گوادر:  بلوچستان کو حق دو تحریک نے تحریری معاہدہ پر عمل در آمد پر صوبائی حکومت کی وعدہ خلافی کے خلاف دھرنوں کا اعلان کردیا۔ پہلے مرحلہ میں 20 جنوری کو اورماڑہ، 3 فروری کو پسنی، 10 فروری کو سربندن اور 27 فروری کو اوتھل زیروہ پوائنٹ کوسٹل ہائی وے پر دھرنے دیئے جائینگے۔ دوسرے مرحلہ میں یکم مارچ کو گوادر میں غیر معینہ مدت تک دھرنا دیا جائے گا۔ صوبائی حکومت نے حق دو تحریک کے مطالبات پر عمل درآمد کے لئے تحریری معاہدہ کیا تھا۔

صوبائی حکومت معاہدہ پر عمل درآمد میں ناکام ہوچکی ہے۔ آئندہ صوبائی حکومت سے کسی بھی قسم کے مذاکرات نہیں کئے جائینگے۔ شہدائے جیونی چوک پر عوامی پریس کانفرنس سے خطاب کرتے ہوئے بلوچستان کو حق دو تحریک کے سربراہ اور جماعت اسلامی کے صوبائی جنرل سیکریٹری مولانا ھدایت الرحمن نے کہا ہے کہ گوادر میں ہونے والے تاریخی دھرنے میں وزیر اعلی بلوچستان اور صوبائی کابینہ نے حق دو تحریک کے چارٹر آف ڈیمانڈ پر عمل درآمد کے لئے باقاعدہ تحریری معاہدہ کیا تھا جس کے لئے صوبائی حکومت کو ایک ماہ کا وقت دیا گیا تھا لیکن ایک ماہ کی مہلت ختم ہونے کے بعد حق دو تحریک کے چارٹر آف ڈیمانڈ پر عمل درآمد نہیں کیا گیا ہے۔

غیر قانونی ٹرالرنگ تواتر کے ساتھ جاری ہے، بارڈر کے انتظامات جوں کے توں ہیں وہاں پر ایف سی کا عمل دخل تاحال برقرار ہے، چیک پوسٹوں کے خاتمہ کے حوالے سے ہماری تجویز پر من و عن عمل نہیں کیا جارہا ہے، حق دوتحریک کے قائدین اور کارکنوں پر قائم مقدمات تاحال ختم نہیں کئے گئے ہیں، ماہی گیروں کے لئے خصوصی پیکیج کا اعلان ہوا ہوگیا ہے اور جملہ ٹیچنگ اسٹاف کے احکامات جاری نہیں گئے ہیں۔ انہوں نے کہا کہ صوبائی حکومت شاید یہی سمجھ رہی ہے کہ حق دو تحریک تھک ہارکر گھر بیٹھ جائے گی۔صوبائی حکومت خواب خرگوش سے باہر نکل آئے۔ حق دوتحریک نہ ختم ہوگی اور نہ ہی ہمارے عزم میں خلل آئے گی۔

انہوں نے کہا کہ صوبائی حکومت نے تحریری معاہدہ کی خلاف ورزی کی ہے۔ صوبائی حکومت کی جانب سے تحریری معاہدہ کی خلاف ورزی کے خلاف حق دو تحریک پہلے مرحلہ میں کوسٹل ہائی وے پر دھرنوں کا اعلان کرتی ہے جس کے مطابق 20 جنوری اورماڈہ کوسٹل ہائی وے، 3 فروری کو پسنی کوسٹل ہائی وے زیروپوائنٹ اور 10 فروری کو سربندن کراس کوسٹل ہائی وے پر دھرنے دیئے جائینگے۔

انہوں نے کہا کہ اب حق دو تحریک وزیر اعلیٰ بلوچستان یا صوبائی وزراء اور اعلی حکام سے مذاکرات نہیں کرے گی۔ وزیر اعلی بلوچستان کی تبدیلی اور صوبائی وزیر فشریز کی برطرفی ہمارے مطالبات کا بھی حصہ ہونگے۔ کوسٹل ہائی وے پر دھرنوں کے بعد حق دو تحریک یکم مارچ کو وائی ناکہ چوک پر دوبارہ غیر معینہ مدت کے لئے دھرنا دیگی۔ پریس کانفرنس سے حق دو تحریک کے سینئر رہنماء حسین واڈیلہ نے بھی خطاب کیا۔ حق دو تحریک کے سربراہ کی پریس کانفرنس سننے کے لئے عوام کی کثیر تعداد موجود تھی جنہوں نے دھرنوں کے اعلان پر ہاتھ اٹھاکر منظوری دے دی۔