا لس مہلوک ءِ سرپدی دئیگ انت بلئے لہتیں روچ انت کہ احوالکارانی سرا انچیں قہرے کپتگ کہ آہانی وتی حال تباہ انت۔چوناہا احوالکارانی کار حال ءُُ احوال سر کنگ انت۔ سیاست ءَ بہ گر تاں زند ءُُ راجمان ءِ ہمک پڑ ءَ ہمروچی چست ءُُ ایرانی باروا لس مہلوک ءِ سرپدی دئیگ انت بلئے لہتیں روچ انت کہ احوالکارانی سرا انچیں قہرے کپتگ کہ آہانی وتی حال تباہ انت۔

سعودی احوالکار جمال خشوگی ماں قطر ءَ انچو گڈگ ءُُ کشگ بوت کہ آئی ءِ جون ہم کس ءَ نہ دیست۔ ہمے وڑا امریکہ ءِ صدر ڈونلڈ ٹرمپ ءَ را یک جستے ءِ سبب ءَ سی این این ءِ احوالکار جِم اکوسٹا ءَ را وائٹ ہاؤس ءِ پُتریگ ءَ پابندی جنگ بوت چیا کہ ٹرمپ ءَ را آئی ءِ جُست بوت نہ بوت۔اے جاور مئے ملک ءِ احوالکاری گِنت کہ راستیں گپ جنگ گناہ انت پمشکہ اگاں کسے راستیں احوالکاری کنگ لوٹیت آئی ءَ را ماں الیکٹرونک ءُُ پرنٹ میڈیا ءَ برداشت کنگ نہ بیت۔

یا وَ آئی ءَ رادروگ بندگی انت یا حاموش بوہگی انت گڈا آئی وتی کارءُُ روزگار ءَ برجم داشت کنت۔ آہم دؤر اِتنت کہ ہما مردماں احوالکاری ءِ پڑءَ دور کت کہ آہانی گورا یک محکمیں لیکہہ (نظریہ) ءُُ سوچ ئے ات۔ آہان پہ وتی مہلوک یا راج ءِ گہتری، وشحالی یا ظالمیں حاکمانی ظلم و زوراکیاں رکّینگ ءِ جہد کت۔ اے جہدیاوَ گوشتناکی رنگ ءَ ات یا نبشتہی دروشم ءَ۔ بلئے مقصد ہمیش اَت کہ وتی ذاتی نف ءَ یک کرّ کنگ ءُُ پہ لس راجی فائدگانی گرگ ءَ سوبین بوہگ ات۔

مرچی وہد بدل بوتگ، احوالکاری ایوکا اشتہار ءُُ بزنس ءِ وسیلہ ءِ جوڑ بوتگ۔ ہما کس میڈیا ءِ ’ فیلڈ ‘ءَ سوبین بوت کنت کہ آئی ءَ مزنیں بزنس ئے بہ بیت یا وَ سرکارءِ ہمینچو چاپلوسی ءَ بہ کنت کہ سرکار چرائی ءَ وش بہ بیت ءُُ آئی ءَ را مزنیں کچّ ئے ءَ اشتہار بہ دنت۔

پمیشکہ مرچی باندا نظریہ، سوچ یا لیکہ سرگنوکی جیڑہ انت، راستین ءُُ سلہیں احوالکار نہ سرکار ءَ دوست بنت ءُُ نہ وتی جندے ادارہاں نشت کن انت۔ مرچی ہمے سبب انت کہ ہما نظریاتی یا کمّو باز راستین کنوکیں احوالکار چہ رسانکی ادارہاں کشگ بوہگ ءَ انت۔ آہانی گپ ءُُ لیکہ حاکماناں دوست نہ بنت ءُُ نئیکہ رسانکی ادارگ پہ ایشاں وتی روزی روٹی ءَ لگت مال کت کننت۔

گوستگیں روچاں وہدیں عمران خان پہ پنڈ ءُُ ونڈءَ ملکانی دورہ ءَ اَت گڈا ملک چین ءَ ہم شتگ ات۔ اُدوا یک ہمے وڑیں پنڈ ءُُ ونڈی مراگشے جم دارگ بوتگ ات کہ سروزیر عمران خان ءَ گشتانگ دیگی ات۔ ملک ءَ ہمے گپ بوہگ ءَ اتنت کہ ملک وار انت، آئی ءِ خزانہ حالیگ انت لہذا سروزیر شتگ ءُُ زرّ کاریت۔ سرکاری ٹی وی (پی ٹی وی) ءِ کارندہاں ہم ہمے گپ اشکتگ اتنت، ۔

آہاں گَلے چت کہ مئے واجہہ ءُُ حاکم پمّا زرّ کاریت ۔ پد ءَ پی ٹی وی ءِ ایم ڈی ریٹائریں فوجی اَت۔ آہاں چین ءِ صوبہ بیجنگ ءِ بدل ءَ Begging(انگریزی ءَ ایشی ءِ مطلب پنڈگ انت)نبشتہ کت کہ پاکستان ءَ ہوار دنیا ءِ دراہیں مہلوکاں دیست کہ پاکستان ءِ سروزیر چین ءَ ماں پنڈگ ءِ لوٹ ءَ انت۔نوں اگاں پی ٹی وی ءِ ’ ایم ڈی‘ یک لبزانت ءُُ احوالکارے ءِ بدل ءَ ریٹائریں فوجی ئے بیت۔

