گوادر اراضی کے سرکاری ریکارڈ میں ردو بدل کا ایک اور کیس طشت از بام، سرکاری اراضی کی غیر قانونی فروخت سے قومی خزانے کو کروڑوں روپے کا نقصان، نیب نے ایک حاضر سروس و چار سابق تحصیلداروں سمیت 15افراد کے خلاف ریفرنس احتساب عدالت میں دائر کردیا

قومی احتساب بیورو بلوچستان نے ضلع گوادر میں اراضی کے سرکاری ریکارڈ میں ردوبدل اور غیر قانونی فروخت کی تحقیقات مکمل کرکے 5 تحصیلدار وں سمیت 15 افراد کے خلاف ریفرنس دائر کردیا۔

گوادر کے موضع انقرہ شمالی کی سرکاری اراضی کی تحقیقات کے دوران انکشاف ہوا موجودہ تحصیلدار گوادربوحیر دشتی اور سابق تحصیلدار گوادر طارق گچکی، نثار احمد گورگیج ، نور بزنجو ، نذیر بزنجونے قانون گو عبدالرزاق ،گرداور سید خداداد شاہ، پٹواری جاوید علی ، عاصومی، رفیق اور سلطان نے ملی بھگت سے سرکاری ریکارڈ میں ٹیپرنگ کرتے ہوئے 844ایکڑ اراضی پرائیوٹ افراد کو فروخت کی جس سے قومی خزانے کو14 2ملین روپے کا نقصان پہنچا۔

قومی احتساب بیورو بلوچستان نے ضلع گوادرکے ایک حاضر سروس و چار سابق تحصیلداروںسمیت پندرہ ملزمان کے خلاف قومی خزانے کو ناقابل تلافی نقصان پنہچانے کی تحقیقات مکمل کرکے ٹھوس شواہد کی روشنی میں ریفرنس احتساب عدالت کوئٹہ میں دائر کردیا ہے۔