الیکشن کمیشن آف پاکستان نے کہا ہے کہ سینیٹ الیکشن ماضی کی روایت کے مطابق خفیہ بیلٹنگ سے ہوں گے تاہم شفافیت کے لیے تمام ضروری اقدامات کیے جائیں گے۔سپریم کورٹ کے فیصلے کے بعد چیف الیکشن کمشنر کی زیرصدارت ایک اجلاس ہوا۔ اجلاس میں سپریم کورٹ کی رائے پر اس کی روح کے مطابق عمل کرنے کا فیصلہ کیا گیا ۔اجلاس میں یہ فیصلہ بھی ہوا کہ سینیٹ الیکشن میں ٹیکنالوجی کے استعمال کیلئے کمیٹی بنائی جائے گی۔ٹیکنالوجی کے استعمال سے متعلق کمیٹی 4ہفتوں میں سفارشات دے گی۔ مذکورہ کمیٹی نادرا،ایف آئی اے اور وزارت آئی ٹی سے تجاویز بھی لے گی۔

سینیٹ کی دو نشستوں پر قومی اسمبلی میں الیکشن ہو گا اورایک نشست خالی ہونے کے باعث ارکان کی مجموعی تعداد341 ہے۔سینیٹ کی جنرل اور خواتین کی مخصوص نشست کے لیے حکومت اور اپوزیشن میں ون ٹو ون مقابلہ ہے اور کسی بھی امیدوار کو جیتنے کے لیے171 ارکان کے ووٹ درکار ہوں گے۔حکومتی اتحاد کو اس وقت قومی اسمبلی میں181 ارکان کی حمایت حاصل ہے۔ حکمراں جماعت پاکستان تحریک انصاف کے157 ایم این ایز ہیں۔قومی اسمبلی میں حکومت کی اتحادی جماعت متحدہ قومی موومنٹ کے7، مسلم لیگ ق اور بلوچستان عوامی پارٹی کے پانچ پانچ ارکان ہیں۔

یکم مارچ سے پیٹرولیم مصنوعات کی قیمتوں میں ایک بار پھر اضافے کا امکان ہے۔ اوگرا نے سمری پیٹرولیم ڈویژن کو ارسال کر دی ہے۔ سمری میں پیٹرولیم مصنوعات کی مجوزہ قیمتوں کا تعین 30روپے فی لیٹرلیوی کی بنیاد پرکیا گیا ہے۔اطلاعات ہیں کہ پیٹرول کی فی لیٹر قیمت میں 20روپے7پیسے اضافے کی تجویز دی گئی ہے۔ ڈیزل کی فی لیٹرقیمت میں19روپے61 پیسے اضافے کی تجویز ہے۔پیٹرولیم لیوی کی بنیاد پرپیٹرول اور ڈیزل کی قیمت 6 روپے فی لیٹربڑھے گی۔

وزیراعظم عمران خان نے بھارتی جارحیت کے خلاف پاکستان کے کامیاب ردعمل پر قوم اور پاک فوج کو مبارکباد دی۔وزیر اعظم عمران خان نے سماجی رابطے کی ویب سائٹ ٹوئٹر پر بالاکوٹ واقعے کے 2 سال مکمل ہونے پر پاک فوج کی بہادری کو سلام پیش کیا اور وزیراعظم نے بھارتی جارحیت کے خلاف پاکستان کے کامیاب ردعمل پر قوم کو مبارکباد دی۔وزیر اعظم عمران خان نے کہا کہ ذمہ دار قوم ہونے کے ناطے ہم نے پورے عزم کے ساتھ بروقت جواب دیا اور پاکستان نے پوری دنیا کو اپنے ذمہ دارانہ رویے کا ثبوت دیا۔

وزیراعظم عمران خان کا کہنا ہے کہ مشکل وقت سے نکلنے کے لیے ملک کو آؤٹ آف دی باکس سوچنا پڑتا ہے۔لاہور میں سینٹرل بزنس ڈسٹرکٹ منصوبے کی افتتاحی تقریب سے خطاب کرتے ہوئے وزیراعظم عمران خان کا کہنا تھا کہ 10 اندھیرے برسوں میں بہت زیادہ قرضے لیے گئے، اب ہر سال ہم پر قرضوں کی قسطیں بڑھتی جارہی ہیں۔ان کا کہنا تھا کہ مشکل وقت سے نکلنے کے لیے ملک کو آؤٹ آف دی باکس سوچنا پڑتا ہے، آؤٹ آف دی باکس کا مقصد پرانی سوچ سے باہر نکلنا ہے۔انہوں نے بتایا کہ گزشتہ ایک سال سے قطر سے معاہدے کی کوشش کر رہے تھے۔

