بلوچی لبزانک ءَ اے یک کہنیں دودے کہ وتی شاعر ءُُ ادیبانی دلبڈی ءَ آوانی کتابانی دیمدرائی کنگ بیت ۔اے دود انگت ءَ برجاہ اِنت ءُُ ہمے دود ءِ پدءَ چہ نصیر کبدانی لبزانکی دیوان ءِ نیمگ ءَ چھاپ بوتگیں دو بلوچ شاعرانی کتابانی دیمدرائی کنگ بوتگ ۔چرے شاعراں یک واجہ احمد مہر ءِ کتاب ’’سنگرتگیں ارس‘‘ ءُُ دومی واجہ حبیب دانش ءِ کتاب’’ گوات ءِ ہلوت‘‘ پہ دیوان ءَ دیمدرائی ءَ گچین کنگ بوتگ اَنت ۔ 

نصیر کبدانی لبزانکی دیوان ءِ پاگواجہ مومن مزار ءِ گشگ اَت کہ بیدئے چہ سرکاری کمک ءُُ مدت ءَ کتابانی چھاپ کنگ یک بلائیں ڈبہ یے بلئے اے دیوان ءِ سنگتانی جہد ءُُ کوشست بوتگ کہ آ ہردو شاعرانی کتاباں چھاپ کنگ ءَ سوبین بوتگ اَنت ۔مراگش ءِ پاگواجہی ہم مزار مومن ءَ کتگ اَت ،دیوان ءِ جار چین کریم ارمان ءَ دیوان ءِ گشتانک دیوک ءُُ دیوان ءَ بہر زوروکیں مہمانانی وش اتک ءَ پد گشتانک دیوکاں کتابانی بابت ءَ وتی حیال درشان کت اَنت ۔

دیوانءِ ساڑی ایں مردماں چہ شہزاد الدین بلوچ ،’’سرپدی دیوان‘‘ ءِ کارمستر،حسرت خارانی، بلوچی ءِ نامداریں گشندہ لیاقت عابد ،میر حسن نوشیروانی ،کفایت اللہ نوشیروانی ءُُ احمد عبداللہ ءَ بہر زرتگ ات۔دیوان ءِ گشتانک دیوکاں چہ خاران ءُُ چہ خاران ءَ ڈن ءِ ادب دوست ءُُ لبزانتکاراں بہر زرتگ اَت چریشاں شکور زاہد،شمشم شاہ حاجی، احسن بسمل،سفر خان راسکوئی،نورالحق شاد،زبیر شاد،ثنا ہ ،مسرور شاد، ہوار اِت ۔

واجہ شکورزاہد ءَ وتی تران ءَ گشتگ اَت کہ بلوچی لبزانک ءَ شاعرانی یک جتائیں کردے است اَت بائد اِنت دائم ءَ وتی شاعر دلبڈی دئیگ بہ بنت۔ہمے درگتگ ءَ انچیں دیوان ءُُ مجلساں چہ نوک باہندیں شاعرءُُ لبزانکار ہم جہد کن اَنت کہ آ شر ءَ چہ شرتر نبشتہ بہ کن اَنت ءُُ وتی زبان ءُُ لبزانک ءَ دیمروئی بدینت ۔شکور زاہد ءَ ہردو شاعر مبارکی داتگ اَنت ءُُ ہردو شاعرانی شعرگوں شعریت ءِ تب ءُُ میلاں چار ءُُ تپاس کت اَنت ۔

مسرور شاد ءَ وتی گشتانک ءَ گشتگ اَنت کہ بلوچی لبزانک ءِ بنزہ شاعر ی اِنت پمشکا شاعر ہچبر فراموش کنگی نہ اَنت۔آئی ءَ گشتگ اَت کہ نصیر کبدانی لبزانکی دیوان مدام وتی ادیب ءُُ شاعرانی کمک ءَ ساڑی اِنت۔ آئی ءَ گشتگ اَت کہ خاران ءُُ خاران ءِ نزیک ءُُ گور ءِ درائیں مزن سندیں شاعرءُُ ادیب سوگہ کنگ بنت کہ اگاں آوانی گورا وتی پیریں مردمانی شعر است اَنت آوانی اکیڈمی ءَ سر بہ کنت اکیڈمی آوانی چھاپگ ءِ بار ءَ وتی کوپگاں زورگ ءَ ساڑی اِنت ۔

اکیڈمی ءِ ہمے جہد کنت کہ بلوچ مردگ پرست نہ انت بلکیں آ وتی لبزانکاراں زندگی ءَ یات کنت ءُُ آوانی ارزشت ءَ زانت ءُُ آواں شرپ بکشائی ۔دیوان ءِ ساڑی ایں مردماں دیوان ءِ توسیپ ءُُ ستاکرت ءُُ ہردو شاعرانی کتاب بہا زرتاں ۔دیوان ءِ آسر گوں بلوچی دودءِ پداں گوں چاہ ءُُ چہراں آسر کنگ بوتگ۔