روسی وزارت دفاع کے زیر کنٹرول پیراملٹری فورس ’افریقا کور‘ نے تصدیق کی ہے کہ اس کی افواج نے شدید لڑائی کے بعد مالی کے شمالی شہر کِدال سے انخلا کر لیا ہے۔

رپورٹ کے مطابق طوارق اکثریتی باغی گروپ  ایف ایل اے نے گزشتہ ہفتے کے آخر میں ملک بھر میں بیک وقت حملے کیے جن میں کِدال بھی شامل تھا۔

مالی کی فوجی حکومت کی حمایت کرنے والی افریقا کور  نے اپنے بیان میں کہا کہ کدال سے انخلا کا فیصلہ مالی کی قیادت کے ساتھ مشاورت سے کیا گیا۔

ٹیلیگرام پر جاری بیان میں کہا گیا کہ ’جمہوریہ مالی کی قیادت کے ساتھ مشترکہ فیصلے کے تحت کدال میں تعینات اور لڑائی میں مصروف افریقا کور کے یونٹس نے مالی کی فوج کے ساتھ علاقے سے انخلا کیا ہے‘۔

خیال رہے کہ ہفتے کے روز مالی کے وزیرِ دفاع بھی باغیوں کے حملے میں جاں بحق ہو گئے۔

غیر ملکی خبررساں ایجنسی کے مطابق وزیرِ دفاع ساديو كامارا اپنے گھر پر ہونے والے کار بم حملے میں جاں بحق ہوئے۔ ان کے ساتھ ان کی دوسری اہلیہ اور دو پوتے بھی جاں بحق ہوئے۔ یہ حملہ باماکو کے قریب فوجی حکومت کے گڑھ کاتی میں کیا گیا جس کی تصدیق اہلِ خانہ اور ایک سرکاری اہلکار نے کی۔