سر زاھر ءَ طور خم بارڈر ءِ سرا میجر جواد چنگیزی ءِ شہیدی ءَ پد پاکستان ءُُ افغانسان ءِ میان ءَ اڑ ھلاس بوتگ بلئے نوکیں ھالانی رد ءَ افغان حکومت ءَ پاکستان ءِ وزیراعظم ءِ دری کارانی سلاہ کار سرتاج عزیز لوٹکی نہ دزتگ آئی ءِ تہا افغانستان ءِ دری کارانی وزیر ءُُ ایندگہ واکداراناں اسلام آباد ءَ آھگ ءُُ سیمسری جیڑھانی بابت ءَ گپ ءُُ تران ھوار بوتگ ۔دومی دست ءَ پاکستان ءُُ افغانستان ءِ واکدارانی میان ءَ یک سیمسری نیادے بوتگ بلئے اے نیاد ھم بے آسر بوتگ اے ر د ءَ افغان واکدارالوٹ ایش بوتگ کہ یکبرے سیمسر پچ کنگ ءُُ رو ءُُ آ بنا کنگ بہ بیت وھدیکہ پاکستان ءِ واکدارانی لوٹ ایش انت کہ یکوارے درجنگ بہ بیت پدا دوئیں ملکانی نیما ءَ رو ءُُ آ بنا کنگ بہ بیت افغانستان ءِ لوٹ ایش ات کہ اے وھداں بازیں گاڑی یے ءُُ چہ مال ءُُ ساماناں بار بازیں لڑکے سیمسر ءِ اے دیم ءُُ آدیم ءَ اوشتاتگ کہ داں در ءِ جوڑ بوھگ ءَ اے مال ءُُ سامان حراب بنت ایشانی تہا گیشتریں مال پوہ تہیں میوھگانی انت کہ چریشی ءَ بازیں لس مردے نقصان ءُُ تاوانے بیت افغانستان ءِ بیپار ءِ مستریں در طور خم سیمسر انت کہ گوستگیں بازین ھپتگاں داں بند انت ھزرااں مردم سیمسر ءِ دوئیں نمگ ءَ اے حاتر ءَ اوشتاتگ انت کہ سیمسر کدی پچ بیت ہمے سوب ءَ افغانسان ءِ حکومت ءِ سرا افغان لس مہلوک ءِ زور ودان انت کہ ھمروچ سیمسر ءِ سرءَ افغان بیپاریانی ارباں کلدار نقصان بوھگان انت اے درچ ءَ افغان حکومت سک تکانسر انت پرچکہ یک نیمگے آ در ءَ بند کنگ نہ لوٹ ایت ءُُ دومی نیمگ ءَ سیمسر ءِ سرارو ءُُ آ ءِ ھاتر ءَ مہلوک ءِ دیم ءَ ھم داشت نہ کنگان انت دومی نیمگ ءَ جیڑھ ءِ سر امریکہءَ ھم وتی تکانسری پدر کتگ ءُُ گشتگ کہ دوئیں ملک گوں ایمنی ءُُ ساپ دلی ءَ اے جیڑھ ءَ را گش ءُُ گیوار بکن انت اے درگت ءَ امریکہ تچکامکن کتگ کہ آ اے دوئیں ملکانی میان ءَ سلاہ کارے کنت ایشی زاھریں مانا ءُُ مطلب ہمیش انت کہ اے دوئیں ملکانی میان ءَ اے اڑھمے وڑا برجاہ مان ایت پرچکہ اسپیتیں بیرکانی سرینگ ءُُ پد ھم دوئیں ملکانی سیمسراں تیر گواری بازیں روچاں داں برجا بوتگ ۔پیسرتگیں کماش حامد کرزئی ءُُ ایندگہ رھشوناں وتی اے لیکہ پدا گیر آورتگ کہ ڈیورنڈ سیمسر ءِ سر ا ھچ وڑیں سلاہ ءُُ تپاکی نہ کن انت ۔پمشکہ انوگیں جاور حالاں دوئیں ملکانی میان ءِ اے جیڑ ہ ءِ ھلاس بوھگ ءِ ھچ وڑیں آسر ے دیم ءَ نیاگان انت اے درچ ءَ مئے دومی ھمساھگ ایران انت آ بلکیں اے جیڑ ہ ءِ سرا سلاہ کارے بکنت پدرا انت کہ اے بابت ءَ پاکستان وت ایران ءَ ھچبر نہ گش ایت پرچکہ پاکستان ءِ نیمگ ءَ ڈیورنڈ سیمسر اڑوکی نہ انت ءُُ نیکہ پاکستان لوٹ ایت۔ ہ اے سیمسر ءِ رنگ ءُُ دروشم بدل بہ بیت ۔
اے درچ ءَ افغانستان پہ پرے کار ء ءَ ایران ءَ دزبندی کت کنت پرچکہ بیپار ءُُ رو ءُُ آ ءِ بند بوھگ ءَ پد افغانستان ءِ راج بازیں جنجال ءُُ جیڑھانی آماچ انت یا پدا ایر یک جوانین ھمساھگے وڑا کہ آئی ءِ دوئیں سیمسرگوں دوئیں ملکاں ھم نہ انت سلاہ کاری ءِ جہد ءَ بکنت تنکہ آئی ءِ دوئیں سیمسرانی سرا ایمنی برجاہ بہ مان ایت ءُُ دمگ ءَ ناشری ءِ دگہ جمبرے ساھئیل مہ بیت۔
