آوار جنی اے وھد ءَ ملک ءِ مستریں جیڑھاں یکے اے جیڑھ ءِ بندات ماں بلوچستان ءَ بوتگ اَت بلئے اے ساھتاں ملک ءَ ھچ چشیں دمگے نیست کہ اوداآوار جنی ءِ جیڑہ یے مہ بیت ھمے وڑا ءَ سند ھ ءِ دمگ ھم آوار جنی آماچ اِنت سندھ ءِ پیسریگیں وزیر اعلیٰ ءِ بازیں جیڑھ گوں بنجاہی حکومت ءَ ہمیش ات اِنت ءُُ اے وھد ءَ ایم کیو ایم ءِ جیڑھ گوں اسٹیبلشمنٹ ءَ ھم ھمش اِنت کہ آئی بازیں کارکندہ ( ورکر) ءُُ سیکٹر انچارج آوار جنگ بوتگ اَنت ھمے درگت ءَ عبدالواحد بلوچ ءِ جیڑھ ءَ ھم ماں کراچی ءَ دیم ءَ آتکگ لہتیں روچ ساری آوار جنگ بوتگ روتاک ڈان ءِ ردا عبدالواحد بلوچ چہ سندھ ءَ دیم پہ کراچی آھگ ءَ بوتگ کہ راہ ءَ سادگیں پوشاک پوشتگیں آوکیں مردماں آ چہ بس ءَ ایر کتگ ءُُ گوں وت ءَ ماں ویگو گاڑی یے ءَ برتگ ۔
ھمے روتاک ءِ تہا عباس ناصر ءَ نبشتہ کتگ کہ عبدالواحد بلوچ سر زاھر ءَ ھچ بدیں ءُُ درکانودی کاراں ھوار نہ بوتگ۔ بندر آ یک چاگردی کارکندہ ءُُ لبزانکی مردمے بوتگ آئی ءِ زند ءِ گیشتریں بہر مردمانی شوناھگ ءُُ حذمت احوالکاری ءُُ لبزانکی کاراں دلگوشی ءَ گوستگ ھمے درچ ءَ آ سید ہاشمی ریفرنس لائبریری ءَ گوں ھم ھمگرنچ بوتگ کہ آئی ءِ بازیں اگدھانی سرا گشادیں کار کنوکے بوتگ چد و پیش سید ہاشمی ریفرنس لائبریری ءِ کماش واجہ صبادشتیاری ءَ ماں کوئٹہ ءَ نشانگی کوش شہید کنگ بوتگ اَت مہلوک ءِ دل ءَ تنیگت ءَ صبا دشیتاری ءِ ھون ءِ بو نہ شتگ کہ سید ہاشمی ریفرنس لائبریری ءِ دگہ باسکے آوار جنگ بوتگ۔
اے وڑیں روچ ءُُ رحمانی آوار جنی ویل پہ حکومت ءِ حاترا جوانیں پال نہ اَنت پرچکہ بنجاہی حکومت یا سندھ ءُُ بلوچستان ءِ حکومت یک نیمگے ءَ اے جار پرین انت کہ ملک ءَ امن ءُُ ایمنی ءِ جاور حال گہتر بوتگ اَنت بلئے دومی نیمگ ءَ سندھ ءِ چیف جسٹس ءِ چکءَ بگرداں بلوچستان ءَ دمگی وزیر ءِ چک ءَ درا دراہ روچ ءُُ رحمانی دگامی سرا آوار جنگ بنت ھمے وڑا گشندہ امجد صابری ءِ کوش بہ بیت یا پدا واحد بلوچ آّوار جنی ھنچیں گپ انت کہ لس مہلوک ءَ اے گمان ءِ تہا دور دئینت کہ آ اے حکومت ءَ ملک ءَ چے حد ءَ داں رک ات کن اَنتَ ؟ ءُُ ھمے وڑا اگاں اے مارشت لس مہلوک ءِ تہا گیش بہ بیت گڈا اے پہ حکومت ءُُ ریاست ءَ شریں گپے نہ بیت پمیشکہ مئے گوں حکومت ءَ دزبندی انت کہ عبدالواحد بلوچ وڑیں مردمانی پد جنگ بہ بیت ءُُ اشاں پہ سلامتی آھانی لوگ ءَ سر کنگ بہ بیت تنکہ رسانک در ءَ حکومت ءِ ایر جنگ ءِ موہ مہ رس اِت۔
sacheenk.azadi@gmail.com