الیکشن کمیشن نے بلوچستان سے سینیٹ امیدواروں کی حتمی فہرست جاری کردی، فہرست الیکشن کمیشن کی جانچ پڑتال اور الیکشن ٹریبونل کے فیصلوں کے بعد جاری کی گئی، جنرل نشستوں کیلئے سب سے زیادہ امیدوار  بلوچستان عوامی پارٹی سے ہیں جن میں آغا احمد عمر احمدزئی ، میر سرفرازبگٹی ، منظور کاکڑ ، ستارہ ایاز اور عبدالخالق اچکزئی جنرل سیٹوں کے امیدوار ہیں ، JUI کی طرف سے مولانا عبدالغفور حیدری ، پشتونخواہ میپ کے عثمان کاکڑ، میر اسرار زہری BNP  عوامی ، ANP سے ارباب فاروق کاسی ، قاسم رونجھو BNP  مینگل سے اور محمد جواد جمہوری وطن پارٹی کا نام حتمی طور پر فہرست میں شامل ہے ۔

بلوچستان کے دارالحکومت کوئٹہ میں گرین بس سروس کے جلد آغاز کے دعوے بار بار کئے جارہے ہیں مگر زمین پر کام ہوتا دکھائی نہیں دے رہا۔ کوئٹہ کے شہریوں کیلئے سستی سفری سہولیات ایک بڑا مسئلہ ہے کیونکہ شہر میں چلنے والی لوکل بسوں کی حالت انتہائی خستہ ہے جن میں سفر کرنا شہریوں کیلئے کسی عذاب سے کم نہیں ، ٹوٹی پھوٹی سیٹیں، فرش بوسیدہ ہونے کے ساتھ دیگر مسائل عوام کیلئے بہت بڑے حادثات کاسبب بن سکتے ہیں مگر بدقسمتی سے چند لوکل بس مالکان اپنے بسوں کو بہتر بنانے کی بجائے گرین بس سروس کی مخالفت کرتے دکھائی دیتے ہیں۔

عالمی وبا کورونا وائرس کے سبب پاکستان میں مزید16اموات اور ایک ہزار160 نئے کیسز سامنے آئے۔نیشنل کمانڈ اینڈ کنٹرول سینٹر کے مطابق پاکستان میں کورونا سے اموات کی مجموعی تعداد 12 ہزار 617 تک پہنچ گئی جبکہ متاثرہ افراد کی مجموعی تعداد 5 لاکھ 72 ہزار 334 ہو گئی ہے۔ملک میں کورونا سے 5 لاکھ35 ہزار491 افراد صحت یاب ہو چکے ہیں اور زیر علاج مریضوں کی تعداد 24 ہزار 226 ہے۔کورونا کے سبب سب سے زیادہ اموات پنجاب میں ہوئی ہیں۔

صوبائی حکومت بلوچستان میں ٹی بی کے خلاف جنگ جیتنے کے لیے موثر حکمت عملی مرتب کرنے جارہی ہے اور صوبائی حکومت نے اس بیماری سے نمٹنے کیلئے اختیار کردہ کامیاب عالمی حکمت عملی کے تجربات سے استفادہ کرنے کا فیصلہ کیا ہے۔گزشتہ روز ٹی بی کے خلاف منعقدہ عالمی کانفرنس کاانعقاد کیاگیا۔ کانفرنس میں ٹی بی کے تدارک کیلئے کام کرنے والے دیگر ممالک کے مندوبین نے بھی شرکت کی۔ انٹر نیشنل کانفرنس سے خطاب کرتے ہوئے پارلیمانی سیکرٹری صحت ڈاکٹر ربابہ خان بلیدی نے کہا کہ بلوچستان میں ٹی بی کے مرض سے نمٹنے کیلئے علاج معالجے کے ساتھ ساتھ شعوری و آگاہی کی ترویج پر مشتمل حکمت عملی مرتب کی جارہی ہے۔

وفاقی وزیرداخلہ شیخ عبدالرشید نے ہیلی کاپٹر کے ذریعے پاک ایرانی سرحد مند ردیگ کا دورہ کیا، آئی جی ایف سی ساؤتھ بلوچستان ایمن بلال صفدر انکے ہمراہ تھے، ردیگ مند سرحد پر بریگیڈیئر آرمی نوید اقبال، ونگ کمانڈر ایف سی توقیر حسن اور ڈپٹی کمشنر کیچ میجر ریٹائرڈ محمد الیاس کبزئی نے ہیلی پیڈ پر انکا استقبال کیا۔اس دوران وزیر داخلہ شیخ رشید نے کہا کہ لوگوں کی نقل و حرکت اور سرحد پار تجارت کی فروغ کیلئے سرحد پر جدید انتظامات کئے جا رہے ہیں۔وفاقی وزیرداخلہ نے پاکستان اور ایران کے درمیان سرحد کا فضائی دورہ بھی کیا۔