مروچی بزاں ۱۴ جنوری ءِ سہب گوں شال ءِ کپن ءَ درا بوت زانگ ہمے بوتگ ات کہ مہر ءُُ دوستی چہ شال ءِ دمکاں دیر اِنت لڈ اتگ شتگ پمشکا شہر ءَ کپن پوشتگ ءُُ موتک دارگ اِنت ءُُ وتی ارسانی گباراں سرجمیں شہر ءَ دنزگ ءَ انت شال ءَ چنائی ءَ اوں اے اسپتیں کپن پیسر ءَ دیستگ ءُُ ماراِتگ بلئے اے بری آئی ءِ کپن بزتر ءُُ پراہ ءُُ شائیگان اِنت اے کپن عہد ءِ گمانی ئیگ اِنت گم کہ ہمک پاس گوں بنی آدم ءِ بخت ءَ نبشتہ اَنت ہما گم کہ ہچبر ھلاسی ءَ نزان اَنت ہما گمانی اِنت۔ اے گم چد ءُُ گیش بیت بلئے کم ءُُ جہلی اے گمانی دروگے دائم اے گم بنی آدم ءِ کوپگانی گران باری اِنت کہ دائم است انت ءُُ ہچبر ھلاس نہ بیت ۔
اے درائیں گپ چیر اندری مارشتانی ئیگ ات انت بلئے راستیں گپ اِش انت کہ کوئٹہ ءَ سال ءِ اولی برپ گواری بوتگ ءُُ انگت گشگ ہمے بوھگ ءَ اِنت کہ اے برپ گواری داں دو روچ ءَ برجم بیت ۔روچ ءِ دراہی گوں کیرتھر ءُُ اربوئی ءِ اسپیتیں چادر ءَ بوتگ اَت پرچکہ روچ ء جمبراں اندیم کتگ اَت ۔داں ہرکجا کہ چماں کار کت برپ اَت ۔بلئے حیف ءُُ سد اپسو ز کہ اے دور ءَ کہ ہمک دومی چیز نیٹ ءُُ فیس بک ءَ شنگ بیت اے روچ ءَ درائیں شوشل میڈیا ھاموش ات انت پرچکہ برگ ءُُ گروک دوشی شپیگ انت کہ گار اِنت ءُُ انگت ءَ گار انت کسی موبائلاں پہ عکس بندی ءَ چارج مان نیست اَت کس ءَ نہ عکسے درکت نیکہ ویڈیو کت ایوک ءَ گوں لہڑیں دل ءِ اوپارگاں ہمے برپاں گوں سہتے لیب کت بلئے شال ءِ سارتی اوں وتی ترندی ءَ اَت کہ کسی پگر ءَ نیست اَت شال وتی گوستگیں سال ءِ گرمی ءِ درائیں بیراں یک دپار کنت ءُُ گپت بزان چشیں سارت ءُُ برپ باری شال ءِ دمکاں ہبچر نہ دیستگ اَت کہ اے بری گندگ ءَ اَت ۔دہ دوشی شپ ءِ یک ءُُ دو ءَ بگر داں بیگاہ یے پنچ ءُُ شش ءَ اے برپ ءَ شل بستگ اَت ءُُ ھالرسانکی گل ہمے جار ءَ جنگ ءَ اِت انت کہ اے وَ ترمپانی اول سر اِنت سارتی ءُُ برپ گواری انگت ءَ دیم ءَ انت اے گپ ءَ مردم گیشتر تکانسر کت اَنت کہ یکے نیمگے سرجمیں شال ءِ گروک ءُُ برگ گار اَت ءُُ دومی نیمگ ءَ گیس اوں وتی گڈی سیمسراں سر بوتگ اَت ءُُ درک درک کنگان اَت ۔مردماں پہ بوپ ءُُ گندل پہ پر دئیگ ھلاس کتگ اَت انت بلئے سارتی اِنت کہ کم ءُُ ھلاسی ءِ نام ءَ نزانت ۔گونڈونی کندگ ءُُ مسکرائی یک سہتے ءَ برجم ات انت بلئے سارت ءُُ یخیں گواتاں اے زھگانی مسکرائی گیڑئی ءَ آسر کت انت ۔
شال ءِ دمکاں انچیں یک سارتی یے سال ۲۰۱۱ ءُُ ۲۰۱۳ ءِ گڈی روچان دیستگ اَت بلئے اے بری سارتی ءُُ برپ گواری ءَ وتی کچ ءُُ کیلانی ھد ءُُ بند پروشتگ ات انت ۔ہرکس ہمے دعا ءَ اَت کہ نوں وَ بس بہ بیت بلئے اے ھدائی فریج اِنت چون بند بیت ،سارتیں گوات ءُُ یخ ءَ مردم بے کاری ءَ سر کتگ اَت ہمک دومی مردم ایوک ءَ وتی لوگاں بندیگ بوتگ اَت ءُُ شال ءِ دمک پریسگ اِت انت کہ مردمانی ھلوت ءُُ گردگ مہتل اَت ۔اے یک اجبیں گپے اَت کہ مردم وشی کنگ ءَ نہ ات انت بلکیں اے دعا کنگ ءَ اِت انت کہ برپ ءُُ ہور ھلاس بہ بنت دانکہ مردم پہ کار ءُُ روزگاری بہ بنت ،ھؤ ڈے وھد ترا سلام اِنت ،مرچی چشیں دلکشیں موسمے کہ ھدا ءَ پہ نا شکریں بنی آدم ءَ را داتگ آ گشیت کہ آسر بہ بیت ہردے موسم گرم ءُُ تبد ءُُ لوار بیت داں ہمے مردماں گشتگ کہ ھدا سارتی بیارایت ۔ بنی آدم مدام نا شکر اِنت پمشکاشال ءِ گواتاں بنی آدم ءَ را وتی ناشکری ءِ مارشت داتگ۔بلئے اے درائیں گپ وتی جاہ ءَ موسم سک وش اَت ءُُ مئے نیمگ ءَ درائیں شال ءَ را سال ءِ اولی برپ گواری مبارک بہ بات۔
