بلوچستان میں ترقی زمین پر نظر نہیں آتی اسکی ایک بنیادی وجہ پچھلے ستر سالوں میں منتخب نمائندوں نے اجتماعی منصوبوں کو ترجیح نہیں دی،ترقیاتی اسکیمات کے نام پر ذاتی اسکیمات منظور کروائی گئیں جسکے نتیجے میں آج بلوچستان پورے ملک سے پیچھے رہ گیا ہے۔دو ہزار دس تک بلوچستان وسائل نہ ہونے کا رونا روتا رہتا تھا اس رونے دھونے کے نتیجے میں ساتویں این ایف سی ایوارڈ نے بلوچستان کو اتنے وسائل دیئے جتنے صوبے کی ساٹھ سالہ تاریخ میں نہیں ملے تھے لیکن یہ وسائل ایک سیلاب کی طرح آئے اور بہہ گئے، کوئی بند بنا کر ان پیسوں کو بچایا نہ گیا، مال مفت دل بے رحم کی طرح یہ پیسہ اراکین میں بانٹا گیا۔

موٹروے گینگ ریپ سانحے کے بعد کشمور میں ماں اور بیٹی سے زیادتی کے دلسوز واقعے نے انسانیت کے دل دہلا دیے ہیں،اس واقعے نے ہم سب کو اس طرح جھنجھوڑ کر رکھ دیا ہے کہ جس کا نہ تو قلم کے ذریعے افسوس کیا جا سکتا ہے اور نہ ہی چند لفظوں کے لکھنے سے اس ماں،بیٹی پر گزرنے والی قیامت، ظلم و بربریت،دکھ،پریشانی اور تکلیف کا مداوا کیا جاسکتا ہے۔بچوں کے ساتھ ایسے درد ناک واقعات و سانحات ہوتے ہیں جن کو لکھتے ہوئے قلم تھرتھرا اٹھتا ہے میں کافی دیر سے کالم لکھنے کی کوشش کر رہا تھا مگر ہاتھ ساتھ نہیں دے رہے تھے۔کیونکہ بچے تو معصوم ہوتے ہیں۔

اپنے سیاسی اہداف کے حصول میں جمہوری، پارلیمانی اور اخلاقی قدروں کو پامال کرکے میثاق جمہوریت کی دھجیاں اڑا کر ن لیگ اور پیپلز پارٹی اب ایک نئے میثاق کی طرف بڑھ رہی ہیں۔ گو کہ جنرل پرویز مشرف کے دور میں میثاق جمہوریت پیپلزپارٹی اور ن لیگ کے درمیان ہوا تھا لیکن نیا میثاق جمہوریت پاکستان ڈیموکریٹک موومنٹ میں شامل گیارہ جماعتوں کی مشترکہ کوششوں کا نتیجہ ہوگا۔ 2006 میں شہید بے نظیر بھٹو اور نواز شریف کے درمیان ایک تاریخی چارٹر پر اتفاق ہوا تھا آٹھ صفحات پر مشتمل اس تاریخی دستاویز پر اگر من و عن عمل کیا جاتا تو آج ملک ان سیاسی مسخروں کے ہاتھ نہ آتا اور یہ باہر بیٹھ کر اپنے زخموں کو نہ چاٹ رہے۔

گزشتہ دنوں چیف آف جھالاوان سردار ثناء اللہ زہری اورریٹائرڈ جنرل قادر بلوچ نے ایک تقریب میں پاکستان مسلم لیگ ن کی پارٹی کو چھوڑنے کا اعلان کیا۔بظاہر انھوں نے پارٹی چھوڑنے کی جو وجوہات بیان کیں وہ روایتی الزامات ہیں۔سردار ثناء اللہ زہری کا کہنا تھا کہ ہم نے بلوچستان میں ن لیگ کوفعال کیا،مگر نواز شریف نے ہمارے ساتھ بے وفائی کی،ہمیں اہمیت نہیں دی۔ریٹائرڈ جنرل قادر بلوچ نے بھی کچھ اسی قسم کے وجوہات کا اظہار کیالیکن پس پردہ جو وجہ ہے جس کا ہر کوئی گمان کر رہا ہے وہ میاں نواز شریف کا سخت بیانیہ یا الزامات ہیں۔

سال کے آغاز میں جب کورونا وائرس کی وبا پھوٹی تو اندازے یہی تھے کہ اس سے بین الاقوامی تعلقات جمود کا شکار ہوجائیں گے۔ بعض لوگوں کو توقع ہوچلی تھی کہ عالمی معیشت اور سیاست میں قائدانہ کردار کی جانب چین کے بڑھتے قدم رُک جائیں گے، اسی طرح چین اور روس کا اتحاد بھی وبا سے پیدا شدہ حالات کو سہار نہیں پائے گا۔ لیکن حالات ان توقعات کے برعکس ثابت ہوئے۔ وبا سے پیدا ہونے والے بحران میں امریکا کی ناکامی اور چین کی سرخروئی کے ساتھ معاشی بحالی نے ایک بار پھر اس تاثر کو پختہ کردیا کہ دنیا کی سیاسی و اقتصادی قیادت اب یوریشیا یا مشرق کی جانب منتقل ہورہی ہے۔

