کوئٹہ: کیچی بیگ پر فورسز کی گاڑی کے قریب دھماکے کے نتیجے میں 3 سیکیورٹی اہلکاروں سمیت8 افراد زخمی ہوگئے۔ سیکیورٹی فورسز کی گاڑی کیچی بیگ کے علاقے سے گزررہی تھی کہ سڑک کنارے نصب بارودی مواد زور دار دھماکے سے پھٹ گیا جس کے نتیجے میں 3 اہلکاروں سمیت 8 افراد زخمی ہوگئے۔ واقعے کے فوری بعد امدادی ٹیمیں اور قانون نافذ کرنے والے اداروں کے اہلکاروں کی بڑی تعداد موقع پر پہنچ گئی جب کہ زخمیوں کو قریبی اسپتال منتقل کردیا گیا ہے۔ ایس پی سریاب کے مطابق دھماکا خیز مواد سڑک کے کنارے نصب کیا گیا تھا جس کے پھٹنے سے فورسز کی گاڑی مکمل طور پر تباہ ہوگئی تاہم ایف سی اور پولیس نے علاقے کو گھیرے میں لے کرواقعے کی تحقیقات شروع کردی ہے۔