وزیراعظم شہباز شریف نے غزہ میں جنگ بندی کے اعلان کا خیر مقدم کرتے ہوئے کہا ہے کہ پاکستانی قوم امن کی حمایت میں اپنے فلسطینی بہن بھائیوں کے ساتھ کھڑی ہے۔

وزیراعظم شہباز شریف نے غزہ میں جنگ بندی کے اعلان پر اپنے ایکس پیغام میں کہا کہ  وہ اور پوری پاکستانی قوم اس جنگ بندی کا خیر مقدم کرتے ہیں۔

 وزیراعظم نے قطر، سعودی عرب، امریکا، مصر اور دیگر ممالک کی کوششوں کو ناقابل فراموش قرار دیا۔ انہوں نے کہا کہ امن و امان کے لیے غزہ اور دیگر علاقوں میں انسانی امداد کی ترسیل کو یقینی بنانا نہایت اہم ہے۔

وزیراعظم نے امید ظاہر کی کہ اس جنگ بندی کا مکمل طور پر احترام کیا جائے گا۔شہباز شریف نے فلسطینی عوام کے ساتھ اظہار یکجہتی کرتے ہوئے ان کی جدوجہد کو خراج عقیدت پیش کیا اور کہا کہ پاکستان مسئلہ فلسطین کے دو ریاستی حل کے مؤقف کا اعادہ کرتا ہے۔ ان کے مطابق القدس شریف کو دارالحکومت کے طور پر آزاد فلسطین ہی مسئلے کا پائیدار حل ہے۔