بھارتی جارحیت کا سلسلہ جاری ہے،بھارت نے سندھ اور پنجاب کے مختلف شہروں میں اسرائیلی ساختہ جدید ہیروپ ڈرون چھوڑ دئیے، تاہم پاک فوج نے منہ توڑ جواب دیتے ہوئے تمام ڈرونز کو گرادیا، اس دوران ڈرونز کا ملبہ گرنے سے 2 افراد شہید، 2 زخمی ہونے کی اطلاعات ہیں۔
کراچی کے علاقے ملیر شرافی گوٹھ اور گلشن حدید میں 2 ڈرون گرائے گئے، کوئی جانی نقصان نہیں ہوا۔
سندھ کے ضلع گھوٹکی کے گاؤں سرفراز لغاری میں ڈرون تباہ ہونے کے بعد گرنے سے مختیار نامی کسان جاں بحق، جبکہ اس کا والد ایدھن زخمی ہوا۔
لاہور سمیت مختلف شہروں میں بھارت کے جاسوس ڈرون تباہ کرد یے گئے۔
لاہور میں 3 ڈرون گرائے جاچکے ہیں، والٹن روڈ لاہور پر 2 ڈرون گرائے گئے ، ایک ڈیفنس میں گرایا گیا، ایک ڈرون اسرائیلی ساختہ تھا۔
راولپنڈی میں بھی 2 جاسوس ڈرون مار گرانے کی اطلاع ملی ہے، ڈرون گرنے کے نتیجے میں 2 افراد زخمی بھی ہوئے، ایک ڈرون راولپنڈی ریس کورس گراؤنڈ میں گرا۔
جرانوالہ کے مختلف علاقوں میں 2 ڈرون مار گرائے گئے، دونوں ڈرونز کے ملبے مل گئے، ایک ڈرون کا ملبہ گاؤں پیر جھنڈ کے کھیتوں اور دوسرے ڈرون کا ملبہ واہنڈو کے ٹوکریاں گاؤں سے ملا ہے۔
شیخوپورہ کے گاؤں باہومان کے قریب بھی بھارتی ڈرون مارگرایا گیا۔
چکوال کے تھانہ ڈوہمن کی حدود میں مبینہ طور پر بھارت کا جاسوس ڈرون کھیتوں میں گر کر تباہ ہوگیا۔ بہاولپور کے قریب چولستان میں بھارتی ڈرون بھی گرایا گیا ہے۔
اٹک میں بھی ایک ڈرون گرائے جانے کی اطلاع ملی ہے، اٹک کے علاقے ڈھوک اعوان میں سیکیورٹی فورسز کے اہلکاروں نے بھارتی ڈرون مارگرایا، ڈرون کا ملبہ گرنے سے محبوب نامی شہری جاں بحق ہوا، سیکیورٹی اداروں نے ڈرون کے ملبے کو تحویل میں لے لیا۔
واضح رہے کہ 22 اپریل 2025 کو پہلگام میں سیاحوں کی ہلاکت کے بعد بھارت نے 6 اور 7 مئی کی درمیانی شب، اندھیرے میں پاکستان کے شہری علاقوں پر بزدلانہ حملہ کیا تھا۔بھارتی حملے کے بعد پاکستان کی مسلح افواج نے بزدلانہ حملے کا منہ توڑ جواب دیتے ہوئے بھارتی فضائیہ کے 3 رافیل طیاروں سمیت 5 جنگی طیارے مارے گرائے، جب کہ ایک بریگیڈ ہیڈکوارٹر سمیت متعدد فوجی چیک پوسٹوں کو تباہ کردیا تھا، بھارتی فوج نے ایل اوسی کے چورا کمپلیکس پر سفید جھنڈ الہرا کر شکست تسلیم کرلی تھی۔
اس کے علاوہ قومی سلامتی کمیٹی نے پاک فوج کو جوابی کارروائی کے لیے اجازت اور مکمل اختیارات دے دئیے ہیں، پاکستان نے بھارت کے حملے کا بھرپور جواب دینے کے عزم کا اظہار کیا ہے۔
بھارتی حملوں کے بعد پاکستان کو عالمی قوانین کے تحت اب حملے کا مکمل حق حاصل ہے پاک فوج کی جانب سے فوری ردعمل ناگزیر ہوچکا ہے تاکہ بھارت کو اس کا جواب مل سکے۔
بھارت نے پہلگام واقعے کو جواز بناکر پاکستان پر حملہ کیا ہے لہذا یہ ضروری ہوگیا ہے کہ پاکستان اس کا مکمل طاقت سے جواب دے۔
یقینا جنگ کسی کے مفاد میں نہیں مگر بھارت ہر بار اپنے ملک پر ہونے والے واقعات کا الزام پاکستان پر لگاکر حملوں کا جواز بناتا رہے گا لہذا بھارت کو جواب دینا ضروری ہے۔
عالمی برادری کی محض مذمت کافی نہیں بلکہ بھارتی جارحیت کے خلاف ٹھوس اقدامات اٹھانے ہونگے ،بھارت تمام تر عالمی قوانین کو پامال کرتے ہوئے آبادیوں، مساجد کو نشانہ بناکر عام شہریوں پر حملہ کررہا ہے جو اس کی بربریت کا واضح ثبوت ہے اگر یہ جنگ شدت اختیار کرگئی تو اس سے خطے میں حالات گھمبیر شکل اختیار کرینگے لہذا جنگی جنون میں مبتلا بھارت پر عالمی برادری دباؤ بڑھائے اور عالمی قوانین کی خلاف ورزی پراس کے جارحانہ اقدامات کا نوٹس لے۔