بیست ءُُ شش اگست بلوچ راج ءِ دوبامردانی بیرانی ءِ روچ اِنت اگاں چارگ بہ بیت داں اے بامردانی بیرابی پہ بلوچ راج ءُُ بلوچی زبان ءَ تاوان اَنت چوکہ یک بامردے کہ آئیءِ سیاد ی گوں راجکاری ءَ بوتگ دومی ءِ کرد پہ لبزانک ءَ تچک بوتگ ۔ہما واجہ کار کہ آئیءِ پہ لبزانک ءَ کار کتگ ءُُ آئیءِ کرد پہ لبزانک ءُُ لبزانکی چست ءُُ ایراں ہچبر شموشگ کہ نہ بیت آبامردواجہ غلام رسول ملازئی انت کہ سرجمیں بلوچستان آئیءَ را ’’ جی آر ملا‘‘ ءِ نام ءَ زانت۔جی آر ملا ءِ کار ءُُ کرد پہ لبزانک ءُُ لبزانکی کاراں کسی دیم ءَ اندیم نہ انت آئی ءَ وتی سرجمیں زند یاوَ بلوچ راجی کاراں گوں گوازینتگ یاکہ پہ لبزانک ءَ کار کتگ آئیءِ شاعری ءَ ابید لبزانکی بازیں نبشتانک ماں تاک ءُُ ماہتاکاں چھاپ ءُُ شنگ کتگ اَنت آئیءِ یک کرد ے کہ سرجمیں لبزانکی دیوان ءُُ گلاں نامدار بوتگ آ ایش کہ آ یک تچکیں مردے بوتگ ءُُ آئیءَ راستیں ھبر دیم پہ دیمی کتگ بزاں ھچبر کس ءَ را باپشت ءَ نہ گوشتگ ہرچی بوتگ آئیءَ دیم پہ دیمی کتگ انت،بزاں آئی ءِ دل ئیگ ءُُ دپ ءِ یک بوتگ انت۔
مئے ساہ انت بلوچستان مئے جان انت بلوچستان
مئے زند ءِ ہمک درد ءِ درمان انت بلوچستان
سر سبز ءُُ چو شاداب اَنت دنیا ءِ دگہ کہچر
اپسوز مدام سہریں ھونان انت بلوچستان
اے گال واجہ ملا ءَ ہما وہد ءَ گشتگ اَنت کہ وہدے آ سیاسی چست ءُُ ایرانی تہا بوتگ ءُُ پہ بلوچستان ءِ جہد ء آجوئی ءَ کارے کتگ ما گشت کنیں کہ واجہ جی آر ملا یک کمیٹڈیں مردے بوتگ بزاں آ گوں کول ءُُ پیل ہردوکاں بلوچے بوتگ ۔
گشیت ملا ؔ مدام دیم ءَ
نہ جنت پشت ءَ کسے زنگ ءَ
لبزانک ءَ آ یک شاعرے ءِ جہت ءَ زانگ ءُُ پجارگ بیت آئیءَ ایوک ءَ یک شئیرے دپترے چھاپ ءُُ شنگ بوتگ پنام ’’ بژن‘‘کہ کراچی ءَ ۱۹۸۱ چھاپ بوتگ۔
اے اوں یک اجبیں گپے کہ آئیءَ وتی لبزانکی زند،سیاسی زند ءُُ زند ءِ گڈی روچ ہرسے ایں نوبت کراچی ءَ گوازینتگ اَنت زند ءِ گڈی روچ آئیءَ کراچی ءَ نادراہی نوبت ءَ گوازینتگ انت بیست ءُُ شش اگشت دو ہزار چاردہ ءءِ سہبے ءَ ۱۰ ءِ بج ءِ وہد ءَ آئیءَ ہون شانی کتگ ءُُ دنیا ءَ یلہ داتگ اے وڑ ءَ بلوچ راج ءِ یک ٹوھیں بامردے ہچ ما گِسر بوت بلئے وائے مئے لبزانکی گلانی ہاموشی کہ بازیں مردمے اے روچ ءَ چہ پہک شموشکار انت ۔
بلوچ ءِ دومی بامرد کہ ہمے روچ ءَ بیران بوتگ یاکہ شہید کنگ بوتگ ،بلوچانی پاگ ءُُ سروک نواب اکبر خان بگٹی انت کہ ہمے روچ ءَ جنرل مشروف ءِ دور ءَ آئیءِ سرا ارش کنگ بوت ءُُ آ بیران کنگ بوت ۔نواب اکبرخان ءُُ جی آر ملا ءِ تہا یک چیزے سرجم ءَ یک اَت آ تچکی انت بزان آہاں وتی گپ دیم پہ دیمی گشتگ بہہ اے نچاریتگ کہ دیمی مردم کئے انت ءُُ آئیءِ گپانی آسر ءُُ آکبت چے بیت بس آہاں وتی ہک ءِ گپ مدام گشگ ءَ بہہ چک ءُُ پد نہ بوتگ انت ۔نواب اکبر خان ہما بامرد ءُُ سروک بوتگ کہ بلوچستان ءِ ہک ءُُ مزانی جنگ ءَ شہید کنگ بوتگ ، چنائی ءَ اے یک سیاسی جیڑگے بلئے پہ بلوچ راج ءَ یک بلائیں تاوانے کہ بہہ ایشیءِ کنڈ گرگ نہ بیت۔ نواب اکبر چنائی ءَ ہم پہ بلوچان بازیں جہداں پیش پیش بوتگ آ بلوچی دود ءُُ ربیدگانی ھساب ءَ سردار ءُُ نوابے بوتگ ۔آ یک پہکیں سردارے بوتگ بزاں مروچیگیں دونمبریں سردارانی وڑ ءَ نا کہ وتی ہک ءُُ مزانی گپ ءَ اوں دیم پہ دیمی کت مہ کن اَنت۔
نواب اکبر خان نوکیں دور ءَ بلوچ مڑاہ ءِ درائیں گچینی میا رآئی ءِ شان بوتگ انت آئی ءَ وت ءَ را ھبچر ’’ قوم پرستے ‘‘ نہ گشت بلئے آئی ءِ کار پداں بلوچ راج دگہ ہزار سال پہ مڑا یے مل ات کنت۔
اے ھبر وت ہیرانی گپے کہ ما وت ءَ یک نیمگے مردگ پرست گشگ ءَ ساڑی نہ اَنت ءُُ دومی دیم ءَ وتی بامردانی روچاں چہ شموشکارانت ۔وتی جند ءِ رد دئیگ ءُُ رپینگ ءَ ابید دگہ ہچ نہ انت۔
ما بلوچ نوں بے میار اں چے کنئے؟
ہرگور ءَ دست ءَ شہاراں چے کنئے؟
