ذی بنجائی حال رسانی وزیر پرویز رشید ءَ چہ وتی اگدہ ءَ دزکشی ءِ جار جت ۔اے گپ آئی ءِ دزکشی ءَ پیسر شنگ ات کہ سرل المیڈا حال ءَ رند ، ہمائی ءِ سر کہ گار کنگی انت آ پرویز رشید بیت ءُُ ہنچو بوت پرچکہ پاکستانی سیاست ءَ مردم ءَ ہما پشت ءُُ پش پد ءِ کہ کار انت بنجاہی وزیراں آ پرویز رشید انت کہ چریشی ءَ زبہر انت ۔حکومت ءُُ ادارگانی اے راز ءَ داں ڈان ءَ سرکنگ ءَ بازین ذکت ءُُ واکداریں مردمانی نام گرگ بوتگ انت بلئے آہانی تہا گیشتریں نواز شریف ءِ کہول ءُُ سیاد اَنت ءُُ ایندگہ وت چہ نوازشریف ءَ گیشتر زوراک ءُُ واکدار انت پمشکہ ہما لوپ کہ جوڑ کنگ بوتگ ات آ بیچارگیں پرویز رشید ءِ گٹ ءَ لوپ بوت ۔بلئے گپ ایش اِنت کہ کہ اے راز پاشک کنگ ءِ لوپ ءَ را پرویز رشید ءِ گٹ ءَ دئیگ ءَ پد واکداریں حکومتی مردم رک اِتگ انت یا ناں؟ پرچکہ سرل المیڈا ءِ اے حال ءَ پد بنجاہی حکومت ءِ سرا مزنیں تکانسری مان کپتگ اَت ،ہمے حال ءَ عمران خان گیشتر زوراک ءُُ تواناہ بوتگ اَت بلئے گپ ایش اِنت کہ چہ برزی سنداں سستگیں اے ساد ءَ پرویز رشید ءِ دزکشی داشت کنت ؟ پکائیں کہ ناں ! پرچکہ برزی سند ءَ نشتگیں واکدار پرویز رشید ءِ راجکاری بستار ءُُ ارزشت ءَ زان اَنت پمشکہ آ وتی بیر ءِ مٹ پرویز رشید ءَ نہ کن انت دومی دست ءَ عمران خان ءِ ۲ نومبر ءِ نندانک ءِ نزیکی ءَ پرویز رشید ءِ اے دزکشی آئی ءِ پلہ مرزی کنوکیں مردماں اخلاقی دلبڈی ءُُ وزیر اعظم ءِ نزوری ءَ شون دنت۔ اے دزکشی ءَ پد عمران خان ءِ جوش جوزگ گیشتر ود اِت ہمے وڑا آئی ءِ کارندھانی حوصلہ ءُُ ہمت ہم گیش بنت دومی نیمگ ءَ برزی سند ءِ واکداراں ہم موہ یے دست ءَ کپتگ کہ آ عمران خان ءِ نندانک ءِ پشت ءَ وتی تیر ءَ بجن اَنت ءُُ حکومت ءَ گیشتر نزور بکن اَنت ءُُ وتی بیر ءَ بگر انت ۔بازیں مردم ءِ لیکہ ایش اِنت کہ نواز شریف ءِ پرویز رشید ءِ اگدہ ءَ پچ گرگ ءَ پد وتی راہ ءُُ کشک ساپ کتگ بلئے راجکاری ءَ گامگیج ہنچو معنا نہ داریت کہ ہنچو گامگیج ءِ وھد ءُُ پاس دارایت ۔اگاں حال ءِ شنگ بوھگ ءَ پد نواز شریف ءَ اے گامگیج بُزرت اِنت گڈا باز جوان اَت بلئے اے نندانک ءِ وھد ءَ اے گامگیج چہ نپ ءَ گیش نواز شریف ءَ تاوان بار کنت۔
مردم کہ گش انت کہ نوازشریف چہ راجکاری سنچ ءُُ بود ءَ پاک اِنت رد نہ اِنت پرچکہ اے جاوراں آئی ءِ پرویز رشید ءِ اگدہ ءَ را پچ گرگ وتی من ءَ راجکاری تکانسری ءَ را کم کنگ انت بلئے آسر پد نہ اِنت کہ اے کار ءَ پد نوں آئی ءِ تکانسری گیشتر بیت۔
حدا ہیرے بیارایت پہ زندگیناں ۔۔۔۔!
