کابل: کابل کے حامد کرزئی انٹرنیشنل ایئرپورٹ کے باہر 2 خودکش دھماکوں میں 13 امریکی فوجیوں سمیت 90 افراد ہلاک اور 150  زخمی ہوگئے۔  کابل میں حامد کرزئی انٹرنیشنل ایئرپورٹ دو خود کش دھماکوں سے گونج اُٹھا۔ ایک دھماکا ایئرپورٹ کے مرکزی دروازے پر ہوا جب کہ دوسرا دھماکا قریبی ہوٹل کے باہر ہوا جہاں برطانوی فوجی اور حکام مقیم تھے۔

افغان طالبان نے کہا ہے کہ کابل ایئرپورٹ پر ہونے والے دھماکوں کے باوجود امریکی فوجیوں کے انخلا کی تاریخ میں توسیع نہیں ہوگی۔ایک بیان میں طالبان نے کہا کہ کابل دھماکوں میں انہوں نے امریکی فوجیوں سے زائد اپنے بندے گنوائیں۔ امریکہ کو اپنے انخلاء مکمل کرنے کے لیے 31 اگست کی آخری تاریخ بڑھانے کی ضرورت نہیں ہے۔

اغوا کاروں نے نائیجیریا میں مئی میں اغوا کیے گئے 136 طلبہ کو رہا کردیا ہےمیڈیا رپورٹس کے مطابق طلبہ کے والدین  نے تصدیق کی ہے کہ ان کے بچوں کو رہا کر دیا گیا ہے۔

کابل میں دھماکوں کی سیکریٹری جنرل اقوام متحدہ، سعودی عرب، چین، برطانیہ، جرمنی، اٹلی، اسپین اور فرانس سمیت کئی ممالک نے مذمت کی ہے۔اقوام متحدہ کے سیکرٹری جنرل انتونیو گوتریس  کا کہنا ہے کہ کابل ایئر پورٹ پر ہونے والےخوفناک دہشتگردانہ حملوں کی مذمت کرتا ہوں،جو افغان دوسروں کی مدد کرتے تھے وہ آج مارے گئے۔

نیٹو سفارتکار نے افغان طالبان سے کابل دھماکے کے بعد داعش کے خلاف تحقیقات کرانے کا مطالبہ کیا ہے۔نیٹو سفارتکار نے کہا کہ طالبان نے کابل پر کنٹرول حاصل کرنے کے بعد ہزاروں قیدیوں کو جیلوں سے باہر نکلنے کی اجازت دی تھی جن میں داعش کے بندے بھی شامل تھے۔

افغان میڈیا کے مطابق کابل ایئر پورٹ کے مشرقی گیٹ پر دھماکہ ہوا اور بعد میں فائرنگ کی آواز بھی سنی گئی ہے۔

روس اور چین نے افغانستان سے ابھرتے خطرات سے نمٹنےکے لیے مشترکہ کوششیں تیز کرنے  پر اتفاق کیا ہے۔روس کے صدارتی محل کریملین سے جاری بیان میں کہا گیا ہے کہ روسی صدر ولادمیر پیوٹن اور چینی صدر شی جن پنگ کے درمیان ٹیلی فونک رابطہ ہوا جس میں قیام امن کی اہمیت اور  خطے میں عدم استحکام کا پھیلاؤ روکنے سے متعلق امور پر تبادلہ خیال کیا گیا۔

افغانستان میں تعینات پاکستان کے سفیر منصور احمد خان نے کہا ہے کہ طالبان کی جانب سے کنٹرول حاصل کرنے کے بعد افغانستان میں غیریقینی صورتحال ہے تاہم طالبان اور دیگر سیاسی رہنما جنگ زدہ ملک کو اس صورتحال سے نکالنے کے لیے مسلسل رابطے میں ہیں۔ منصور احمد خان نے کہا کہ پاکستان افغانستان میں  دیرپا امن کے لیے مضبوط سیاسی نظام  کا خواہاں ہے، نئے نظام کے لیے سیاسی اکابرین سے رابطے کیے جارہے ہیں۔

پاکستان میں عالمی وبا کورونا سے مزید 85 افراد انتقال کر گئے اور 4553 نئے کیسز بھی رپورٹ ہوئے ہیں۔پاکستان میں کورونا کے اعداد و شمار بتانے والی ویب سائٹ (covid.gov.pk) کے مطابق گزشتہ 24 گھنٹوں کے دوران ملک بھر میں کورونا کے 61 ہزار 446 ٹیسٹ کیے گئے جن میں سے 4553 افراد میں وائرس کی تصدیق ہوئی جب کہ وائرس سے 85 افراد انتقال کر گئے۔

امریکا، برطانیہ اور  آسٹریلیا نے اپنےشہریوں کو کابل ائیرپورٹ کی طرف جانے سے روک دیا۔ تینوں ممالک کی جانب سے جاری ایڈوائزری میں کہا  گیا ہے کہ دہشت گرد حملے کا خدشہ ہے لہذا شہری کابل ائیرپورٹ سے دور  رہیں۔