نوکیں حکومت ءُُ مکران ءِ کمشنر ءِ بازیں جہد ءُُ کوشتاں سنیٹ ءِ اسٹینڈنگ کمیٹیءَ میرانی ڈیم زدگانی اے گپ من اتگ کہ میرانی ڈیم زدگانی مچ ءُُ ایندگہ درچکانی مُز دئیگ بہ بنت۔ اے درچ ءَ اے گپ ہم منگ بوتگ کہ ڈیم زدگانی مچ ءُُ ایندگہ درچکانی مُز 2019 ءَ نرک ءِ ردا دئیگ بیت کہ وشتریں حالے پرچکہ میرانی ڈیم زدگانی لوگ،جاہ، جائیداد،مچ ءُُ درچکانی حساب 2004 ءَ جنگ بوتگ کہ مرچی اے گپ ءَ پانزدہ پُریں سال انت۔
2004 ءَ ڈالرءِ نیاد 100 کلدار بوتگ وہدیکہ اے وہد ءَ ڈالر ءِ نیاد 140 کلدار سرانت نوں اگاں 2004 ءِ نیاد ءَ ڈیم زدگاناں مُز دئیگ بہ بیت گڈا اے زر ءُُ مال آہانی ہچ کار ءَ نیاانت بلئے ایشیءَ مستریں گپ ایش انت کہ مزانی بہر ءُُ بانگ چون کنگ بیت؟
پرچکہ گوستگیں 2013 ءِ حکومت ءَ وہدے میرانی ڈیم زدگانی لوگ ءُُ جاہ ءُُ جائیدانی زر ءُُ مال کہ بہر کنگ بوت انت آ دور ءِ حکومت ءَ ہواریں بازین با اثریں مردماں بازیں گریب ءُُ بزگانی نام چہ لسٹاں کش ات انت ءُُ وتی سیاد ءُُ وارث ءُُ وتی پارٹی ءِ مردمانی نام ہوار گیتکگ انت کہ پدا ہمے مردمانی ہندی میر ءُُ متبرانی ہوری ءَ اے زر بہر ءُُ بانگ کتگ انت۔
لوگانی زرانی بہر ءُُ بانگ ءِ وہد ءَ آوہد ء ہندی (ضلعی) آفیسرانی گوں وتی برزی پارٹی لیڈرانی رزامندی ءَ ہما مردماں کہ دہ دہ لوگ بوتگ آہاناں 5,5 لکھ کلدار داتگ بلئے بازیں انچیں مردم بوتگ کہ آہانی یک یک لوگے بوتگ بلئے چوکہ پارٹی ءِ لیڈرانی سیاد ءُُ وارث بوتگ انت آہاں 20,20لکھ کلدار داتگ ہمے لیڈراں وتی دور ءُُ دراجیں سیاد ءُُ وارثانی نام مان کتگ انت ءُُ آہاناں کمیشن داتگ ءُُ وہدے لیول 72 ءِ مز دئیگ بوتگ انت۔
گڈاہما مردمانی نام ہم مان کنگ بوتگ انت کہ آہاں پیسرا وتی متبری ءُُ پارٹی ءِ زور ءَ لیول 44 ءُُ لیول 64 ءَ مز گپتگ انت بلئے چوکہ یونین کونسل ءَ بگرداں سروزیر دراہ ئیں پارٹی ءِ مردم بوتگ انت پمشکہ اشاناں جست ءُُ پرس کنوک نہ بوتگ ہرچی کہ آہانی دل ءَ لوٹ ات آہاں گوں ہندی آفیسرانی ہم شوری ءَ کتگ کہ آئی ءِ سوب ءَ بازیں حقداریں مردماں وتی حد نہ رستگ انت۔ اے وہداں سینٹ کمیٹی ءِ جار ءَ پد ہم میر ءُُ متبر یکجاہ بوتگ انت پرچکہ دمگ ءِ گیشتریں درچک ءُُ مچ ہماہانی انت۔
اے یک جوانیں گپے کہ ہرکس ءَ تاوان بوتگ آئی ءِ تاوان دئیگ بہ بنت بلئے حق ءُُ انصاف ءِ ردا دئیگ بنت اے وہد ءَ مستریں ذمہ واری مکران ءِ کمشنر ئیگ انت کہ بے کس، بے سہارا ءُُ بے پارٹی ئیں مردمانی گورسی بہ کنت پرچکہ پارٹی لیڈر مدام وتی سیاد ءُُ وارث ءُُ پارٹی ورکرانی نام ءَ بازیں زرے کشگ لوٹ انت ءُُ نیزگاریں ءُُ بے اثریں مردمانی مچ ءُُ درچکانی حساب کم کنگ بیت حالانکہ پیسری رند ءَ وتی من ءَ ڈی۔سی ءَ کمیٹی یے ٹہینتگ ات بلئے اے کمیٹی یک نیمگی ءُُ ہم تپاکیں مردمانی بوتگ۔
اے مزانی بہر ءُُ بانگ کنگ ءِ وہد ءَ بائدیں کمشنر وتی کماشی ءَ کمیٹی یے شربہ کنت ءُُ کمیٹی ءِ تہا بائدیں درائیں تبک ءُُ دمگی درائیں پارٹیانی نمائندگی بہ بیت تنکہ ہرچ پارٹی ءِ نمائندہ وتی مردمانی حقانی پہریزگ ءِ مان زمان بہ بیت۔
اے درچ ءَ مکران ءِ کمشنر ءَ اے ڈبہ ہم سرا انت کہ آ اے لسٹاں یکبرے پدا بچار ات کہ چو بہ مہ بیت کہ پارٹی ءُُ ذاتی کینگ ءَ بازیں نیزگار ءُُ گریبی ءِ نام کشگ بوتگ ءُُ دگہ نام ہوار کنگ بوتگ اَنت۔