آپ بخوبی واقف ہیں کہ بلوچستان جہاں تک روایات کا امین خِطّہ ہے اسی طرح خوبصورت سیاسی روایات کا پاسدار دھرتی بھی ہے۔قبائلی تنازعات کی حد تک دیکھاجائے تو یہاں جنگی میدان ضرور سجتے رہے ہیں مگر تاریخ میں ہم نے کسی مْہذّب بلوچ اکابر کو اپنے مخالفین پہ غیراخلاقی فقرہ کستے نہیں دیکھا۔ جہاں تک بلوچ سماج کے سیاسی تاریخ کی بات ہے تو ماضی بعید کی شاندار سیاسی روایات تو عظیم تر رہی ہیں۔ دو دہائی کے قبل سیاسی تاریخ پر نظر دوڑائی جائے توبلوچ سیاسی تاریخ میں اکابرین سے لے کر سیاسی کارکنوں تک کے درمیان نکتہ نظر اور جدّ وجہد کے طریقہ کار پہ اختلاف تو ہوتی رہی ہے مگر اس میں کسی قسم کا سطحی فقرہ بازی اور سیاست کی بنیاد پر ذاتی عِناد نہیں دیکھی گئی ہے۔

پاکستان دلکش اور متنوع سیاحت کے لحاظ سے دنیا میں منفرد مقام رکھتا ہے، پرکشش پہاڑی سلسلوں، صحراوں، خوبصورت نخلستان، ساحلوں، آبشاروں اور تاریخی و مذہبی مقامات آثار قدیمہ اور خوبصور ت مناظر کے حسین جاذبیت پر مبنی شہروں پر مشتمل ہے قدرت کے ان مناظر میں بلوچستان کا حوالہ سب سے زیادہمعتبر ہے جبکہ بلوچستان کی ساحلی پٹی منفرد نوعیت کی ہے، اس قسم کی متنوع سیاحت دنیا میں کہیں اور دیکھنے کو نہیں ملتی۔بلوچستان کی ساحلی پٹی 770کلومیٹر پر پھیلی ھوئی ھے یہ طویل ساحلی پٹی اپنے جفرائی محل وقوع کے اعتبار سے بھی خصوصی اہمیت کا حامل ہے۔

کہتے ہیں کہ اقتدار پھولوں کی سیج نہیں ہوتی۔کسی کے حکومت پر تنقید تو بڑی آسانی سے کی جا سکتی ہے،مگر عملی طور پر خود حکومت کرنابہت مشکل ہوتا ہے،وہ بھی پاکستان جیسے ملک میں،جہاں گزشتہ کئی دہائیوں سے سیاسی حالات دگرگوں ہیں۔جس کی معیشت بیرونی امداد یا آئی ایم ایف کے بیساکھیوں کے سہارے چلتی ہو۔عمران خان بھی حکومت سے قبل اپنی زندگی میں مختلف ممالک میں مزے کرتے رہے،جب کرکٹ سے ریٹائر ہوکر پاکستان کی سیاست میں کود پڑے تو انھوں نے پاکستانی عوام کو سبز باغ دکھائے۔

موجودہ حکومت مکران میں ترقی و خوشحالی کا نغمہ گنگنا رہی ہے۔ ترقیاتی پیکج کے نام پر یہ دعویٰ کیا جارہا ہے کہ جنوبی بلوچستان ریجن کے عوام کی تقدیر بدل جائے گی۔ جنوبی بلوچستان کیلئے ترقیاتی پیکیج وزیر اعظم پاکستان عمران خان کا ویژن ہے۔ترقیاتی پیکیج میں سڑکیں، ڈیمز اور زراعت کے منصوبے شامل ہیں۔ اس سلسلے میں وزیر اعظم عمران خان 13 نومبر کو تربت کے دورہ پر آئیں گے اور ان منصوبوں کا سنگ بنیاد رکھیں گے۔ جبکہ دوسری جانب مکران کے ضلع کیچ میں تعلیم دشمن پالیسیوں کا نفاذ جاری ہے۔بلوچستان ریزیڈنشل کالجز (بی آرسیز) کے ملازمین کی معطلی اور ضلع کیچ کے114اساتذہ کی غیر قانونی بنیادوں پر برطرفی موجودہ حکومت کی تعلیم دشمن پالیسیوں کا تسلسل ہے۔