گڈا حال ہمیش بیت کہ بیجنگ ءَ را بیگنگ (Begging) نبشتہ کنگ بیت۔عطالحق قاسمی ملک ءِ یک نامداریں احولکار ءُُ لبزانتے۔ آئی ءَ بازیں کتاب نبشتہ کتگ ءُُ روتاک جنگ ءَ آئی ءِ نبشتانک چھاپ بنت۔ من ءَ آئی ءِ نبشتانک دوست بنت چیا کہ آ سیاسی ءُُ ادبی جیڑہانی باروا انچیں مزاحیہ انداز ءَ نبشتہ کنت کہ مردم ئے دل وش بیت۔ اے مرد ساری ءِ سروزیر نواز شریف ءِ مزنیں منوگرے ات۔

وتی نبشتانک ءَ مدام آئی ءِ گلا ءُُ ستا ءِ کتگ ات پمیشکا آئی ءَ را پہ مزّ پی ٹی وی ءِ سروک جوڑ کنگ بوت ءُُ مزنیں کچّ ئے ءَ پگار اش دات۔ وہدے نواز شریف ءِ سرا قہر کپت ءُُ آئی ءَ را کورٹ ءُُ کچہری ءِ ذریعہ ءَ ول گوج کنگ بوت گڈا ہرکس ءَ کہ آئی ءِ پلہ مرزی کتگ ات،ہمراہ داری کتگ ات گلا ءُُ ستائے کتگ ات آہانی سرا ہم قہر دؤر دئیگ بوت۔ہمے رم ءَ عطالحق قاسمی ہوار اَت گڈا چیا بکشگ بوتیں۔

ملک ءِ مزنیں عدالت ءَ آئی ءِ حلاف ءَ فیصلہ دات ءُُ گُشت کہ عطالحق قاسمی ءِ پی ٹی وی ءِ منیجنگ ڈائریکٹر کنگ قانود ءِ ردارَدیں کارے بوتگ۔ایشی ءِ سزا ایش انت کہ عطالحق قاسمی ءَ ہرچ پگارے گپتگ آہاں سرکار ءَ واپس بہ کنت۔

چوناہا باید انت کہ اگاں عطالحق قاسمی ءِ اگدہے دئیگ غلط بوتگ گڈا ایشی ءِ سزوار ملک ءِ حاکم انت۔ پدا اے گپ ءَ کسے منّ ات کنت کہ عطالحق قاسمی وت پاد بئیت ءُُ ڈائریکٹ ایم ڈی ءِ اگدہے ءِ سرا بہ نندیت۔

اے یک مزنیں Processئے کہ ایشی ءَ انفارمیشن ڈیپارٹمنٹ ءَ ابید دگہ بازیں ادارہ ہوار انت کہ آہانی مشورہ ءُُ سکین گون بنت بلئے نواز شریف ءِ منوگر بوہگ ءِ سزا وَ دیگی ات گڈا اے گپ ءَ کئے مان کاریت کہ عطالحق قاسمی چوں ایم ڈی کنگ بوتگ ءُُ کئیا آئی ءَ را اے اگدہ داتگ۔

بس سزا دئیگ ات ، حاکماں دات۔اگاں عطالحق قاسمی، مطیع اللہ جان، طلعت حسین وڑیں نامدارین ءُُ لبزانت و احوالکاری ءَ ہمگرنچیں مردماں بکشگ نہ بیت گڈا یک بے نامیںءُُ غریب و بزگیں احولکارانی حال چے بوت کنت۔

اگاں آ میڈیا ءَ راستیں گپ بہ جن انت ءُُ سیاسی ءُُ معاشی حقیقتاں دیما بیار انت۔ اگاں کسے ءَ وتی زند دوست انت ءُُ زبان ءَ گنگ بیت گڈا میاربار کنگ مہ بیت ءُُ نئیکہ ’’ میڈیا مالکان ‘‘ ءَ را اے شگان جنگ بہ بیت کہ آ کاروبار کنگ ءَ انت۔

اے دؤر انچین ئے کہ باید چوں ہما ملک روم ءِ نہرو ءَ ’’ بانسری‘‘ ءِ بہ زوریت ءُُ وشحالی ءُُ ایمنی ءِ سوت الہان بہ کنت۔حال ءُُ احوالکاری ءِ دود نوکیں چیزے نہ انت ءُُ نئیکہ ایشی ءِ سرا پابندی جنگ یا احوالکارانی گرگ، جنگ ءُُ کُشگ نوکیں گپ ئے بلئے ہمنچو دنیا دیمروئی کنان انت۔ گوشنت کہ بنی آدم ئے ذہن ہم وسیع تر بوان انت بلے گندگ بیت کہ مرچی ہم حاکم ءُُ زوراک گپ ءَ وَ لس مہلوکے کنت بلے کنت ہمائی ءَ کہ دل ئے لوٹیت۔

اگاں کسے اے ظلم ءُُ زوراکیانی باروا گپ بہ جنت یا نبشتہ بہ کنت گڈا اے پریشاں قابل قبول نہ انت۔ انچوں گُشے کہ اے حاکم ءُُ واکدارانی پت ءُُ پیرُکی میراث انت کہ ہر کس کہ آوانی ناروائی ءِ حلاف ءَ گپ کنت آئیٍ ءَ را زندگ بوہگے حقّ نیست۔