کوئٹہ:پشین اور گوادر میں ٹریفک حادثات میں چار افراد جاں بحق اور آٹھ افراد زخمی ہوگئے۔ لیویز کے مطابق جمعرات کی صبح پشین کے علاقے سرانان میں کوئٹہ چمن شاہراہ پر کوئٹہ سے سرانان جانے والی گاڑی مخالف سمت سے آنیوالی موٹر سائیکل سے ٹکر اگئی۔ حادثے کے نتیجے میں دو موقع پر ہی افراد جاں بحق اور چارزخمی ہوگئے۔ لاشوں اور زخمیوں کو ڈسٹرکٹ ہیڈ کوارٹر اسپتال پشین پہنچایا گیا جہاں سے شدید زخمی کو سول اسپتال منتقل کیا گیا۔ ایک زخمی سول اسپتال میں دم توڑ گیا اس طرح جاں بحق افراد کی تعداد تین ہوگئی۔ جاں بحق افراد کی شناخت کار ڈرائیور خان محمد ولد سید محمد سکنہ کوئٹہ ،موٹر سائیکل پر سوار پندرہ سالہ محمد خان ولد امیر جان اسحاق زئی سکنہ سرانان کیمپ اورخدائے داد ولد حاجی سلیمان سکنہ سرانان مہاجر کیمپ کے طور پر ہوئی ہے ۔ جبکہ زخمیوں میں عزت اللہ ،عبدالرحمان اور عبدالعلی شامل ہیں۔ ادھر جمعرات کی صبح ساڑھے آٹھ بجے گوادر کے علاقے شمبے اسماعیل میں جناح ایونیو روڈ پر جی ڈی اے سکول کے طلباء کی کار تیز رفتاری کی وجہ سے الٹ گئی۔ حادثے میں کار ڈرائیور بالاچ خان ولد محمد حنیف سکنہ لعل بخت وارڈ جاں بحق جبکہ پانچ طلباء فاضل، شاہ میر ، شہزاد ، ریحان اور عادل زخمی ہوگئے جنہیں سول اسپتال گوادر پہنچایا گیا۔
